Ezula 3

Mbubakatalika kukomba Leza alimwi

¹ Mumwezi waciloba Baisilayeli kabakkede kale muminzi yabo. Mpoonya boonse bakabungana mu Jelusalemu. ² Mpawo Jesyuwa mwanaa Jozadaki abapaizinyina a Zelubbabeli mwanaa Syeyalitiyeli abeenzinyina bakatalika kuyaka cipaililo ca Leza wa Isilayeli kuti bape zipaizyo zyakutenta alincico kweendelana ambokulembedwe mumulawo wa Mozesi muntu wa Leza. ³ Nikuba kuti bakali kuyoowa bantu bacisi bakabazingulukide, bakayaka cipaililo aawo mpoonya mpucakabede akupa zipaizyo zyakutenta alincico ku Mwami Leza zyacifumo-fumo akumangolezya. ⁴ Lino mbubonya mbuli mbokulembedwe, bakalya pobwe lyazivuka kweendelana amweelwe wazipaizyo zyakutenta zyabuzuba abuzuba. ⁵ Bamane bakapa zipaizyo zyakutenta zyalyoonse azipaizyo zyamwezi mupya alimwi azipaizyo zyoonse zilibedelede eezyo Mwami Leza nzyaakaamba antoomwe azipaizyo zyakuliyandila zipegwa ku Mwami Leza. ⁶ Nikuba kuti bantu tiibakanatalika kuyakulula ŋanda ya Leza, pele bakakonzya kupa zipaizyo zyakutenta ku Mwami Leza mubuzuba butaanzi bwamwezi waciloba.

Mulimo wakuyakulula ŋanda ya Leza mbuwakatalika

⁷ Mpoonya bakavozya bayasya mabwe ababezi mali. Alimwi bakapa zyakulya, zyakunywa amafuta aaoliva kubantu baku Sidoni a Taya kutegwa balo babatumizye mapulanga aamulombe kuzwa ku Lebanoni aayo ngubakainzya mulwizi mane kuzooasisya ku Jopa mbubonya mbuli muleli mupati Sailasi waku Pesiya mbwaakazumizya. ⁸ Nkaako mumwezi wabili mumwaka wabili bantu kabasikide kale kuŋanda ya Leza mu Jelusalemu, Zelubbabeli mwanaa Syeyalitiyeli, Jesyuwa mwanaa Jozadaki antoomwe abeenzinyina kubikkilizya abapaizi a Balevi, abaabo boonse bamwi bakapilukila ku Jelusalemu kuzwa mubwaange, bakatalika mulimo. Bakasala Balevi bakali aamyaka iili makumi obilo naa kwiindilila kuti balange zyakuyakwa kwaŋanda ya Mwami Leza. ⁹ Jesyuwa abana bakwe balombe abana bokwabo a Kadimiyeli abana bakwe, walo abana bakwe uuli ngwalunyungu lwa Hodaviya, abana ba Henadadi antoomwe abana babo abana bokwabo mbabakayaka ŋanda. Balevi boonse mbibakali kubalanga mukuyaka ŋanda ya Leza.

¹⁰ Lino bayaki nibakasya ntalisyo yaŋanda ya Mwami Leza, bapaizi basamide majansi aabo aabupaizi bakaima kabajisi amyeembo, abalo Balevi balunyungu lwa Asafu bakaima kabajisi ansakalala zyabo. Bakatembaula Mwami Leza mbubonya mbuli mbokulembedwe a Devedi mwami wa Isilayeli. ¹¹ Bakaimba kabalumba akutembaula Mwami Leza kuti,

“Mwami Leza mmubotu.

Luyando lwakwe ku Baisilayeli talumani alyoonse.”

Nkabela bantu boonse bakatembaula Mwami Leza cakupozomoka, akaambo kakuti ntalisyo yaŋanda ya Mwami Leza yakasigwa. ¹² Pele bunji bwabapaizi bakaindi a Balevi alimwi abasololi bamikwasyi aabo bakazi ŋanda ya Leza yakusaanguna bakalila kapati nibakabona ntalisyo ya ŋanda ya Leza eeyo yakasigwa. Bamwi babo bakalikondedwe kapati. ¹³ Taakwe naba omwe wakali kukonzya kwaandaanya majwi aakutangala naaba aakulila, nkaambo kakuti bantu bakali kuyoba kapati. Kuyobeka ooku kwakali kumvwigwa akulaale.