Habakkuku 1
1 Ngaaya makani aa Mwami Leza ngaakayubunwida Habakkuku musinsimi.
Kutongooka kwa Habakkuku
2 O Mwami Leza, ino cilalampa buti ciindi cakukumbila lugwasyo, kotandiswiilili? Alimwi ndakulilila kuti kuli lupyopyongano pele toswiilili. 3 Ino nkaambo nzi ncoyanda kuti nkebona mapenzi aali boobu? Ino nkaambo nzi ncolekelela kubisya ooku? Lunyonyooko anzwanga zilindizingulukide akukazyanya kulakomena. 4 Nkaako mulawo tuucikwe nguzu. Kunyina bululami pe. Bantu babi bazingulukide baluleme, cakuti bululami bulabisyaanyizigwa.
Kwiingula kwa Mwami Leza
5 Amulange akati kabamasi mubone, mulagambwa kapati! Nkaambo ndiyoocita cimwi cintu mumazuba aanu ncomutakasyomi, nokuba kuti mukaambilwe. 6 Ndiyoobusya Bakalodiya, musyobo walutuzi uuteengeleli, weendeenda mumasi oonse kuti ukatole masena aatali aawo. 7 Mmbantu bayoowegwa kapati, balo balacita kufumbwa ncobayanda, balalisumpula kuti babe aabulemu.
8 Mabbiza aabo ngalubilo kwiinda basiluwe, mbakali kwiinda baumpe kulubundu-bundu, nkalaki zyabo zizuzaanina kumbele, basimabbiza bazwa kulaale. Bafuuma mbuli sikube najata ncaajaya, 9 boonse baboolela lupyopyongano. Nkamu yabasilumamba babo iboola mbuli guwo, balabunganya baange bavuzyanya mbuli musenga. 10 Basampaula bamami, akubisya baleli. Babona buyo zyaminzi balaseka, balayaka zitantaala akwiitola. 11 Balakukula mbuli luuwo. Bantu aaba nguzu zyabo ngoleza wabo.
Kutongooka kwa Habakkuku alimwi
12 O Mwami Leza kuzwa lili nduwe Leza. Nduwe Leza wangu, nduwe Uusalala wangu, tatukoofwa pe, O Mwami Leza nduwe wakasala Bakalodiya kuti batupilusizye bubi, O Mwaala wakababikka kuti batusubule. 13 Meso aako alilondokede, taayandi kubona bubi, tokonzyi kulekelela uucita bubi. Ino nkaambo nzi ncolekelela basiluuni? Ino nkaambo nzi noumwide kakuli babi banyonyoona baluleme kwiinda mbabo?
14 Wacita kuti bantu bapenge mbuli nswi, a mbuli tuuka-uka tunyina Mwami. 15 Balabajata bantu boonse atulobyo, balabajata akubakwelaanya mutunyandi, balasekelela akutangala kapati. 16 Bamana balakomba akupa zipaizyo nikuba kutentela tunyandi twabo tununkilizyo. Nkaambo kwiindila mutunyandi balakkala kabotu akulya zilyo zinono kapati.
17 Sena bayooindilizya kubelesya tunyandi twabo, akunyonyoona misyobo yoonse cakuteengelela?