Ezekiyeli 44
Kubelesegwa kwamulyango wakujwe
1 Mpawo muntu ooyo wakandileta kumulyango waanze wabusena busalala ooyo uulangide kujwe, kumane wakajalwa. 2 Mwami Leza wakati kulindime, “Mulyango ooyu unoojalidwe. Tuuelede kujalulwa pe, taakwe muntu weelede kunjila mulinguwo pe. Weelede kuti kuujedwe nkaambo Mwami Leza, Leza wa Isilayeli wanjila mulinguwo. 3 Muleli alikke nguukonzya kukkala mukati kamulyango ooyu kuti alye kumbele lya Mwami Leza. Ulakonzya kunjila kuti naa wainda kumulyango wakkoce wamulyango ooyo uuzwida mumulyango ooyu nguwenya.”
4 Lino muntu ooyu wakandiinzya kumulyango wakunyika kumbele lyaŋanda ya Leza. Ndakalanga, ndakabona bulemu bwa Mwami Leza bwakazuzya ŋanda ya Mwami Leza, eelyo ndakavuntama ansi.
5 Mwami Leza wakati kulindime, “Yebo omuntu, langisisya, swiilila uteye matwi aako kuzintu zyoonse nzendikwaambila mumalailile aamba zyaŋanda ya Mwami Leza. Swiilisisya malailile aamanjililo aaŋanda ya Leza amazwido oonse aabusena busalala. 6 Ambila musyobo muzangi wa Isilayeli kuti, mboobu mbwamba Mwami Leza ulati, ‘Ndacimwa amilimo yanu iisesemya nomusyobo wa Isilayeli!’ 7 Kunze aamilimo yanu yoonse iisesemya mwakaleta bamasi batasalali mumyoyo yabo akubanjizya mubusena busalala, mwakasofwaazya ŋanda yangu mukutuula zyakulya, mafuta abulowa alimwi mwakatyola cizuminano canu. 8 Muciindi cakuti mubeleke milimo yanu kwiinda mukubamba zintu zyangu zisalala, mwakabikka bantu bambi kuti babambe busena bwangu busalala. 9 Mboobu mbwaamba Mwami Leza ulati, ‘Taakwe muzwamasi uutasalali mumoyo weelede kunjila mubusena bwangu busalala, taakwe muzwamasi naba omwe nokuba kuti kakkala akati ka Baisilayeli.’”
10 Balevi aabo bakasakene kuzwa kulindime ciindi Baisilayeli nibakasweeka akutobela mituni beelede kusubulwa akaambo kazinyonyoono zyabo. 11 Balakonzya kubeleka mubusena bwangu busalala, kuti kababamba milyango ya Leza akukutauka muŋanda oomo, balakonzya kujaya banyama bacipaizyo cakutenta azituuzyo zileta bantu, kabaima kumbele lyabo akubabelekela. 12 Pele mukuti bakali kubelekela kumbele lyamituni yabo akucita kuti musyobo wa Isilayeli ubisye, nkaako ndatambika kujulu mukukonkezya kuti beelede kupegwa cisubulo cazinyonyoono zyabo, mbwaamba Mwami Leza. 13 Tabeelede kuti baswene aafwiifwi kabayeeya kuti mbapaizi, nikuba kuboola aafwiifwi azintu zyangu zisalala, noziba zipaizyo zyangu zisalalisya, beelede kuti bause akaambo kamilimo yabo iisesemya. 14 Nikuba boobo njoocita kuti kabayoolanga zyamilimo yamuŋanda ya Leza amilimo yoonse eeyo yeelede kucitwa mulinjiyo.
15 Pele bapaizi, baciinga ca Levi abana ba Zadoki, aabo bakali kucita milimo yamubusena bwangu busalala cakusyomeka ciindi Baisilayeli nibakasweeka, beelede kuswena aafwiifwi kuti bandibelekele, banooima kumbele lyangu kuti kabapa zipaizyo zyamafuta abulowa, mbwaamba Mwami Leza. 16 Balo balikke mbabanoonjila mubusena bwangu busalala, kutebule lyangu kuti bandibelekele akucita mulimo wangu.
17 Banjila amilyango yamubbuwa lyamukati, beelede kusama tubbudula twandeketela muzibuno, tabeelede kusama zisani zyaboya ciindi nobakutauka kumilyango yalubuwa lwamukati nomuba mukati kaŋanda ya Leza. 18 Beelede kusama zingundu zyandeketela kumitwe, azisani zyakunsi zyandeketela muzibuno zyabo. Tabeelede kusama cisani cilemu. 19 Ciindi nobazwa kuti baye mulubuwa lwaanze ooko kuli bantu, beelede kusamununa zisani eezyo nzibasamide nibali kukutauka, beelede kuzisiya mutwaanda tusalala, basame zimbi, mukuti inga bantu balaba nobaguma zisani zisalala eezyo. 20 Tabeelede kukululwa nokuba kulekelela masusu kuti alampe, pele beelede kunoogelwa-gelwa lyoonse. 21 Taakwe mupaizi weelede kunywa waini anoonjila mulubuwa lwamukati. 22 Tabeelede kukwata bamukabafu nokuba bakaintu bakalekwa, beelede kukwata buyo basimbi batazi basankwa baluzubo lwa Isilayeli nobaba bamukabafu babapaizi. 23 Beelede kunooiisya bantu bangu kwiindana kwazintu zisalala azintu buyo, beelede kunoobatondezya kwiindana kwazintu zitasalali azisalala mumulawo.
24 Naa kwaba kuzwangana kuli buti, bapaizi beelede kubeteka akukosola kaambo aako kwiindila mumalailile aangu. Beelede kubamba milawo yangu amalailile aangu kumapobwe oonse aabikkidwe, masabata aangu baabambe cakusalala.
25 Mupaizi teelede kulisofwaazya mukuswena aafwiifwi amutumba, nikuba boobo kuti naa mufu kali wisi naa banyina, mwanaakwe mulombe naa musimbi munyina naa mucizi wakwe uutakwetwe, ulakonzya kuswena aafwiifwi. 26 Amana kusalazigwa, weelede kuti alindile kwamazuba aali ciloba. 27 Mubuzuba mbwanjila mulubuwa lwamukati lwabusena busalala kuti akakutauke oomo, weelede kupa cipaizyo cakulikombelezezya cinyonyoono cakwe, mbwaamba Mwami Leza.
28 Mebo endikke ndendime lukono lwabapaizi. Toelede kubapa lukono mu Isilayeli pe, mebo ndiyooba lukono lwabo. 29 Bayoolya zituuzyo zyakukombelezezya zinyonyoono, azipaizyo zyamilandu, zintu zipedwe ku Mwami Leza ziyooba zyabo. 30 Micelo mibotu mitaanzi kubizwa yoonse iyooba yabo, zipego zyoonse zyakuliyandila ziyooba zyabapaizi. Weelede kuyoobapa busu butaanzi kuziigwa, kutegwa mukwasyi wako ukalelekwe. 31 Bapaizi tabeelede kulya cili coonse, muyuni naba munyama wajaigwa naa walifwida nokuba kulumwa munyama wa musokwe.