Ezekiyeli 41

¹ Mpawo mwaalumi ooyo wakandileta kubusena busalala akweeleka zicinda, bwaasa bwazicinda bwakali tukokola tuli cisambomwe kumabazu oonse. ² Bwaasa bwaamanjililo bwakali tukokola tuli kkumi, bwaasa bwabwaanda bwamumbali kumabazu oonse bwakali tukokola tosanwe. Wakeeleka busena busalala bwaanze bwalo bwakali tukokola tuli makumi one, bwaasa bwakali tukokola tuli makumi obilo.

³ Mpoonya wakanjila mubusena busalala bwamukati akweeleka zicinda zyaamanjililo, bwaasa bwacomwe-comwe bwakali tukokola tobilo. Bwaasa bwaamanjililo bwakali tukokola tuli cisambomwe, bwaasa bwabwaanda bwamumbali aamanjililo bwakali tukokola tuli ciloba. ⁴ Wakeeleka bulamfu bwabusena busalala, bwakali tukokola tuli makumi obilo, bwaasa bwakali tukokola tuli makumi obilo. Kukosweda kumamanino aalubuwa lwaanze. Wakati kulindime, “Oobu mbobusena busalalisya.”

⁵ Kumane wakeeleka bwaanda bwaŋanda ya Leza, bulemu bwamutika bwakali tukokola tuli cisambomwe, nkabela kaanda kali koonse kamumabali kuzinguluka ŋanda ya Leza kakali tukokola tuli cisambomwe mubwaasa. ⁶ Twaanda twamumabali twakali mumilongo yotatwe, akamwi kakali atala lyakeenzinyina, katuli makumi otatwe mumulongo omwe-omwe. Kwakali zitabilizyo moonse-moonse kuzinguluka ŋanda ya Leza kuti zibe zyakugabya twaanda twamumabali, kutegwa zigabyo zitanjili mubwaanda bwaŋanda ya Leza. ⁷ Twaanda twamumabali kuzinguluka ŋanda ya Leza twakali kuya bukomena mbuuya mulongo uuli woonse. Buyake bwakayakidwe kuzinguluka ŋanda ya Leza bwakatantikwa munzila zyotatwe, cakuti maanda aamukati akali kuyabukomena ciindi muntu naakali kuya mujulu. Cakali kukonzeka kutanta kuzwa ansi kusikila akati-kati, akuzwa akati-kati kusika mujulu.

⁸ Lino ndakabona kuti ŋanda ya Leza yakajisi cibuye mujulu aawo aakayakwa ntalisyo zyatwaanda twamumabali. Cibuye eeci cakali kulampa kasako komwe, nkokuti tukokola tuli cisambomwe. ⁹ Bwaanda bwaanze bwatwaanda twamumabali bwakajisi mutika uuli tukokola tosanwe. Mwaako wakali akati-kati katwaanda twamumabali aaŋanda ya Leza, ¹⁰ atwaanda twabapaizi, wakali abwaasa bwakali tukokola tuli makumi obilo kuzinguluka ŋanda ya Leza yoonse. ¹¹ Kwakali manjililo aagama kutwaanda twamumbali kuzwa kumwaako ooyu, umwi wakali kunyika, umwi wakali kumusanza. Bwaasa oobo bwakali tukokola tosanwe kubuzinguluka koonse. ¹² Buyake bwakalangene alubuwa lwaŋanda ya Leza kulubazu lwakumbo bwakali tukokola tuli makumi aali ciloba mubwaasa. Bwaanda bwabuyake bwakali amutika uujisi tukokola tosanwe koonse, bulamfu bwawo bwakali tukokola tuli makumi aali fuka.

¹³ Mpoonya wakeeleka ŋanda ya Leza, yakali kulampa tukokola tuli mwaanda, lubuwa lwayo antoomwe abuyake abwaanda bwayo abwalo bwakali kulampa tukokola tuli mwaanda. ¹⁴ Bwaasa bwaŋanda ya Leza nkoili kujwe kubikkilizya ankoili kumbele, yakali tukokola tuli mwaanda.

¹⁵ Mpawo wakeeleka bulamfu bwabuyake bulangene alubuwa lwakusule lyaŋanda ya Leza, kubikkilizya atwaanda tumwi kumabazu oonse, bwakali kulampa tukokola tuli mwaanda. Ŋanda yakunjilila mubusena busalala abusena busalalisya ¹⁶ yakajisi tupulanga kuzwida acibuye kuyoosika ampulungwido. Mpulungwido zyakali kukonzya kujalwa. ¹⁷ Mumweenya waatala lyamanjililo aanze kuya mubusena busalala bwamukati aabwaanda aaswaanganina busena busalala bwamukati abwaanze, ¹⁸ kwakali bakelibu babezedwe atukunka. Tukunka ootu twakalinungene abakelebu. Kelebu omwe-omwe wakajisi masyu obilo. ¹⁹ Busyu bwamuntu bwakalangide kukakunka, busyu bwasyuumbwa bwakalangide kukakunka kamwi. Zibeze zyoonse zyakazingulukide ŋanda ya Leza yoonse. ²⁰ Kuzwa acibuye kuyoosika mubusena buli atala aamanjililo, bakelebu atukunka bakakankamidwe abwaanda bwabusena busalala bwaanze.

²¹ Busena busalala bwaanze bwakajisi cikunguzyo cazyooko zyone, acalo cikunguzyo cakubusena busalalisya mbucakabede oobo. ²² Kwakali cipaililo cazisamu cakali kulampa tukokola totatwe kuya mujulu, mumabazu oonse cakali kulampa tukokola tobilo, zyooko zyaco, tako lyaco amabazu aaco oonse akali aazisamu. Mpoonya muntu ooyo wakati kulindime, “Eeli nditebule lili kumbele lya Mwami Leza.” ²³ Busena busalala bwaanze abusena busalalisya oonse akajisi zitendele zyobilo-zyobilo. ²⁴ Mulyango omwe-omwe wakajisi zitendele zyobilo zyaandeene amulyango omwe. ²⁵ Lino azitendele zyabusena busalala bwaanze kwakali bakelebu babeze atukunka tuli mbubonya mbuli ooto tunamatikidwe abwaanda, alimwi kwakali kaluli kazisamu kumbele lyakkoce. ²⁶ Mumabali aakkoce kwakali tupulo twakajisi tukunka tubezedwe mumabazu oonse. Twaanda twamumabali twaŋanda ya Leza atwalo twakajisi tululi.