Ezekiyeli 48

Kwaapaulwa kwanyika

¹ Njeeyi misyobo iilembedwe kwiindila mumazina aayo. Kumagolelo aamunyinza wakunyika, Badani bayoopegwa caabilo, munyinza wabo uyootobelezya mugwagwa wa Hetiloni kuyoosika ku Lebohamati, ngooyo ku Hazeeanani, munyinza wakunyika ku Damasikasi uyooba cibeela camunyinza wayo kuzwa kulubazu lwakujwe mane kuyoosika kulubazu lwakunyika.

² Baasya, bayoopana munyinza anyika ya Badani kuzwa kujwe kuyoosika kumbo.

³ Banafutali bayoopana munyinza anyika ya Baasya kuzwa kujwe kuyoosika kumbo.

⁴ Bamanase bayoopana munyinza anyika ya Banafutali kuzwa kujwe kuyoosika kumbo.

⁵ Baefulemu bayoopana munyinza anyika ya Bamanase kuzwa kujwe kuyoosika kumbo.

⁶ Balubeni bayoopana munyinza anyika ya Baefulemu kuzwa kujwe kuyoosika kumbo.

⁷ Bajuda bayoopana munyinza anyika ya Balubeni kuzwa kujwe kuyoosika kumbo.

⁸ Kubambana acisi ca Juda kuzwa kujwe kuyoosika kumbo caabilo eeco ciyooba cipego cilibedelede. Mubwamba cinoolampa tukokola tuli zyuulu zili makumi obilo azisanu, bulamfu bwaco kuzwa kujwe kuyoosika kumbo, buyooelana azyaabilo zyamisyobo, busena buyakidwe ŋanda ya Leza bwalo bunooli akati.

⁹ Caabilo canyika cakuliyandila eeco ncoyanda kupa ku Mwami Leza kaciyoolampa tukokola tuli zyuulu zili makumi obilo azisanu, mubwamba kacili tukokola tuli zyuulu zili kkumi. ¹⁰ Eeci ciyooba caabilo cisalala cabapaizi. Cinoolampa tukokola tuli zyuulu zili makumi obilo azisanu kulubazu lwakunyika, mubwamba kulubazu lwakumbo kacili tukokola tuli zyuulu zili kkumi, mubulamfu kacinooli tukokola tuli zyuulu zili makumi obilo kulubazu lwakujwe, kulubazu lwakumusanza kacili tukokola tuli zyuulu zili makumi osanwe azisanu. Akati kaco mpaanooli busena busalala bwa Mwami Leza. ¹¹ Eeci ciyooba cabapaizi basalala, baciinga ca Zadoki, aabo bakali kundikutaukila cakusyomeka, tiibakaleya mbuli bwakacita Balevi beenzinyina ciindi Baisilayeli nibakaleya. ¹² Ciyooba cipego cilibedelede kulimbabo kuzwa kucaabilo cisalala canyika, caabilo cisalalisya ciyoopana munyinza anyika ya Balevi.

¹³ Cinoobambene anyika yabapaizi Balevi bayoopegwa caabilo cili tukokola tuli zyuulu zili makumi obilo, mubwamba cakali tukokola tuli zyuulu zili kkumi. Bulamfu bwaco bunooli tukokola tuli zyuulu zili makumi obilo azisanu, bwamba bwaco bunooli tukokola tuli zyuulu zili kkumi. ¹⁴ Tabeelede kucuuzya nokuba kucincanya cipaanzi nociba buti mulincico pe. Eeci ncibeela canyika cibotu kwiindilila, nkaako taceelede kupegwa kubantu bambi pe, nkaambo cilasalala ku Mwami Leza.

¹⁵ Busena busyeede bwabwamba buli tukokola tuli zyuulu zyosanwe, bulamfu bwabo bwakali tukokola tuli zyuulu zili makumi obilo azisanu, buyooba busena bwabantu buyo mumunzi, bwakuyaka maanda abwamacelelo. Munzi uyooba akati kabo, ¹⁶ nkabela unoolampa boobu, kulubazu lwakunyika unoolampa tukokola tuli zyuulu zyone amyaanda yosanwe, kulubazu lwakumusanza unooli tukokola tuli zyuulu zyone amyaanda yosanwe, lubazu lwakujwe unooli tukokola tuli zyuulu zyone amyaanda yosanwe, kulubazu lwakumbo unoolampa tukokola tuli zyuulu zyone amyaanda yosanwe. ¹⁷ Macelelo aamunzi anooli tukokola tuli myaanda yobilo amakumi osanwe, kulubazu lwakunyika akumusanza anooli tukokola tuli myaanda yobilo amakumi osanwe, kujwe anooli tukokola tuli myaanda yobilo amakumi osanwe, kumbo anooli tukokola tuli myaanda yobilo amakumi osanwe. ¹⁸ Busena busyaala, bupana munyinza acaabilo cisalala bweelane mubulamfu bwabo, bunooli tukokola tuli zyuulu zili kkumi kulubazu lwakujwe, kulubazu lwakumbo bunooli tukokola tuli zyuulu zyosanwe. Nkabela eezyo ziyootebulwa moomo ziyooba zilyo zyababelesi bamunzi. ¹⁹ Babelesi bamunzi aabo banoolima bakazwe mumisyobo yoonse ya Isilayeli. ²⁰ Caabilo coonse cinooelene mumabazu oonse cinooli tukokola tuli zyuulu zili makumi obilo azisanu. Kuti cibe cipego cilibedelede, mweelede kuyoozandula busena busalala, antoomwe alubono lwamunzi.

²¹ Eeco ciyoosyaala kumabazu oonse obilo abusena oobu bwacaabilo cisalala acalubono lwamunzi cinooli camuleli. Kuzwa kubwamba bwatukokola tuli zyuulu zili makumi obilo azisanu bwacaabilo cisalala kusikila kumunyinza wakujwe, akuzwa kubwamba bwakumbo bwatukokola tuli zyuulu zili makumi obilo kusikila kumunyinza wakumbo, nyika iibambene azyaabilo zyamisyobo yoonse iyooba yamuleli, nkabela caabilo cisalala cijisi busena busalala bwaŋanda ya Leza bunooli akati kawo. ²² Nkaako nyika ya Balevi anyika yamunzi inooli akati kanyika yamuleli. Nyika yamuleli inooli akati kamunyinza wa Bajuda amunyinza wa Babenjamini.

²³ Misyobo imwi yoonse itambule caabilo comwe-comwe kutalikila kunyika kusikila kujwe caabilo cakusaanguna cibe ca Benjamini.

²⁴ Basimiyoni banoopana munyinza anyika ya Babenjamini kuzwa kujwe kuyoosika kumbo.

²⁵ Baisakaa banoopana munyinza anyika ya Basimiyoni kuzwa kujwe kuyoosika kumbo.

²⁶ Bazebuluni banoopana munyinza anyika ya Baisakaa kuzwa kujwe kuyoosika kumbo.

²⁷ Bagadi banoopana munyinza anyika ya Bazebuluni kuzwa kujwe kuyoosika kumbo.

²⁸ Munyinza wa Bagadi nkuuli kumusanza uyoobambalika kuzwa ku Tamaa kuyoosika kumaanzi aaku Melibakadesyi, mane ngooyo uyootobelezya kalonga ka Ijipiti mane kuyoosika mu Lwizi Lupati.

²⁹ Eeyi njenyika njooyoopa misyobo ya Isilayeli kuti ibe lukono lwabo, eezi ziyooba nzezyaabilo zyabo, mbwaamba Mwami Leza.

Milyango ya Jelusalemu

³⁰ Njeeyi milyango kutalikila kulubazu lwakunyika kulampa tukokola tuli zyuulu zyone amyaanda yosanwe, ³¹ milyango yamunzi inooitwa amaziba aamisyobo ya Isilayeli. Milyango yotatwe iili kulubazu lwakunyika inooli mulyango wa Lubeni, wa Juda amulyango wa Levi.

³² Kulubazu lwakujwe, kulampa tukokola tuli zyuulu zyone amyaanda yosanwe, kunooli milyango yotatwe, mulyango wa Josefa, wa Benjamini awa Dani.

³³ Kulubazu lwakumusanza kulampa tukokola tuli zyuulu zyone, kunooli milyango yotatwe, mulyango wa Simiyoni, wa Isakaa awa Zebuluni.

³⁴ Kulubazu lwakumbo, kulampa tukokola tuli zyuulu zyone amyaanda yosanwe, kunooli milyango yotatwe wa Gadi, wa Asya awa Nafutali.

³⁵ Bulamfu boonse kubuzinguluka unoolampa tukokola tuli zyuulu zili kkumi alusele. “Kuzwa leelyo zina lyamunzi linootegwa, Mwami Leza mwabede oomo.”