Ezula 8

Bantu bakapiluka kuzwa mubwaange

¹ Ngaaya mazina aabasololi bamikwasyi abaabo balembedwe bakapiluka andime kuzwa ku Babuloni muleli mupati Aatakisesi naakalikulela.

² Wakali musololi walunyungu lwa Finehasi ngu Gesyomu,

lwa Itama ngu Daniyele, lwa Devedi ngu Hatusyi.

³ Walunyungu lwa Syakaniya alwa Palosyi ngu Zekaliya.

Baalumi bakalembede anguwe bakali mwaanda amakumi osanwe.

⁴ Balunyungu lwa Pahatimowabu ngu Eliyehoenoyi mwanaa Zelahiya,

bakali aanguwe bakali myaanda yobilo,

⁵ lwa Zatu ngu Syekaniya mwanaa Jahaziyeli,

bakali aanguwe bakali myaanda yotatwe.

⁶ Lwa Adini ngu Ebedi mwanaa Jonatani,

bakali aanguwe bakali makumi osanwe,

⁷ lwa Elamu ngu Jesyaiya mwana wa Ataliya,

bakali aanguwe bakali makumi aali ciloba.

⁸ Lwa Syefatiya ngu Zebadiya mwanaa Mikayeli,

bakali aanguwe bakali makumi aali lusele.

⁹ Lwa Jowabu ngu Obadiya mwanaa Jehiyeli,

bakali aanguwe bakali myaanda yobilo akkumi alusele.

¹⁰ Lwa Bani ngu Syelomiti mwanaa Josifiya,

bakali aanguwe bakali mwaanda amakumi aali cisambomwe.

¹¹ Lwa Bebayi ngu Zekaliya mwanaa Bebayi,

bakali aanguwe bakali makumi obilo alusele.

¹² Lwa Azigadi ngu Johanani mwanaa Hakatani,

bakali aanguwe bakali mwaanda akkumi.

¹³ Balunyungu lwa Adonikamu bakali mbabakasyeede

bakali ba Elifeleti, Jeuweli a Syemaiya,

bakali aambabo bakali makumi aali cisambomwe.

¹⁴ Balunyungu lwa Bigivayi mbaa Utayi a Zakaa,

bakali aambabo bakali makumi aali ciloba.

Mbubakapilukila ku Jelusalemu

¹⁵ Mpawo ndakababunganya boonse kunkolola likunkila ku Ahava, twakabungana ooko kwamazuba otatwe. Lino nindakalanga-langa akati kabantu abapaizi taakwe Balevi mbindakabona pe. ¹⁶ Nkaako ndakaita Eliyezaa, Aliyeli, Syemaiya, Elinatani, Jalibu, Elinatani, Natani, Zekaliya a Mesyulamu bakali mbabasololi a Jeiyalibu a Elinatani bantu bakaiide, ¹⁷ ndakabatuma kuli Ido wakali musololi ku Kasifiya. Ndakabaambila ncobakeelede kuyooambila Ido abasazinyina, ababelesi bakuŋanda ya Leza bakali mu Kasifiya, kutegwa atutumine babelesi bakuŋanda ya Leza wesu. ¹⁸ Lino akaambo kakuti Leza wakali aandiswe, bakatuletela Syelebiya munkutwe walunyungu lwa Mali mwanaa Levi mwana wa Isilayeli kubikkilizya abana bakwe balombe alimwi abana bokwabo antoomwe bakali kkumi alusele. ¹⁹ Bakatuletela a Hosyabiya a Jesyaiya balunyungu lwa Melali antoomwe abana bokwabo abajwa babo. Antoomwe bakali makumi obilo. ²⁰ Bakaletelela ababelesi bakuŋanda ya Leza bali myaanda yobilo amakumi obilo. Eeyi yakali nkamu yabantu eeyo Devedi abalupati-pati bamwi njibakapanga kuti kaigwasilizya Balevi. Mazina aabo boonse akalilembedwe.

Ezula abantu mbubakakomba akuliimya kulya

²¹ Nkukonya ooko kunkolola lya Ahava ndakaambilizya kuti tuliimye kulya, mukulibombya kuli Leza wesu akuti tumukumbile kuti atweenzye kabotu swebo, bana besu alubono lwesu loonse. ²² Ndakalisenda kukumbila basilumamba abasimabbiza ku muleli mupati kuti batukwabilile kuzwa kuli basinkondoma munzila, nkaambo twakaambilide muleli kuti, “Leza wesu ulakwabilila boonse aabo bamusyoma, pele bukali bwakwe bupati bubukila baabo bamususya.” ²³ Nkaako twakaliimya kulya akukumbila Leza wesu akaambo kamakani aaya, nkabela wakamvwa kukomba kwesu.

Zipego zyakuŋanda ya Leza

²⁴ Mpoonya ndakasala basololi babapaizi bali kkumi ababili antoomwe a Syelebiya, Hasyabiya, abamwi bali kkumi. ²⁵ Kumane ndakeeleka nsiliva, ngolida azibelesyo eezyo muleli mupati, balailili bakwe abalupati-pati bakwe antoomwe a Baisilayeli bakali kooko nzibakapa kuti zikabelesegwe kuŋanda ya Leza. ²⁶ Nindakeeleka ndakajana matalenta aansiliva aali myaanda iili cisambomwe amakumi osanwe, azibelesyo zyansiliva zilema matalenta aali mwaanda, amatalenta aangolida aali mwaanda, ²⁷ amitiba yangolida iikonzya kuulwa madaliki aali cuulu, azibelesyo zyobilo zibotu zyamukuba uusyobedwe mubotu mbuli ngolida iini-ini. ²⁸ Ndakabaambila kuti, “Nywebo azeezi mwasalazigwa ku Mwami Leza. Nsiliva angolida eezi nzipego zyakuliyandila ku Mwami Leza wabasikale besu. ²⁹ Amuzibambe kabotu mane kusikila mukazyeeleke mutwaanda twamuŋanda ya Mwami Leza mu Jelusalemu kumbele lya bapaizi basilutwe Balevi, antoomwe abasololi bamikwasyi ya Baisilayeli.” ³⁰ Mpawo bapaizi a Balevi bakatambula nsiliva, ngolida azibelesyo zisalala eezyo zyakeelekwa kuti bazitole kuŋanda ya Leza wesu ku Jelusalemu.

Mbubakapilukila ku Jelusalemu

³¹ Mubuzuba bwakkumi aabili bwamwezi mutaanzi twakanyamuka kuzwa kunkolola lya Ahava kuya ku Jelusalemu. Leza wesu wakali aandiswe, wakatukwabilila kuzwa kuli basinkondoma abafumpi munzila. ³² Twakazoosika mu Jelusalemu akulyookezya kwamazuba otatwe. ³³ Mubuzuba bwane, twakeeleka nsiliva, ngolida azibelesyo zisalala muŋanda ya Leza wesu akuzipa kuli Melemati mwana wa Uliya mupaizi. Eliyazaa mwanaa Finehasi nguwakali kumugwasilizya, kubikkilizya a Balevi aaba: Jozabadi mwanaa Jesyuwa a Nowadiya mwanaa Binuyi. ³⁴ Zyoonse zyakabalwa akweelekwa, kumane ciindi nciconya eeco mweelwe wazyo wakalembwa.

³⁵ Lino aabo bakazwa mubwaange bakapa zipaizyo zyakutenta eezi kuli Leza wa Isilayeli, bapoho bali kkumi ababili kwiiminina misyobo ya Isilayeli yoonse, abagutu bali makumi aali fuka acisambomwe, atubelele tweenze tuli makumi aali ciloba aciloba alimwi abasijembwe bakukombelezezya zinyonyoono bali kkumi ababili. Zyoonse zyakali zipaizyo zyakutenta ku Mwami Leza. ³⁶ Bakatola lugwalo oolo lwakazwa kumuleli mupati kuli balupati-pati abeendelezi baminzi iili kumbo lyamulonga wa Yufuletisi, aabo balo bakagwasilizya bantu akugwasya zaku ŋanda ya Leza.