Hosiya 11
Luyando lwa Leza kubantu bakwe bazangi
1 Mwami Leza ulati, “Isilayeli naakali mwana ndakamuyandisya.
Kuzwa mu Ijipiti ndakaita mwanaangu.
2 Nikuba kuti ndakali kubaita ciindi aciindi, balo bakali kunditijila kulaale.
Bantu bangu bakali kupaizya kuli Baali. Bakali kutenta tununkilizyo kumutuni ooyo.
3 “Ndime ndakaiisya Isilayeli kweenda. Ndakabalela mumaanza aangu,
pele tiibakazumina kuti ndime ndakabaponya.
4 Ndakabakwelela kulindime mulubomba amuluyando.
Ndakabanyamuna munsi asaya lyangu. Ndakafugama akubasanina.
5 “Lino bantu aaba bayobweeda ku Ijipiti kubuzike. Baasiliya mbabayoobalela, nkaambo bakaka kupilukila kulindime. 6 Nnkondo iyoomwayaula minzi yabo. Basinkondonyina bayoopwayaula zijazyo zyamilyango yabo akubanyonyoona, nkaambo bakali kutobela lulayo lubi. 7 Bantu bangu bakakatila zyakundizangila. Bayoolila akaambo kajoko lili munsingo zyabo, pele taakwe uuyooligwisya kuzwa kulimbabo pe.
8 “Ani inga ndakusiya buti yebo Efulemu? Inga ndakutija buti Isilayeli?
Ani inga ndamunyonyoona buti mbuli Adima? Nikuba kukucita mbuli cakacitika ku Zeboimu?
Moyo wangu wandikasya kucita oobo. Ndilijisi nkumbu mpati anduwe.
9 Nsikoyookusubula mubukali bwangu. Taakwe nsikoocinca akunyonyoona Isilayeli,
nkaambo ndi Mwami Leza, nsili muntu pe. Mebo nensalala ndaanywebo.
Taakwe nenzooboola kumunyonyoona pe.
10 “Ndiyoovuluma mbuli syuumbwa, aawo bantu bangu bayoonditobela. Bayoonditijaanina kababimba kumbo. 11 Bayoozwida ku Ijipiti calubilo mbuli buuluka buyuni. Bayoozwida ku Asiliya mbuli nkwilimba. Njoobaboozya alimwi kuminzi yabo. Ndime Mwami Leza nindaamba.”
Baisilayeli a Bajuda mbubakakalalilwa
12 Mwami Leza ulati, “Baefulemu bandizinguluka abubeji alweeno. Abalo bantu ba Juda bacindizangilide mebo neesalala, Leza uusyomeka.