Ezekiyeli 45
Caabilo canyika ca Mwami Leza
1 Waakwaapaula nyika kuti ibe lukono, weelede kuyoopa caabilo canyika ku Mwami Leza kuti cibe cibeela cisalala, mubulamfu kaciyoolampa tukokola tuli zyuulu zili makumi obilo azisanu, bwaasa bube zyuulu zili makumi obilo, cibeela coonse cinoosalala. 2 Mucaabilo eeci, cipaanzi ceelene koonse-koonse catukokola tuli myaanda yosanwe ciyooba cabusena busalala, kuyooba busena bukkede buyo bweelene bwatukokola tuli makumi osanwe koonse-koonse. 3 Mucibeela canyika cisalala, weeleke busena bulampa tukokola tuli zyuulu zili makumi obilo azisanu, mubwamba, kaciyooli tukokola tuli zyuulu zili kkumi. Mulincico momuyooyakwa busena busalala, abusena busalalisya. 4 Ciyooba caabilo cisalala cabapaizi aabo bakutauka mubusena busalala akukutauka kumbele lya Mwami Leza. Buyooba busena bwabo bwakuti bakayake maanda, alimwi bunooli busena busalala bwaŋanda ya Leza. 5 Busena bulampa tukokola tuli zyuulu zili makumi obilo azisanu, bujisi bwamba buli tukokola tuli zyuulu zili kkumi bunooli bwa Balevi, aabo babeleka muŋanda ya Leza kuti bube caabilo caminzi yabo yakukkala.
6 Munzi weelede kuupa busena bulampa tukokola tuli zyuulu zyosanwe mubwamba, mubulamfu kabulampa tukokola tuli zyuulu zili makumi obilo azisanu, bunooyooswaangane acibeela cisalala, bunooli bwamusyobo woonse wa Isilayeli.
7 Mulevi unoojisi nyika iinoogolela mucibeela cacaabilo cisalala acabusena bwamunzi. Nyika eeyo inootalikila amunyinza wabusena busalala nkobuli kumbo kuyoosika kulwizi, akwalo kujwe inootalikila amunyinza wabusena busalala kuyoosika kugolela cisi. 8 Nyika eeyi iyooba ndolukono lwakwe mu Isilayeli. Baleli bangu tabaciyoodyaminini limbi bantu bangu, pele bayoozumizya musyobo wa Isilayeli kuti ukabe anyika kweendelana aziinga zyabo.
Milawo yamuleli
9 Mboobu mbwaamba Mwami Leza ulati, “Mwaindilizya kaka nobaleli ba Isilayeli! Amuleke lutuzi akudyaminina, mucite ziluzi, zilondokede. Amuleke kunyanga bantu bangu zyaabilo zyabo, mbwaamba Mwami Leza. 10 Mweelede kunoobelesya zipimyo zibotu, cisuwo cibotu antumba mbotu. 11 Cisuwo antumba zyeelede kuti kazyeelene, ntumba iijisi cipaanzi cakkumi canongo, cisuwo acipaanzi cakkumi canongo nzezyeelede kubelesegwa kuli zyoonse zyobilo. 12 Syekeli lyomwe lyeelede kuti kalijisi magela aali makumi obilo. Masyekeli aali makumi obilo kusanganya amasyekeli aali makumi obilo aasanu, kusanganya amasyekeli aali kkumi aasanu ngaazulizya mina lyomwe.
13 “Nceeci cipego cilibedelede ncomweelede kupa. Cipaanzi cacisambomwe cacisuwo kuzwa munongo yamaila, acipaanzi cacisambomwe kuzwa munongo yamaila amwi. 14 Mafuta aaya aabambidwe aaelekelwe munongo acipaanzi cakkumi cantumba eelede kuti kaazuzya mpali zili kkumi, noiba nongo yomwe nkaambo mpali zili kkumi zyakateelane anongo yomwe. 15 Mweelede kugwisya mbelele yomwe kuzwa mubutanga bwamyaanda yobilo kaili mbelele mbotu iizwa mu Isilayeli. Eezi ziyooba zyacipaizyo camaila, zyacipaizyo cakutenta azyalumvwano kuti bantu bakombelezezegwe zinyonyoono zyabo, mbwaamba Mwami Leza. 16 Bantu boonse bamucisi beelede kuyoopa cipego cilibedelede eeci kumuleli wa Isilayeli kuti acibelesye. 17 Unooli mulimo wamuleli kuti kapa zipaizyo zyakutenta, zyamaila azyazyakunywa ciindi camapobwe aakukkala kwamyezi amasabata, kumapobwe oonse aabikkidwe aamusyobo wa Isilayeli. Uyoopa zyakupaizya zyakukombelezezya cinyonyoono, zyamaila zyakutenta azyalumvwano kuti akombelezezye zinyonyoono zyamusyobo wa Isilayeli.”
Zyamapobwe
18 Mboobu mbwaamba Mwami Leza ulati, “Mumwezi mutaanzi mubuzuba butaanzi mweelede kubweza kapoho katakwe kampenda musalazye busena busalala. 19 Mupaizi weelede kuti abweze bulowa bumwi bwacipaizyo cakukombelezezya zinyonyoono akububikka azikunguzyo zyaŋanda ya Leza, muzyooko zyone zyalumpimpito lwacipaililo aazicinda zyaamilyango yalubuwa lwamukati. 20 Weelede kuyoocita mbubonya oobo mubuzuba bwaciloba bwamwezi kucitila uuli woonse uubisya cakutacita caali nokuba cakutaziba, mbombuboobu mbweelede kusalazya ŋanda ya Leza.
21 “Mumwezi mutaanzi mubuzuba bwakkumi aane mweelede kuyoolya pobwe lya Kwiindilila, pobwe liligwa mazuba aali ciloba, ciindi nomulya zinkwa zitakwe mimena. 22 Mubuzuba oobo muleli weelede kupa mupoho kuti abe wacipaizyo cakukombelezezya zinyonyoono zyakwe mwini azyabantu boonse bamunyika. 23 Buzuba abuzuba mumazuba aayo aali ciloba aapobwe eeli, weelede kupa bapoho bali ciloba abagutu bali ciloba batakwe kampenda kuti cibe cipaizyo cakutenta ku Mwami Leza, asijembwe omwe wacipaizyo cakukombelezezya zinyonyoono. 24 Weelede kupa cituuzyo camaila cizula cisuwo kumupoho omwe-omwe, acisuwo kumugutu omwe-omwe antoomwe alufulu lwamafuta kucisuwo comwe-comwe. 25 Mumazuba aayo aali ciloba aapobwe litalika mumwezi waciloba mubuzuba bwakkumi aasanu, weelede kupa mbubonya kuzipaizyo zyakukombelezezya zinyonyoono, cipaizyo cakutenta, camaila acamafuta.”