Ezula 9

Ezula mbwaakamvwa zyamakwate-kwate aa Bajuda

¹ Lino zintu zyoonse eezi nizyakacitika, basololi bamwi bakaboola akuzoondaambila kuti, “Baisilayeli kubikkilizya abapaizi a Balevi tiibakalizandula kuzwa kubantu babazingulukide balaaziyanza zisesemya mbuli eeziya zya Bakenani, Bahiti, Bapelezi, Bajebusi, Baamoni, Bamowabu, Baijipiti a Baamoli. ² Balo abana babo bakwete bana babantu aaba, cakuti bavwelanya musyobo uusalala abantu aabo babazingulukide. Bakaletelezya kutasyomeka koonse ooku mbasololi abalupati-pati besu.”

³ Nindakamvwa makani aaya, ndakazapula zyakusama zyangu, ndakalijwa masusu acilezu, ndakakkala ansi nkendibijilidwe kapati. ⁴ Ndakakkala aawo nkebijilidwe mane kusikila ciindi lipaizigwa cipaizyo cakumangolezya, aboobo bantu boonse aabo bakayoowede akaambo kakaamba majwi aa Leza wa Isilayeli kwaamba zyakutasyomeka kwabaabo bakazwa mubwaange bakandibunganina.

⁵ Ciindi lipaizigwa cipaizyo cakumangolezya nicakasika, ndakanyamuka kuzwa waawo mpindakakkede nkebijilidwe, ndakacisamide zyakusama zyangu zizapwidwe. Ndakafugama ndatambika maanza ku Mwami Leza wangu. ⁶ Ndakakomba ndati, “O Leza wangu ndalisenda akuusa kulanga kulinduwe, nkaambo zibi amilandu yesu minji kapati cakuti ilasika kujulu. ⁷ Kuzwa muciindi cabasikale besu kusikila sunu, mulandu wesu mmupati kapati. Akaambo kazibi, zinyonyoono, swebo, bamami, abapaizi besu twakajaigwa twakanyangwa zintu twakausigwa bweeme mbubonya mbotuli sunu. ⁸ Lino kwakaindi aaka, O Mwami Leza wesu watubeda aaluse ncotusiila bamwi aaba akutupa mayubilo mubusena bwako busalala. Wakatucita kuti tulekwe mubuzike tulyeendelele. ⁹ Nikuba kuti twakali bazike, pele yebo O Leza wesu, taakwe nookatulekelezya pe. Wakacitya kuti baleli bapati baku Pesiya batweengelele akutuzumizya kuti tuyakulule ŋanda yako yakali tongo kuti tukkale kabotu muno mucisi ca Juda mu Jelusalemu.”

¹⁰ Pele ono O Leza wesu ino twaambe nzi kunze azeezi? Kayi twakasotoka milawo yako ¹¹ eeyo njookapa kwiindila mubabelesi bako basinsimi nookati, “Nyika njomuyootola ninyika iisofweede, akaambo kabantu bakkala mulinjiyo, bakaizuzya azisesemyo zyabo cakuti yabijila limwi. ¹² Nkaako tamweelede kukwasya bana banu balombe abasimbi pe. Tamweelede kubagwasya naaba asyoonto kuti bazwidilile kuti kamuyanda kuti mukalidomenene munyika eeyo njomuyoosiila balunyungu lwanu kwalyoonse alyoonse! ¹³ Eeci cacitika kulindiswe nkaambo kamilimo yesu mibi iitaambiki, pele O Leza wesu tootusubula bweelede zibi zyesu, ulitulekede kuti katucipona notusyeede. ¹⁴ Sena ono tusotoke alimwi milawo yako mukukwatana abantu bacita zisesemyo? Peepe, kuti naa twacita boobo inga watunyemena akutunyonyweeda limwi cakuti kulabula autisyaale. ¹⁵ O Mwami Leza wa Isilayeli nduwe bululami! Wakasiya ndiswe notusyeede sunu. Masimpe twazumina kulinduwe kuti tuli basizinyonyoono, aboobo taakwe naba omwe wesu uukonzya kwiima kumbele lyako pe.”