Hosiya 2
1 Aboobo bantu ba Isilayeli baitane kuti, “Muli bantu ba Leza” akuti, “Leza wamubeda aaluse.”
Baisilayeli bali mbuli mukaintu uutasyomeki
2 Nobana bangu, amubakombelezye banyoko, nikuba kuti tabacili bakaintu bangu, ambebo nsicili mulumi wabo pe. Amubakombelezye kuti baleke bwaamu bwabo, babuleke buvuule bwabo. 3 Bataleka kucita boobo, njoobasamununa kuti bakacaale mbubakazyalwa. Alimwi ndiyooba cita kuti bakabe mbuli cimpayuma, bakabe mbuli nkanda, njoobajazya nyota. 4 Taakwe nenjoobabeda luse bana babo, nkaambo tabasyomeki. 5 Banyina tabasyomeki, aabo bakabazyala bakali kucita zijazya bweeme. Bakati, “Ndainka kubamambe bangu, nkaambo mbabandipa kulya amaanzi, zisani zyaboya abutonje, mafuta, awaini.”
6 Nkaambo kaako nzila zyabo njoozisinka amamvwa, alimwi njoobayakilila mubwaanda kutegwa bakakacilwe kweenda mutuzila twabo. 7 Nkabela bayootandila bamambe babo, pele tabakabeenzyi. Bayoosoleka kubalangaula, pele tabakabajani pe. “Lino ndilabweeda kumulumi wangu mutaanzi nkaambo ndakali kabotu anguwe kwiinda ciindi cino.” 8 Nkaambo taakazi kuti ndime ndakalikumupa maila, waini, amafuta. Alimwi ndakamupa nsiliva angolida zinji eezyo nzibakabelesya kupanga Baali.
9 Nkaako kuciindi cakutebula ndiyoobanyanga maila awaini eezyo nzindakali kubapa. Alimwi ndiyoobanyanga boya abutonje bwazyakusama. 10 Kuciindi eeco njootondezya bwaamu bwabo kubamambe babo, nkabela taakwe naba omwi uyoobavuna kuzwa kunguzu zyangu. 11 Njoomanya lutangalo lwabo loonse, mapobwe aalikkala mwezi amazuba aamasabata, aambi oonse ngabasalide. 12 Alimwi ndiyoonyonyoona amicelo yabo yamisaansa aya nkuyu, eeyo njibakaamba kuti bakapegwa abamambe babo. Ndiyoocita kuti myuunda yabo yamisaansa ikabe saka, nkabela banyama bayoocelela nkuko. 13 Alimwi njoobasubula kuziindi eezyo nzyibakandilubide nibakali kutenta tununkilizyo kuli Baali. Bakalisakatizya malungu anweenwe kuti “Batandile bayandwi babo,” mbwaamba Mwami Leza.
Luyando lwa Leza kubantu bakwe
14 Aboobo njooboongelezya akubaleta kunkanda, nkabela ooko njoobabotelezya amajwi aaluyando. 15 Ooko ndiyoobaboozezya myuunda yabo yamisaansa njibakajisi. Njoosandula kkuti lyamapenzi libe mulyango walulangilo. Eelyo banoondiingula mbuli mbubakalikucita kabacili bakubusi, ciindi nibakazwa mucisi ca Ijipiti. 16 Ciindi eeco bayoondiita kuti, “Mulumi wangu. Tabakandiiti kuti, ‘Baali wangu,’ mbwaamba Mwami Leza. 17 Lino ambebo taakwe nenjoobazumizya limbi kwiita izina lya Baali. Masimpe bantu tabakamwiiti mukukomba.
18 “Ciindi eeco ndiyoocita cizuminano kubanyama, bayuni, azikalaba kuti ziyanzane abantu bangu. Ndiyoogwisya buta, panga, acilwanyo niciba buti munyika kuti bantu bangu bakakkale muluumuno.”
19 Yebo Isilayeli ndilakukkalila kuti ukabe
mukaintu wangu akutamani. Ndiyookukkalila mubululami,
mubuluzi, muluyando, amulweengelelo aluse.
20 Njookukulila cakusyomeka,
ndendilyo nooyooziba kuti ndendime Mwami Leza.
21 “Ciindi eeco njoovwiila kujulu,”
mbwaamba Mwami Leza, mvula iyoowa anyika.
22 Nyika iyoozyala maila, nsaansa, amafuta,
eelyo bantu bangu bayooti, “Jezulili” (nkokuti Leza wasyanga.)
23 Isilayeli njoomusyanga munyika kuti abe wangu.
Njoobeda aaluse Uutabedwi aaluse uulya.
Mbindakali kwiita kuti Tamuli bantu bangu,
njoobati Muli bantu bangu! Nkabela bayooingula kuti, “Nduwe Leza wesu.”