Habakkuku 2
1 Ndiyookkala mbuli mulindizi aŋanda yakusompelela. Ndiyoolindila akubona eezyo Mwami Leza nzyayoondaambila zyakwaamba, akwiingulwa kwatongoosi lyangu.
Mwami Leza mbwaakaingula Habakkuku
2 Nkaako Mwami Leza wakandiingula kuti, “Lemba makani aaya, ulembe kabotu amabwe, kutegwa batikabale batakajani buyumu-yumu. 3 Makani aaya alindila ciindi cawo. Ciindi cawo ciyoosika cakufwambaana, zyoonse nzyemutondezya nzyakasimpe. Kuti naa zikamuke mukalindile. Ziyoosika masimpe, tazikamuki. 4 Makani ngakuti ooyo ulisumpula uyookacilwa, pele mululami kwiindila mulusyomo uyooba abuumi.”
Kunyonyooka kwabataluleme
5 Kasimpe waini wamukola, muntu uulisumpula tajisi luumuno pe. Lino akaambo kakuti mulyato mbubonya mbuli cuumbwe, mbubonya mbuli lufu mbolutakkuti, ulabunganya masi oonse, ulatola bantu boonse mubwaange. 6 Kwamana misyobo yoonse iyoomuseka akuti, “Maawe kuli yooyo uulilundikila lubono lutali lwakwe azikoloto. Ino eezi zilatola ciindi cilamfu buti kazicitika?”
7 Cakufwambaana basikumukweletesya bayoobuka, bayoobuka akumuzyangamya, bayoosaala zyoonse nzyomujisi. 8 Mukuti mwakasaala misyobo minji, nkaambo mwakanyonyoona minzi anyika yabo calunya.
9 Maawe kuli baabo bajana bwami munzila mbyaabi, kuti basumpule masena aabo kaatakwe acipenzya. 10 Mwakayandisya kunyonyoona misyobo minji, pele cakacitya kuti mikwasyi yanu yuusigwe nsoni, mwakaliletela lunyonyooko nobeni. 11 Mabwe abwaanda ayookulilila, misemo yamapulanga iyooyooma.
12 Maawe kuli baabo baliyakila minzi mukutila bulowa, bakkazikizye minzi kwiindila mubujayi, 13 pele Mwami Leza Singuzuzyoonse wasinizya kuti, nzyobabelesya zili mbuli nkuni zyamulilo, balalikatazya cabuyo, 14 bantu bayoozula luzibo lwabulemu bwa Mwami Leza, mbuli lwizi mboluzula maanzi.
15 Maawe kuli baabo banywisya beenzinyina zikola, balabadadalisya akusyaala buyo, kuti beebele cintanda cabo. 16 Kwamana nduwe uuyoousigwa nsoni, boonse bayookusampaula kapati. Uyoousigwa nsoni, tokalemekwi. Nkomeki yacisubulo ca Mwami Leza iyookusikila, kusampaulwa kwako kuyooinda bulemu mboojisi. 17 Ndulonya lunya ndookacita ku Lebanoni, luzookuboolela canguzu luzookuzunda, abanyama mbookajaya bayookuyoosya. Eeci ciyoocitika akaambo kabujayi mbookacita kunyika, akubantu bakkala muminzi yayo.
18 Ino mituni njaanzi? Eeyo yakapangwa amuntu, yalo iimwaambila buyo zyakubeja. Ino ooyo wakaipanga imwaambila nzi kuti aisyome, kuti asyome leza ooyo uutaambauli. 19 Maawe kuli yooyo waambila cisamu kuti, “Nyamuka ube muumi! Ayooyo waambila bbwe kuti, ‘Buka!’ Sena inga cakusololela? Zyoonse eezi zyakapangwa angolida, ansiliva tazikonzyi kuyoya.
20 “Mwami Leza uli muŋanda yakwe iisalala, woonse uuli munyika ino aumune kumbele lyakwe.”