Ezula 6

Lugwalo lwa muleli mupati Sailasi mbulwakajanwa

¹ Mpawo muleli mupati Daliyasi wakalailila kuti balange-lange lugwalo mumabbuku aayo aakali muciyobwedo ku Babuloni. ² Eelyo bakalujana lugwalo oolo mumunzi wa Ekibatana mucisi ca Mediya. Mboobu mbukwakalembedwe mulugwalo oolo.

³ “Mumwaka wakwe wakusaanguna muleli mupati Sailasi,

wakapa malailile aaamba zyaŋanda ya Leza mu Jelusalemu.

Wakati, Ŋanda ya Leza yeelede kuyakululwa mbuli busena bwakupeda zipaizyo akutuuzizya.

Ŋanda eeyo kiilampa kuya mujulu tukokola tuli makumi aali cisambomwe,

abwamba buli tukokola tuli makumi aali cisambomwe.

⁴ Bwaanda bwayakwa atala eeni-eni

bukabe aamundandanda wamapulanga uuti kalazikwe atala amindando yamabwe mapati

yotatwe iili atalaa bwaanda.

Mali aamulimo woonse ooyu akazwe kuciyobwedo cabwami.

⁵ Azyalo zibelesyo zyangolida ansiliva zyakali muŋanda ya Leza

eezyo Nebukadineza nzyaakagwisya kuzwa kuŋanda iili ku Jelusalemu

akuzileta ku Babuloni zyeelede kupilusigwa

alimwi mumasena aazyo muŋanda ya Leza ku Jelusalemu.”

Muleli mupati Daliyasi mbwaakaamba kuti mulimo utaimi

⁶ Daliyasi muleli mupati wakatumya majwi aaya kuli Tatenayi mweendelezi

wakumbo lyamulonga wa Yufuletisi,

Syetaabozenayi abalupati-patinyoko amuzwe ooko,

⁷ mutaingi-ingi mulimo waŋanda ya Leza eeyi pe.

Mweendelezi wa Bajuda abapati babo mbabeelede kuyakulula ŋanda ya Leza

aawo mpoonya mpoyakayakidwe kale.

⁸ Kunze aakooku, ono ndimulailila ncomweelede kucitila bapati ba Bajuda

aaba nibayaka ŋanda eeyi ya Leza.

Mali aakuyasya ŋanda eeyi eelede kuzwa muciyobwedo cabwami

aayo aatelwa abantu bakumbo lyamulonga wa Yufuletisi kutegwa mulimo utaimi.

⁹ Kuzwa buzuba abuzuba amupe bapaizi bali mu Jelusalemu

kufumbwa eezyo nzibabulide tubelele twakupaizya Leza wajulu

naaba maila, munyo, waini, amafuta aaoliva,

¹⁰ kutegwa bakonzye kupa zipaizyo

eezyo zibotelezya kuli Leza wajulu

akukombela buumi bwamwami abana bakwe.

¹¹ Kunze aboobu, mebo lwangu ndalailila

kuti naa umwi avoolozye majwi aangu aaya,

mugwisye musemo waŋanda yakwe alengelele alinguwo.

Mwamana moole ŋanda yakwe ibe citantaala nkaambo kamulandu ooyu.

¹² Leza ulaazina likombelwa kooko

anyonyoone bami nibaba bantu boonse aabo basoleka kuvoolozya majwi aaya

nikuba kunyonyoona ŋanda ya Leza mu Jelusalemu.

Mebo lwangu nde Daliyasi ndime ndalailila boobu.

Mulimo ooyu uucitwe cabunkutwe.

Ŋanda ya Leza yapegwa

¹³ Lino akaambo kamalailile aayo muleli mupati Daliyasi ngaakatumizya,

Tatenayi mweendelezi waminzi iili kumbo lyamulonga wa Yufuletisi,

a Syetaabozenayi abeenzinyina bakabeleka cabunkutwe.

¹⁴ Aboobo bapati ba Bajuda bakayaka,

bakazwidilila kabayumizigwa abasinsimi ba Hagayi a Zekaliya

walunyungu lwa Ido. Bakamana kuyaka ŋanda eeyi

kweendelana abwakalailila Leza wa Isilayeli akulailila kwa baleli bapati ba Sailasi,

Daliyasi a Aatakisesi baleli baku Pesiya.

¹⁵ Ŋanda ya Leza eeyi yakamana mubuzuba bwatatu bwamwezi wa Ada

mumwaka wacisambomwe wakulela kwa Daliyasi.

¹⁶ Mpawo Baisilayeli boonse, bapaizi,

Balevi abamwi bakazwa mubwaange bakasekelela kupegwa kwaŋanda ya Leza cakutangala.

¹⁷ Mukupa ŋanda eeyi kuli Leza,

bakapaizya bapoho bali mwaanda,

bagutu bali myaanda yobilo, atubelele tweenze tuli myaanda yone

kuti zibe cipaizyo cakukombelezezya zinyonyoono,

bakapaizya abasijembwe bali kkumi ababili,

omwe-omwe kwiiminina musyobo wa Baisilayeli.

¹⁸ Bakabikka bapaizi a Balevi mumalizi aabo aakubeleka kuŋanda ya Leza ku Jelusalemu,

mbubonya mbuli mbokulembedwe mubbuku lya Mozesi.

Pobwe lya kwiindilila

¹⁹ Mubuzuba bwakkumi aane bwamwezi mutaanzi, bakazwa mubwaange aabo bakasekelela pobwe lyakwiindilila. ²⁰ Bapaizi boonse a Balevi bakalisalazya lwabo beni, eelyo bakajaila akupaizya baabo bakali baange nkaako bakasalala mumulawo. Balevi bakajaya tubelele twa pobwe lyakwiindilila kujaila baabo bakazwa mubwaange abapaizi lwabo beni. ²¹ Nkaako Baisilayeli aabo bakazwa mubwaange, bakalida antoomwe abaabo bakasiya nzila zyabamasi mbibakali kukkala limwi mukuti bakombe Mwami Leza wa Isilayeli. ²² Kwamazuba aali ciloba bakasekelela pobwe lya cinkwa citakwe mimena cakutangala, nkaambo Mwami Leza wakabatangazya naakacita kuti muleli wa Baasiliya ababede aankumbu, wakabagwasya mumulimo wakuyakulula ŋanda ya Leza wa Isilayeli.