Hagayi 1

Mulawo wakuyaka ŋanda ya Mwami Leza

¹ Mumwaka wabili wakulela kwamwami Daliyasi mubuzuba butaanzi bwamwezi wacisambomwe, majwi aa Mwami Leza akasika kwiindila muli Hagayi musinsimi kuti aambile Zelubabeli mwanaa Syeyalitiyeli mweendelezi waku Juda a Josyuwa mwanaa Jehozadaki mupaizi mupati kuti, ² “Mboobu mbwaamba Mwami Leza Singuzuzyoonse ulati, bantu aaba baamba kuti, ‘Ciindi tacinasika cakuyakulula ŋanda ya Mwami Leza pe.’” ³ Majwi aa Mwami Leza akasika kwiindila muli Hagayi musinsimi akuti, ⁴ “Sena ncibotu kuti nywebo kamukkede mumaanda aavumbidwe kabotu kakuli ŋanda ya Leza eeyi ilimwaidwe?”

⁵ Lino mboobu mbwaamba Mwami Leza Singuzuzyoonse, “Amuyeeye kabotu anzila zyanu. ⁶ Mwakasyanga kunji, pele nzimwatebula nzice buyo. Kulya mulalya, pele tamukkuti. Kunywa mulanywa pele nyota tiimani. Kusama mulasama pele tamukasaalilwi. Mulavola mali pele mwaabikka munkomo zidonkokede.”

⁷ Mboobu mbwaamba Mwami Leza Singuzuzyoonse, “Amuyeeye kabotu nzila zyanu. ⁸ Kamuya muzilundu mukalete ziyako muzooyake ŋanda, kuti nzoobotelwe mulinjiyo nzoolemekwe. Mbwaamba Mwami Leza. ⁹ Mwakali kulangila kunji, pele ono mubone mwakajana buyo kuce. Ooto ntumwakaleta kumaanda ndakatumwayaula. Ino kayi? Mbwaamba Mwami Leza Singuzuzyoonse. Nkaambo kaŋanda yangu iicimwaidwe kakuli umwi aumwi wanu ugamide kugulunganina buyo zyaŋanda yakwe mwini. ¹⁰ Nkankakaako ncomutakwe mume kuzwa kujulu, aalo ansi, ngwa, taakwe zyakulya. ¹¹ Ndakacitya kuti kube cilanga musokwe amuzilundu. Mumyuunda yamaila ayamisaansa mipya, yamisaansa yeengwa mafuta, ali coonse cimena munyika, bantu banyama aali zyoonse eezyo nzyomucita.”

Bantu mbubakaswiilila malailile aa Mwami Leza

¹² Mpawo Zelubabeli mwanaa Syeyalitiyeli, Josyuwa mwanaa Jehozadaki mupaizi mupati, abantu bakasyeede boonse, bakaswiilila jwi lya Mwami Leza amulumbe wa Hagayi musinsimi, nkaambo kakuti Mwami Leza wabo wakamutuma. Bantu bakayoowa Mwami Leza.

¹³ Mpoonya Hagayi mutumwa wa Mwami Leza wakaambila bantu mulumbe ooyo wakazwa ku Mwami Leza wakuti, “Ndinooli aandinywe,” mbwaamba Mwami Leza. ¹⁴ Mbombuboobo Mwami Leza mbwaakasungwaazya moyo wa Zelubabeli mwanaa Syeyalitiyeli mweendelezi waku Juda amoyo wa Josyuwa mwanaa Jehozadaki mupaizi mupati, amyoyo yabantu boonse bakasyeede. Bakaboola kuzootalika kubeleka milimo yaŋanda ya Mwami Leza wabo Singuzuzyoonse. ¹⁵ Bakatalika mulimo ooyu mubuzuba bwamakumi obilo aane bwamwezi wacisambomwe mumwaka wabili wakulela kwamwami Daliyasi.