Hosiya 13

Lubeta lwamamanino lwa Isilayeli

¹ Kaindi kwakali kunga Baefulemu bakanana bantu bakali kuyoowa nkaambo mbibakali kulemekwa mu Isilayeli, pele bakabisya nibakakomba Baali, nkaako bayoofwa. ² Mazuba aano baciindilizya kubisya nobapanga mituni mibumbe ansiliva zyabo. Zyoonse eezi mmilimo yabasyaabupampu. Aabo baamba kuti, “Amulete zipaizyo kulimbabo.” Eelyo balabakomba mukumyonta boombe bapange. ³ Aboobo bayoozimaana mbuli sikunku wacifumo-fumo, naa mume uuloka kwakasaala. Bayoomwaika mbuli bungu buululuka kuzwa kucuumino naa mbuli busi buzwida ampulungwido.

⁴ Mwami Leza wakaamba kuti, “Ndime Mwami Leza wanu wakamugwisya kuzwa mucisi ca Ijipiti. Munyina Leza uumbi kunze lyangu. Mufutuli wanu ndime endikke. ⁵ Ndime ndakamubamba munkanda, ⁶ nyika iipya kapati. Ndakabasanina bakkuta, nibakakkuta bakalisumpula, bandiluba. ⁷ Lino njoobavwaampila mbuli syuumbwa. Njoobayubilila mbuli siluwe munsi aanzila. ⁸ Njoobavwalamina mbuli butambo bwatolelwa twana. Njoozapaula kaango kabo, njoobakwamauna mbuli butambo. Kwamana njoobakakaula mpoonyaawo mbuli syuumbwa.”

⁹ “Njoomunyonyoona Nobaisilayeli! Ani nguni uunga wamugwasya? ¹⁰ Nywebo mwakakumbila mwami abasololi. Ino lino mwami wanu ooyo wakuti amumvwe uli kuli? Ino basololi banu bakuti bamukwabilile bali kuli? ¹¹ Ndakamupa bami amoyo uucisa. Nibakandinyemya, ndakabagwisya.”

¹² “Zinyonyoono zya Baefulemu zililembedwe mubbuku, bbuku eeli lilibambidwe kabotu-kabotu. ¹³ Mapenzi mbuli aamukaintu uuyanda kutumbuka ayoobasikila. Nibaafutulwa, pele bali mbuli mwana uunyina maanu, uutafwambaani kutumbuka. ¹⁴ Taakwe ninjoobavuna bantu aaba kuzwa kucikkalilo cabafu, nikuba kubafutula kuzwa kunguzu zyalufu. Yebo olufu, kucisa kwako kuli kuli? Yebo ocuumbwe, cisubulo cako cili kuli? Bantu aaba nsikabeengeleli pe. ¹⁵ Nikuba kuti Baefulemu batangala mbuli matete, luuwo luzwa kujwe munkanda, luuwo lwa Mwami Leza, luyoobbubbula lukayuminizye tulonga atusensa twabo. Basinkondonyina bayoonyonyoona lubono lwabo luyandisi.

¹⁶ “Baku Samaliya bayoosubulwa nkaambo bazangila Leza wabo. Bantu bakwe bayoojaigwa apanga, bana bayoopwailwa ansi. Abalo bakaintu baminsi bayooandaulwa.”