Ezula 1

Sailasi walailila kuti Bajuda bapilukile

¹ Mumwaka wakusaanguna wakulela kwa Sailasi muleli mupati waku Pesiya, Mwami Leza wakazuzikizya majwi aakwe, aakakananwa a Jelemiya. Wakacitya kuti Sailasi mwami waku Pesiya aambilizye mubulelo bwakwe boonse mulumbe ooyu wapegwa mubulembe,

² “Mboobu mbwaamba Sailasi muleli mupati waku Pesiya, Mwami Leza wajulu wandipa kuti ndele nyika yoonse alimwi wandipa amulimo wakuyaka ŋanda yakwe mu Jelusalemu mucisi ca Juda. ³ Mwami Leza abe aandinywe nobantu bakwe. Amupilukile ku Jelusalemu mukayakulule ŋanda ya Mwami Leza wa Isilayeli ooyo uukombwa mu Jelusalemu. ⁴ Bantu bali mumasena aayo mukkede baabo basyeede ba Mwami Leza baleelede kubapa nsiliva angolida, zintu azivubwa, alimwi azipaizyo zyakuliyandila zyalo ziyoopaizigwa ku Mwami Leza mu Jelusalemu.”

⁵ Aawo basololi baziinga zyabantu ba Juda aba Benjamini, bapaizi a Balevi abaabo boonse Leza mbaakasungula mumoyo bakalibambila kuti bainke kuyooyaka ŋanda ya Mwami Leza mu Jelusalemu. ⁶ Basimunzinyina bakabagwasya mukubapa zintu eezi: nsiliva, ngolida, zintu zivubwa alimwi azimwi ziyandisi. Atala aazeezi bakabapa azipaizyo zyakuliyandila.

⁷ Kunze aakooku muleli mupati Sailasi wakabapilusizya zibelesyo zyamuŋanda ya Mwami Leza, eezyo Nebukadineza nzyaakaseede kuzwa ku Jelusalemu akuzibikka mucikombelo caleza wakwe. ⁸ Sailasi wakazipa kuli Mitiledati mulangi waciyobwedo cabwami, ooyu wakazibalila Syesyibaza mweendelezi wacisi ca Juda. ⁹ Mboobu mbuzyakabede: mitiba yangolida yakupaizizya yakali makumi otatwe, mitiba yansiliva yakupaizizya yakali cuulu, mitiba imwi yansiliva yakali makumi obilo afuka, ¹⁰ mitiba meelela yangolida yakali makumi otatwe, mitiba meelela yansiliva yakali myaanda yone akkumi, azibelesyo zimwi zyakali cuulu.

¹¹ Antoomwe kwakali zibelesyo zyangolida ansiliva zili zyuulu zyosanwe amyaanda yone. Ciindi baange nibakapilukila ku Jelusalemu kuzwa ku Babuloni Syesyibaza wakaziletelela zintu eezi.