Ezekiyeli 43
Bulemu bwa Mwami Leza mbubwakapilukila kuŋanda ya Leza
1 Mpawo muntu ooyo wakandileta kumulyango uulangide kujwe, 2 aawo ndakabona bulemu bwa Leza wa Isilayeli kabuboola kuzwa kujwe. Ijwi lyakali mbuli maanzi aaguuma, nyika yakanyengema bulemu bwakwe. 3 Cilengaano ncindakabona cakali mbuli cilengaano ciya ncindakabona naakali kuboola kuzoonyonyoona munzi, mbuli zilengaano ziya nzindakabona kumbali aamulonga wa Kebaa, eelyo ndakavuntama ansi. 4 Bulemu bwa Mwami Leza bwakanjila muŋanda ya Leza bwainda kumulyango uulangide kujwe. 5 Mpoonya Muuya wakandinyamuna akunditola mulubuwa lwamukati, eelyo bulemu bwa Mwami Leza bwakazuzya ŋanda ya Leza.
6 Muntu ooyo kaciimvwi munsi lyandime, ndakamvwa muntu kakanana kulindime kuzwa muŋanda ya Leza eeyo. 7 Wakati, “Yebo omuntu, oobu mbusena bwacuuno cangu cabwami, mpaalyata maulu aangu. Oobu mbobusena mbwenookkala akati ka Baisilayeli kukabe kutamani. Musyobo wa Isilayeli tuukasofwaazyi limbi zina lyangu lisalala, iiyi balo nibaba bami babo tabakalisofwaazi limbi mubwaamu bwabo bwakukomba mituni yabami babo, mumalende aabo. 8 Nibakabikka zilyatilo kumbali aazilyatilo zyangu, akuyaka zikunguzyo kumbali aazikunguzyo zyangu cakuti citwaandaanya buyo mbwaanda, bakasofwaazya zina lyangu kwiindila mumilimo yabo iisesemya. Nkaako ndakabanyonyoona mubukali bwangu. 9 Lino abasowe bwaamu bwabo mituni yabami babo yabuyo, ndendilyo nendiyookkala akati kabo.
10 “Yebo omuntu, baambile zyaŋanda ya Leza bantu ba Isilayeli, kutegwa bause akaambo kazinyonyoono zyabo. Abayeeye azyamuzeezo ooyu, 11 baakuba aansoni akaambo kazeezyo nzibakacita, ubaambile zyaŋanda ya Leza mbuyakabede, mazwido amanjililo, mbuyakabede yoonse, mbuyakapangidwe yoonse. Ubaambile malailile aaya, kuti kabaayeeya akwaatobela.
12 “Ngooyu mulawo waamba zyaŋanda ya Leza. Busena boonse bweengelede atala aacilundu bunoosalalisya. Ooyu ngomulawo waŋanda ya Leza.
Cipaililo
13 “Nkooku kweelekwa kwacipaililo mukubelesya kasako kaya. Capaililo cakali kasako abwaasa bwajanza. Talo lyaco lyakali kakokola komwe, bwaasa bwakali kakokola komwe, lumpimpito lwaco lwakali cisela cakakokola kuzinguluka moombe woonse. Mboobu mbocilampa cipaililo, 14 kuzwa kutako ansi kuyoosika kumoombe wakusaanguna, cilampa tukokola tobilo, bwaasa bwakali kakokola komwe, kuzwa kukoombe kuyoosikila kumoombe mupati, cilampa tukokola tone, bwaasa bwakali kakokola komwe. 15 Cikko cacipaililo cakali tukokola tone, kuzwa acikoko kwakali ziswi zyone ziimvwi. 16 Cikko cakaleelene, cakali tukokola tuli kkumi atune koonse-koonse, bwaasa bwakali tukokola tuli kkumi atune. 17 Moombe waatala awalo wakaleelene, wakali tukokola tuli kkumi atune, bwaasa bwakali tukokola tuli kkumi atune, cakajisi lumpimpito lwacisela cakakokola, tako lyakali kakokola komwe coonse kucizinguluka. Malyatilo aacipaililo alangide kujwe.”
18 Mpawo wakati kulindime, “Yebo omuntu, mboobu mbwaamba Mwami Leza ulati, ‘Aaya ayooba ngemalailile aakupa zipaizyo zyakutenta akusansaila bulowa acipaililo caakuyakwa.’ 19 Weelede kupa kapoho kacipaizyo cakukombelezezya zinyonyoono kubapaizi, bali Mbalevi, baciinga ca Zadoki aabo bakutauka kumbele lyangu, mbwaamba Mwami Leza. 20 Weelede kubweza bulowa bumwi akububikka kumeja one aacipaililo aaziswi zyone zyamoombe waatala amunsi aalumpimpito loonse, kutegwa basalazye cipaililo akuti bape cipaizyo cakumanya mulandu. 21 Weelede kutola kapoho kacipaizyo cakukombelezezya zinyonyoono akutenta mubusena bweelede bwaŋanda ya Leza anze lyabusena busalala.
22 “Mubuzuba bwabili ukape sijembwe uutakwe kampenda kuba cipaizyo cakukombelezezya cinyonyoono, cipaililo cisalazigwe mbubonya mbuli bwasalazigwa kapoho. 23 Wamana kucisalazya, upe kapoho amugutu kuzwa kubutanga, zyoonse zyobilo kazitakwe tumpenda. 24 Weelede kuzipa kumbele lya Mwami Leza, bapaizi beelede kuzisansaila munyo akuzipa kuti cibe cipaizyo cakutenta capegwa ku Mwami Leza.
25 “Kwamazuba aali ciloba weelede kunoopa basijembwe buzuba abuzuba kuba cipaizyo cakukombelezezya cinyonyoono, weelede kupa akapoho amugutu kuzwa kubutanga, zyoonse zyobilo kazitakwe tumpenda. 26 Kwamazuba aali ciloba baleelede kusalazya cipaililo akucibamba kuti cibelesegwe. 27 Mazuba aali ciloba aakumana, kuzwa mubuzuba bwalusele, bapaizi bakape zipaizyo zyabo zyakutenta azyalumvwano acipaililo. Eelyo uyootambulika, mbwaamba Mwami Leza.”