Ezula 2

Mweelwe wabaabo bakapilukila ku Jelusalemu

¹ Ooyu ngomweelwe wabantu bakapilukila kuzwa kubwaange, aabo Nebukadineza mwami waku Babuloni mbaakatolede. Bakapilukila ku Jelusalemu a Mujuda umwi aumwi kumunzi wakwe mwini. ² Bantu aaba bakali kusolwedwa a Zelubbabeli, Jesyuwa, Nehemiya, Selaiya, Leelaiya, Modekayi, Bilisyani, Misipa, Bigivayi, Lehumu alimwi a Baana.

Lino ngooyu mundandanda wabaalumi Baisilayeli bakapilukila.

³ Balunyungu lwa Palosyi bakali zyuulu zyobilo amwaanda amakumi aali ciloba ababili, ⁴ lwa Syefatiya bakali myaanda yotatwe amakumi aali ciloba ababili, ⁵ lwa Ala bakali myaanda iili ciloba amakumi aali ciloba abasanu, ⁶ lwa Pahatimowabu kwiindila muzyalani lya Jesyuwa a Jowabu bakali zyuulu zyobilo amyaanda iili lusele akkumi ababili, ⁷ lwa Elamu bakali cuulu amyaanda yobilo amakumi osanwe abane, ⁸ lwa Zatu bakali myaanda iili fuka amakumi one abasanu, ⁹ lwa Zakayi bakali myaanda iili ciloba amakumi aali cisambomwe, ¹⁰ lwa Bani bakali myaanda iili cisambomwe amakumi one ababili, ¹¹ lwa Bebayi bakali myaanda iili cisambomwe amakumi obilo abatatu, ¹² lwa Azigadi bakali cuulu amyaanda yobilo amakumi obilo ababili, ¹³ lwa Adonikamu bakali myaanda iili cisambomwe amakumi aali cisambomwe acisambomwe, ¹⁴ lwa Bigivayi bakali zyuulu zyobilo amakumi osanwe acisambomwe, ¹⁵ lwa Adini bakali myaanda yone amakumi osanwe abane, ¹⁶ lwa Ata kwiindila muli Hezekiya bakali makumi aali fuka alusele, ¹⁷ lwa Bezayi bakali myaanda yotatwe amakumi obilo abatatu, ¹⁸ lwa Jola bakali mwaanda akkumi ababili, ¹⁹ lwa Hasyumu bakali myaanda yobilo amakumi obilo abatatu, ²⁰ lwa Gibbaa bakali makumi aali fuka abasanu.

²¹ Baalumi bakali kuzwa ku Betelehemu bakali mwaanda amakumi obilo abatatu, ²² ku Netofa bakali makumi osanwe acisambomwe, ²³ ku Anatoti bakali mwaanda amakumi obilo alusele, ²⁴ ku Azimaveti bakali makumi one ababili, ²⁵ ku Kiliyatijeyalimu, Kefila, aku Beeloti bakali myaanda iili ciloba amakumi one abatatu, ²⁶ ku Lama a Geba bakali myaanda iili cisambomwe amakumi obilo aumwi, ²⁷ ku Nikimasyi bakali mwaanda amakumi obilo ababili, ²⁸ ku Beteli a Ayi bakali myaanda yobilo amakumi obilo ababili, ²⁹ ku Nebo bakali makumi osanwe ababili, ³⁰ ku Magibisyi bakali mwaanda amakumi osanwe acisambomwe. ³¹ Baalumi bakali kuzwa kumunzi umwi wa Elamu bakali cuulu amyaanda yobilo amakumi osanwe abane, ³² ku Halimu bakali myaanda yotatwe amakumi obilo, ³³ ku Lodi, Hadidi aku Ono bakali myaanda iili ciloba amakumi obilo abasanu, ³⁴ ku Jeliko bakali myaanda yotatwe amakumi one abasanu, ³⁵ ku Senaa bakali zyuulu zyotatwe amyaanda iili cisambomwe amakumi otatwe.

³⁶ Bapaizi balunyungu lwa Jedaiya kwiindila muli Jesyuwa bakali myaanda iili fuka amakumi aali ciloba abatatu, ³⁷ lwa Ima bakali cuulu amakumi osanwe ababili ³⁸ lwa Pasyuu bakali cuulu amyaanda yobilo amakumi one aciloba, ³⁹ lwa Halimu bakali cuulu akkumi aciloba.

⁴⁰ Balevi balunyungu lwa Jesyuwa a Kidimiyeli kwiindila muzyalani lya Hodaviya bakali makumi aali ciloba abane. ⁴¹ Baimbi balunyungu lwa Asafu bakali mwaanda amakumi obilo alusele.

⁴² Bakali balindizi baamilyango ya ŋanda ya Leza, balunyungu lwa Syalumu, Ata, Talimoni, Akubu, Hatita a Syobayi bakali mwaanda amakumi otatwe afuka.

⁴³ Babelesi bakuŋanda ya Leza bakali balunyungu lwa Ziha, Husufa, Tabawoti, ⁴⁴ Kelosi, Siyaha, Padoni, ⁴⁵ Lebana, Hagaba, Akubu, ⁴⁶ Hagaba, Syalimayi, Hanani, ⁴⁷ Gideli, Gaha, Leyaiya, ⁴⁸ Lezini, Nekoda, Gazamu, ⁴⁹ Uza, Paseya, Besayi, ⁵⁰ Asina, Meyunimu, Nefusimu, ⁵¹ Bakibuki, Hakufa, Haahuu, ⁵² Baziluti, Mehida, Haasya, ⁵³ Baakosi, Sisela, Tema, ⁵⁴ Neziya a Hatifa.

⁵⁵ Lunyungu lwababelesi ba Solomoni bakali ba Sotayi, Hasofeleti, Peluda, ⁵⁶ Jaala, Daakoni, Gideli, ⁵⁷ Syefatiya, Hatili, Pokeletihazebaimu a Ami. ⁵⁸ Antoomwe babelesi bakuŋanda ya Leza abalunyungu lwa babelesi ba Solomoni bakali myaanda yotatwe amakumi aali fuka ababili.

⁵⁹ Aabo bakazwa kuminzi ya Telimela, Telihaasya, Kelubu, Adani a Ima, batakali kukonzya kutondezya kuti bakali Baisilayeli ncobeni, ⁶⁰ mbalunyungu lwa Delaiya, Tobiya a Nekoda, antoomwe bakali myaanda iili cisambomwe amakumi osanwe ababili.

⁶¹ Kuzwa kubapaizi balunyungu lwa Habaiya, Hakozi a Baazilayi wakali kwiitwa boobo akaambo kakuti wakakwata mwanaa Baazilayi Mugiliyadi, ⁶² bakasola kulangaula mumabbuku aamikwasyi aakonzya kutondezya kuti mbapaizi ncobeni, pele tiibakaajana, aabo bakagwisigwa muciinga cabupaizi mbuli bantu batasalali. ⁶³ Nkaako mweendelezi wakabalailila kuti kabatalyi zipaizyo zyeelede bapaizi ccita kakuli mupaizi uujisi Ulimu a Tumimu.

⁶⁴ Lino mweelwe wabantu bakapiluka kuzwa mubwaange wakali zyuulu zili makumi one azibili amyaanda yotatwe amakumi cisambomwe. ⁶⁵ Babelesi babo baalumi abakaintu bakali zyuulu zili ciloba amyaanda yotatwe amakumi otatwe aciloba. Alimwi kwakali abaimbi baalumi abakaintu bali myaanda yobilo. ⁶⁶ Bakaletelezya amabbiza aali myaanda iili ciloba amakumi otatwe acisambomwe, myuulu zyakali myaanda yobilo amakumi one aasanu, ⁶⁷ nkamela zili myaanda yone amakumi otatwe azisanu, ambongolo zili zyuulu zili cisambomwe amyaanda iili ciloba amakumi obilo.

⁶⁸ Ciindi nibakasika kuŋanda ya Mwami Leza ku Jelusalemu, bamwi basololi bamikwasyi bakapa zipego zyakuliyandila zyakugwasilizya kuyakulula ŋanda ya Leza mubusena bwayo. ⁶⁹ Bakapa mbubakali kukonzya kumulimo ooyu cakuti kwakajanika madulakimu aangolida aali zyuulu zili makumi aali cisambomwe acimwi, maminasi aansiliva aali zyuulu zyosanwe, amajansi aabupaizi aali mwaanda. ⁷⁰ Bapaizi, Balevi, baimbi, balindizi baamilyango ababelesi baku ŋanda ya Leza bakakkala muminzi yabo beni abantu bamwi. Abalo Baisilayeli bamwi bakakkala muminzi yabo.