Ezekiyeli 46
Zyamaila azyamapobwe
1 Mboobu mbwaamba Mwami Leza ulati, “Mulyango walubuwa lwamukati uulangide kujwe weelede kuti kuujedwe kwamazuba aali cisambomwe, pele mubuzuba bwa Sabata, amubuzuba likkala mwezi weelede kujalulwa. 2 Muleli weelede kunjila kwiinda mukkoce lyamulyango akuyooima kumbali aazicinda zyamulyango. Bapaizi beelede kupaizya zipaizyo zyakwe zyakutenta azyalumvwano. Weelede kukomba kumbali aacikunguzyo camulyango, amana azwe, pele mulyango tuuelede kujalwa mane kusikila kumangolezya. 3 Mumazuba aamasabata, alikkala mwezi bantu bamunyika beelede kukomba kumbele lya Mwami Leza kumanjililo aamulyango. 4 Cipaizyo cakutenta eeco muleli ncaleta ku Mwami Leza mubuzuba bwa Sabata ntubelele tuli cisambomwe amugutu omwe, zyoonse eezi kazitakwe kampenda. 5 Cituuzyo camaila cipegwa antoomwe amugutu ceelede kuba cisuwo comwe, cituuzyo camaila cipegwa antoomwe atubelele ceelede kuba mbuli mbwayanda mwini, weelede kupa antoomwe alufulu lwamafuta kucisuwo comwe-comwe. 6 Mubuzuba likkala mwezi weelede kupa kapoho komwe, tubelele tuli cisambomwe amugutu omwe, zyoonse eezi kazitakwe kampenda. 7 Weelede kupa cisuwo comwe camaila kumupoho omwe, cisuwo comwe kumugutu, kuli catubelele weelede kuti ape mbuli mbwayanda, ape antoomwe alufulu lwamafuta kucisuwo comwe-comwe. 8 Muleli nanjila weelede kuti ainde mukkoce lyamulyango weelede kuti azwe ainde amulyango nguwenya ooyo.
9 “Bantu bamunyika baakubungana kumbele lya Mwami Leza kumapobwe aabikkidwe aaya, kufumbwa ooyo uuyoonjilila kumulyango wakunyika kuzookomba weelede kuti azooinde kumulyango wakumusanza, kufumbwa ooyo uunjilila kumulyango wakumusanza weelede kuti azwide kuli wakunyika. Taakwe weelede kuzwida amulyango ooyo ngwaanjilila, pele weelede kuzwida kuli uumbi. 10 Muleli weelede kuti kali akati kabo, weelede kunjila kunjilila bantu akuzwa nkobazwida.
11 “Ciindi camapobwe aaziindi zimwi zibikkidwe, cituuzyo camaila ceelede kuzula cisuwo kumupoho omwe, cisuwo comwe kumugutu omwe, kutubelele muntu weelede kuti ape mbuli mbwayanda mwini, ape antoomwe alufulu lwamafuta kucisuwo comwe-comwe. 12 Ciindi muleli napa cipaizyo cakuliyandila ku Mwami Leza, naa kucili cipaizyo cakutenta naa zyalumvwano, weelede kujalwidwa mulyango uulangide kujwe. Nanga wapa cipaizyo cakwe cakutenta noziba zipaizyo zyalumvwano mbubonya mbwacita mubuzuba bwa Sabata. Eelyo inga wazwa, lino azwa buyo, mulyango weelede kujalwa.”
Zipaizyo zyabuzuba abuzuba
13 Buzuba abuzuba kweelede kupegwa kabelele katakwe kampenda kuti kabe kacipaizyo cakutenta ku Mwami Leza, mweelede kuti kamupa cifumo-fumo cili coonse. 14 Ncomweelede kupedelezya cifumo-fumo cili coonse cacisambomwe cacisuwo acipaanzi catatu calufulu lwamafuta aakuvwelanya busu bunante. Kupa cituuzyo camaila eeci ku Mwami Leza malailile aatakamani. 15 Mbombuboobu kabelele, cituuzyo camaila amafuta mbozyeelede kunoopegwa cifumo-fumo cili coonse kuti cibe cipaizyo cakutenta lyoonse.
Zyamuleli anyika
16 Mboobu mbwaamba Mwami Leza ulati, “Kuti naa muleli wapa umwi wabana bakwe balombe cipego kuzwa kulukono lwakwe, nkokuti eeco ciyooba cabalunyungu lwakwe, ciyooba cintu cabo kwiindila mukukona. 17 Pele kuti naa wapa umwi wababelesi bakwe cipego kuzwa mulukono lwakwe, mubelesi ooyo weelede kucibamba mane do kuyoosikila mumwaka walwaangunuko, ndendilyo nociyoobweeda kumuleli. Lukono lwakwe ndwabana bakwe balombe balo, ncicabo. 18 Muleli teelede kutola lukono lwabantu noluba buti mukubatanda mubusena bwabo. Weelede kupa bana bakwe lukono lwabo kuzwa muzintu zyakwe mwini, kutegwa kaatakwe muntu wangu naba omwe uunga wagwisigwa kuzwa mubusena bwakwe.”
19 Mpawo muntu ooyo wakandiinzya kumanjililo aalubazu lwamulyango uuli aafwiifwi atwaanda tusalala tulangide kunyika, twabapaizi. Wakanditondezya busena bumwi buli lwaambo. 20 Wakati kulindime, “Oobu mbobusena bapaizi mbobanoojikila zyazipaizyo zyamilandu azyakukombelezezya zinyonyoono akunookanga zituuzyo zyamaila, kutegwa kabatazileti mulubuwa lwaanze mukuti inga bantu balaba nobaguma zisani zisalala eezyo.”
21 Amane aawo wakandileta kulubuwa lwaanze akundeenzeenzya muzyooko zyone, lino ndakabona kuti mucooko comwe-comwe kwakali alumwi lubuwa. 22 Muzyooko zyone eezyo zyalubuwa lwaanze kwakali mbuwa mukati, kazilampa tukokola tuli makumi one, mubwamba kazilampa tukokola tuli makumi otatwe, lubuwa lomwe-lomwe muzyooko zyone lwakaleelene. 23 Mukati kambuwa zyone kwakali mindando yamabwe, kamuli zikko zyakayakidwe koonse-koonse munsi aamundando. 24 Wakati kulindime, “Aaya ngamaanda aakujikila oomo bantu aabo bakutauka muŋanda ya Leza mobanoojikila zipaizyo zipa bantu.”