Hagayi 2
Bulemu bwaŋanda ya Leza mpya
1 Lino mubuzuba bwamakumi obilo abumwi bwamwezi waciloba, majwi aa Mwami Leza akasika, kwiindila muli Hagayi musinsimi akuti, 2 “Ambila Zelubabeli mwanaa Syeyalitiyeli, mweendelezi waku Juda, a Josyuwa mwanaa Jehozadaki mupaizi mupati, abantu aabo basyeede. 3 Ubabuzye kuti, ‘Nguni aawa uuciliwo wakabwene ŋanda eeyi mubulemu bwayo bwakasaanguna? Ino ono iboneka buti? Sena tailangiki mbuli cintu buyo?’” 4 Mwami Leza ulati, “Pele lino kozyandamana Zelubabeli, kozyandamana Josyuwa omwanaa Jehozadaki mupaizi mupati. Amuzyandamane nywebo nobantu boonse bamucisi amubeleke, nkaambo ndili aandinywe, mbwaamba Mwami Leza Singuzuzyoonse. 5 Eeci ncitwakapangana andinywe ciindi nimwakazwa mu Ijipiti. Muuya wangu ulikkede akati kanu. Mutayoowi pe.”
6 Mboobu mbwaamba Mwami Leza Singuzuzyoonse ulati, “Mukaindi kasyoonto buyo ndazungaanya julu, nyika, lwizi ansi njumu. 7 Ndazungaanya zisi zyoonse, kuti ooyo ngobayandisya akaboole, eelyo njoozuzya ŋanda eeyi abulemu. Mbwaamba Mwami Leza Singuzuzyoonse. 8 Nsiliva njiyangu, angolida njiyangu. Mbwaamba Mwami Leza Singuzuzyoonse. 9 Bulemu bwaŋanda eeyi buyooinda bulemu bwaŋanda yakusaanguna. Mbwaamba Mwami Leza Singuzuzyoonse. Alimwi kubusena buno njoopa luumuno, mbwaamba Mwami Leza Singuzuzyoonse.”
Basinsimi mbubakabuzya bapaizi
10 Mubuzuba bwamakumi obilo aane bwamwezi wafuka, mumwaka wabili wakulela kwa Daliyasi, majwi aa Mwami Leza akasika kuli Hagayi akuti, 11 Mboobu mbwaamba Mwami Leza Singuzuzyoonse, “Buzya bapaizi naa mulawo waamba nzi. 12 Uti, atwaambe kuti naa muntu wabweza nyama yasalazigwa akwiiputaila mucisani cakwe, nkabela cibbudu eeco caguma cinkwa, nuuba musinza, waini, mafuta nociba cilyo cimwi buyo, sena nyama eeyo icinoosalede mumulawo?” Bapaizi bakaingula kuti, “Peepe.”
13 Mpawo Hagayi wakabuzya wakati, “Kuti naa muntu uusofweede akaambo kakuguma mutumba wazooguma cimwi cazintu eezi, sena inga acalo casofwaala?”
14 Mpoonya Hagayi wakati, “Mbocibede akubantu aaba acisi eeci kulindime. Mbwaamba Mwami Leza. Cili coonse ncobacita ancobatuula cilisofweede.”
Mwami Leza mbwaakasyomezya kubaleleka
15 “Amuyeeyesye kapati akaambo kaceeci kuzwa sunu, amutelaike mbuli zintu mbuzyakabede kamutana talika kuyaka ŋanda ya Mwami Leza. 16 Ciindi muntu naakali kulangila kuti ulajana zisuwo zili makumi obilo, walo wakali kujana buyo zili kkumi. Ciindi muntu naakali kuyanda kuteka mpali zili makumi osanwe kuzwa mutalo lyawaini wakali kujana buyo zili makumi obilo. 17 Ndakanyonyoona milimo yanu kwiindila mukukokonyeka zisyango zyanu kuzilobya akuziwisizya civulamabwe. Pele nikuba boobo tiimwakajokela kulindime, mbwaamba Mwami Leza. 18 Kuzwa sunu, buno buzuba bwamakumi obilo aane bwamwezi wafuka, mubuyeeyesye buzuba oobu akaambo kantalisyo zyaŋanda ya Mwami Leza yakatalikwa. Amubuyeeyesye. 19 Sena kucili maila aacisyeede mubutala? Kusikila sunu, misaansa mikuyu, mipomegilaneti, amaoliva tazizyali. Pele kuzwa sunu ndamuleleka.”
Mwami Leza mbwaakasyomezya Zelubabeli
20 Majwi aa Mwami Leza akasika kuli Hagayi lwabili mubuzuba bwamakumi obilo aane bwamwezi akuti, 21 “Ambila Zelubabeli mweendelezi waku Juda kuti njoozungaa nya julu anyika. 22 Ndiloola bami akumwaya malelo aabazwamasi. Ndatyoloola nkalaki abaabo bazyeenzya, mabbiza aabo abaabo baatanta balamana, banooyasana amapanga mulicabo.”
23 Mwami Leza Singuzuzyoonse ulati, “Mubuzuba oobu, nzookubweza yebo Zelubabeli mwanaa Syeyalitiyeli omubelesi wangu. Mbwaamba Mwami Leza. Njookucita kuti ukalele muzina lyangu, kayi ndime ndakusala. Mbwaamba Mwami Leza Singuzuzyoonse.”