Ezekiyeli 47
Mulonga uuzwa muŋanda ya Leza
1 Lino muntu ooyo wakandipilusya kumanjililo aaŋanda ya Leza eelyo ndakabona maanzi kaazwa ansi lyacikunguzyo caŋanda ya Leza kuya lwaajwe, mukuti ŋanda ya Leza yakalangide kujwe. Maanzi akali kuzwida ansi kulubazu lwakumusanza lwaŋanda ya Leza, kumusanza lyacipaililo. 2 Mpawo wakandigwisizya kumulyango wakunyika akundeenzeenzya anze lyamulyango waanze uulangide kujwe, maanzi akali kukunka kuzwa kulubazu lwakumusanza.
3 Lino muntu ooyu naakainka lwakujwe kajisi akatambo kakweelesya, wakeeleka busena bulampa tukokola tuli cuulu, mane wakandiinzya mumaanzi aatanwa munungo. 4 Alimwi wakeeleka busena bulampa tukokola tuli cuulu akundiinzya mumaanzi aatana mumagondo. Wakeeleka alimwi buli tukokola tuli cuulu akundiinzya mumaanzi aasika mucibuno. 5 Wakeeleka alimwi tukokola tuli cuulu, pele lino wakaba mulonga ooyo ngundatakali kukonzya kuzubuka, nkaambo maanzi akalifutide, wakali ampisi cakuti muntu inga takonzyi kuyamba, wakali mulonga wakuti muntu takonzyi kuzubuka. 6 Wakandibuzya kuti, “Yebo omuntu, sena ulicibwene eeci?” Amane wakandipilusya kunkomwe yamulonga. 7 Nindakaakusika kuya, ndakabona masamu manji kunkomwe zyamulonga zyoonse zyobilo. 8 Wakati kulindime, “Maanzi aaya akunkila kucisi cakujwe mane ngaayo alasika Kulwizi Lufwide oomo mwaayoonjila mulwizi. Anjila buyo mulwizi, maanzi inga abatama, taacibyuuki. 9 Zilenge zinji zipona zilakonzya kukkala kufumbwa ooko mulonga nkuukunkila. Kuyooba nswi zinji, nkaambo maanzi aaya nkwaakunkila ayoocita kuti maanzi aabyuuka abote, nkaako kufumbwa mulonga ooyu nkuukunkila zintu zyoonse ziyoopona. 10 Bazubi banswi bayoondandama ankomwe yamulonga, kuzwa ku Engedi kuyoosika ku Enegilaimu kuyooba masena aakukwapamika tunyandi. Inswi zinooli zyamisyobo-misyobo mbubonya mbuli nswi zyalwizi lupati. 11 Pele maanzi aamantolo taakaboti, anoobyuuka. 12 Masamu oonse aazyala micelo yamisyobo-misyobo ayookomena munsi ankomwe zyamulonga zyoonse zyobilo. Matu aayo taakapusami, taakwe naayooleka kuzyala pe. Mwezi amwezi anoozyala, nkaambo maanzi aazwa mubusena busalala akunkila mulingawo. Micelo yayo iyooba ncecilyo, matu aayo ngakusilisya.”
Minyinza yanyika
13 Mboobu mbwaamba Mwami Leza ulati, “Njeeyi minyinza eeyo njomweelede kwaapauzya nyika kuti ibe lukono akati kamisyobo iili kkumi aibili ya Isilayeli, bamusyobo wa Josefa bapegwe zyaabilo zyobilo. 14 Mweelede kwiiapaula cakweelanya akati kabo. Akaambo kakuti ndakatambika kujulu nindakakonkezya kuti njooipa basikale banu, nyika eeyi iyooba lukono lwanu. 15 Mboobu munyinza wanyika mbuunobede. Kulubazu lwakunyika unoozwa kulwizi lupati, unooinda mumugwagwa waku Hetiloni akuyooinda ku Lebohamati kuyoosika ku Zedadi, 16 ku Belota aku Sibulaimu, munzi uuli mumunyinza uulaakati kamunzi wa Damasikasi awa Hamati mane kuyoosika ku Hazahatikoni kumunyinza wa Haulani. 17 Munyinza uyooindilila kuzwa kulwizi kuyoosika ku Hazeeanani kulubuwa lwamunyinza lwa Damasikasi kunyika, uuswaangene amunyinza wa Hamati nkoili kunyika. Oobu mbuubede munyinza wakunyika.
18 “Kulubazu lwakujwe munyinza uyooinda akati ka Haulani a Damasikasi, kutobelezya mulonga wa Jolodani akati ka Giliyadi anyika ya Isilayeli, mane kuyoosika kulwizi akuyoosika ku Tamaa. Oobu mbuubede munyinza wakujwe.
19 “Kulubazu lwakumusanza munyinza uyoozwida ku Tamaa mane kuyoosika kumaanzi aaku Meliba Kadesyi, wamana uyootobelezya kalonga ka Ijipiti mane kuyoosika kulwizi lupati. Oobu mbuubede munyinza wakumusanza.
20 “Kulubazu lwakumbo, Lwizi Lupati luyooba ngomunyinza mane kuyoosika ampa kulangana a Lebohamati. Oobu mbuubede munyinza wakumbo.
21 “Mweelede kwaabana nyika eeyi akati kanu kweendelana amisyobo ya Isilayeli. 22 Mweelede kwaapawidana nyika eeyi kuti ibe lukono lwanu antoomwe abazwakule aabo bakkede andinywe bajisi bana. Mweelede kubayeeya kuti mbazyale mucisi ca Baisilayeli, beelede kupegwa lukono antoomwe andinywe akati kamisyobo ya Isilayeli. 23 Kufumbwa mumusyobo muzwakule ooyo mwaakkala, mweelede kumupa lukono lwakwe, mbwaamba Mwami Leza.”