Ezekiyeli 42
Twaanda twabapaizi
1 Mpoonya muntu ooyu wakanditola lwakunyika mukati kalubuwa lwaanze akundileta kutwaanda tulangana alubuwa lwaŋanda ya Leza, kulangana abwaanda bwaanze kulubazu lwakunyika. 2 Buyake bwakajisi mulyango wakalangide kunyika wakali kulampa tukokola tuli mwaanda, mubwaasa wakali tukokola tuli makumi osanwe. 3 Mumasena oonse obilo busena bomwe-bomwe bwakali kulampa tukokola tuli makumi obilo kuzwa mulubuwa lwamukati, mumweenya uulangene alubuwa lwaanze, twaanda twakalilangene atwaandanyina mumilongo yotatwe. 4 Kumbele lyatwaanda kwakali mweenya wakwiinda mukati, wakali tukokola tuli kkumi mubwaasa, atukokola tuli mwaanda mubulamfu. Milyango yawo yakalangide kunyika. 5 Lino twaanda twamujulu twakali tusyoonto kwiinda tooto twaakati atwaansi nkaambo twakayakidwe alaale. 6 Twaanda twakali mumulongo watatu tiitwakajisi zicinda, mbuli bwakali mabbuwa, nkaako twakajisi zibuye zisyoonto kwiinda tooto twaansi atwaakati-kati. 7 Kwakali bwaanda bwaanze bwakabambene atwaanda alubuwa lwaanze bwakali tantamukide atukokola tuli makumi osanwe. 8 Twaanda twaansi ooto twakabambene alubuwa lwaanze twakali kulampa tukokola tuli makumi osanwe, mulongo wakali afwiifwi abusena busalala wakali kulampa tukokola tuli mwaanda. 9 Twaanda twaansi twakajisi manjililo kulubazu lwakujwe ciindi muntu nanjila mulintuto kuzwa mulubuwa lwaanze.
10 Kulubazu lwakumusanza kutobelezya bulamfu bwalubuwa lwaanze, kuyoosika kulubuwa lwaŋanda ya Leza kulanganya lubuwa lwaanze, kwakali twaanda 11 twakajisi mweenya kumbele lyato. Ootu twakali mbuli twaanda tuli kulubazu lwakunyika twakajisi bulamfu abwaasa bweelene, twakajisi manjililo akweelekwa kweelene. Kweendelana amilyango iili kunyika, 12 kwakali milyango yatwaanda kumusanza. Kwakali mulyango kumatalikilo aamweenya ooyo wakali kuyooguma abwaanda kugama lwakujwe, oomo muntu mwakonzya kunjila.
13 Mpawo muntu ooyo wakati kulindime, “Twaanda twakumusanza tulangide kulubazu lwaŋanda ya Leza ntwaanda twabapaizi, ooko bapaizi bakutaukila Mwami Leza nkobanoolida zipaizyo zisalalisya. Ooko bayoobikka zituuzyo zisalalisya, nkokuti zituuzyo zyamaila, zipaizyo zyakukombelezezya zinyonyoono azipaizyo zyakumanya milandu, nkaambo mbusena busalala. 14 Kuti bapaizi banjila mubusena busalala, tabeelede kunjila lubuwa lwaanze, mane kusikila basiya majansi aamulimo, nkaambo aaya alasalala. Beelede kusama zisani zimbi kabatanaswena afwiifwi amasena aayo aakaambilwa bantu.”
15 Lino naakamana kweeleka zili mukati kalubuwa lwaŋanda ya Leza, wakandigwisya akundiinzya kumulyango wakujwe akweeleka busena oobo boonse. 16 Wakeeleka lubazu lwakujwe akasako kakweelesya kwakali tukokola tuli myaanda yosanwe. 17 Wakeeleka lubazu lwakunyika akasako aako, kwakali tukokola tuli myaanda yosanwe. 18 Wakeeleka lubuwa lwakumusanza akasako, kwakali tukokola tuli myaanda yosanwe. 19 Aawo wakagama kulubazu lwakumbo, weeleka akasako, kwakali tukokola tuli myaanda yosanwe. 20 Mbombuboobu mbwaakeeleka mabazu one oonse. Kwakali bwaanda kubuzinguluka, bwakali kulampa tukokola tuli myaanda yosanwe, abwalo bwaasa bwakali kulampa tukokola tuli myaanda yosanwe. Bwakali kwaandaanya busena busalala abwabantu buyo.