Ezekiyeli 40
Cilengaano caŋanda ya Leza mpya
1 Mumwaka wamakumi obilo aisanu wabwaange bwesu, kumatalikilo amwaka, mubuzuba bwakkumi bwamwezi, ooyu wakali mwaka wakalikuzulizya myaka iili kkumi aine munzi wa Jelusalemu kuuoledwe, mubuzuba mbubonya oobo Mwami Leza wakandeenzya akunditola. 2 Muzilengaano Leza wakanditola kunyika ya Isilayeli akundibikka atala aacilundu cilamfu, kumusanza aacilundu eeci kwakalibonya mayake aakali kulangika mbuli munzi. 3 Wakanditola ooko, nkabela ndakabona mwaalumi wakali kulangika mbuli mukuba, wakaimvwi akati kamanjililo aamunzi, kajisi alutambo lwandeketela, akasako kakupimya mujanza. 4 Mwaalumi ooyu wakati kulindime, “Yebo, omuntu langa zyoonse nzyetikutondezye, nkaambo ncenciceeco ncooletelwa kuno. Waambile musyobo wa Isilayeli zintu zyoonse nzyobwene.”
Mulyango wakujwe
5 Lino ndakabona bwaanda buzingulukide ŋanda ya Leza yoonse. Kasako kakweelesya kakajisi mwaalumi ooyo kakali kulampa tukokola tuli cisambomwe abwaasa bwajanza. Wakeeleka bwaanda ankako, mutika wabwaanda wakali kasako komwe, abwalo bulamfu bwamujulu bwakali kasako komwe.
6 Mpoonya wakainka kumulyango wakalangide kujwe. Wakatanta amalyatilo akweeleka cikunguzyo cawo, cakali kasako komwe. 7 Twaanda twabalindizi twakali kasako komwe, bwaasa bwakali kasako komwe, mweenya wabwaanda akati-kati katwaanda wakali tukokola tosanwe mubwaasa. Cikunguzyo camulyango wakali kumbali aakkoce cakalangide kuŋanda ya Leza cakali kasako komwe. 8 Mpawo wakeeleka kkoce lyamulyango, 9 lyakali tukokola tuli lusele, zicinda zyalyo zyakali tukokola tobilo mubwaasa. Kkoce eeli lyakalangide kuŋanda ya Leza.
10 Mukati kamulyango wakujwe kwakali twaanda totatwe kulubazu lomwe-lomwe, totatwe twakaleelene, mweenya wabwaanda oobo kumbazu zyoonse wakaleelene. 11 Mpoonya twakeeleka bwaasa bwamanjililo aamulyango, kwakali tukokola kkumi, kulampa kwabo kwakali tukokola tuli kkumi atutatu. 12 Kumbele lyakaanda kali koonse kwakali bwaanda bulampa kakokola komwe, twaanda twakajisi tukokola tuli cisambomwe, toonse katweelene. 13 Lino wakeeleka mulyango kuzwa atala lyakaanda kali musule kuyoosika atala lyakaanda kamwi kalangene ankako, bulamfu bwakali tukokola tuli makumi obilo atusanu kuzwa kucitendele cimwi kusikila kuli cimwi. 14 Wakeeleka makkoce aabwaanda oonse mukati kabwaanda, kwakali tukokola tuli makumi aali cisambomwe. Kweeleka ooku kwakali kusika kukkoce kulangana alubuwa lwaŋanda ya Leza. 15 Bulamfu bwakuzwa kumanjililo aamulyango mane kuyoosika kumamanino aakkoce bwakali tukokola tuli makumi osanwe. 16 Twaanda abwaanda bwakali mukati kamulyango bwakajisi tutendele tusyaanikide moonse-moonse, mbuli bwakali kkoce, ootu twakali kujalwidwa mukati. Bwaanda bwakalangide mukkoce bwakabotezegwa atukunka.
Lubuwa lwaanze
17 Mpoonya wakandileta kulubuwa lwaanze. Ooko ndakabona twaanda aciimino amweenya cakayakidwe mulubuwa loonse, kwakali twaanda tuli makumi otatwe mukati kamweenya ooyu. 18 Cakaliyeemene amabazu aamilyango, cakali mbuli mbubwakali kulampa lubuwa lwaansi. 19 Mpawo wakeeleka kulampa kuzwa mukati kamulyango waansi kuyoosika anze lyalubuwa lwamukati, lwakali kulampa tukokola tuli mwaanda kulubazu lwakujwe alwakunyika.
Mulyango wakunyika
20 Lino wakeeleka bulamfu abwaasa bwamulyango uulangide kunyika, uunjila mulubuwa lwaanze. 21 Twaanda twawo totatwe kumabazu oonse, bwaanda amakkoce akaleelene ayaalya aamulyango wakusaanguna. Wakali kulampa tukokola tuli makumi osanwe, wakalijisi bwaanda bulampa tukokola tuli makumi obilo atusanu. 22 Tupulo twawo, makkoce aawo atukunka twakubotya zyakaleelene azeeziya zyamulyango uulangide kujwe. Kwakali malyatilo aali ciloba kunjila mukati, makkoce aawo akalilangene anguwo. 23 Kwakali mulyango wamulubuwa lwaakati uulangide kumulyango wakunyika, mbubonya mbuli wakali kujwe. Wakeeleka kuzwa kumulyango umwi kuyoosika kuliyooyo uulangene anguwo, kaulampa tukokola tuli mwaanda.
Mulyango wakumusanza
24 Mpoonya wakanditola kulubazu lwakumusanza, eelyo ndakabona mulyango uulangide kumusanza. Wakeeleka zicinda zyawo amakkoce, zyoonse zyakaleelene mbubonya mbuli zimwi. 25 Mulyango amakkoce aawo akalijisi tupulo moonse-moonse, mbuli tupulo twamilyango imwi. Wakali kulampa tukokola tuli makumi osanwe bwaasa bwakali kulampa tukokola tuli makumi obilo atusanu. 26 Kwakali malyatilo aali ciloba kunjila mumo, makkoce akalilangene amalyatilo aaya, wakajisi tukunka twakubotya kumbele lyabwaanda kumabazu oonse. 27 Lubuwa lwamukati lwakajisi mulyango wakalangide kumbele, wakeeleka kuzwa kumulyango ooyu kuyoosika kumulyango waanze kulubazu lwakujwe, kwakali tukokola tuli mwaanda.
Milyango yalubuwa lwamukati
28 Mpoonya wakandileta kulubuwa kwiinda mumulyango wakumusanza, wakeeleka mulyango wakumusanza, wakaleelene mbubonya mbuli imwi. 29 Zicinda zyawo, bwaanda bwawo, makkoce aawo akaleelene mbubonya mbuli amwi. Mulyango amakkoce aawo akajisi tupulo moonse-moonse. Wakali kulampa tukokola tuli makumi osanwe, bwaasa bwakali kulampa tukokola tuli makumi obilo atusanu. 30 Makkoce aamilyango mukati kalubuwa lwamukati akali kulampa tukokola tuli makumi obilo atusanu mubwaasa, kuya ansi akali kulampa tukokola tosanwe. 31 Kkoce lyawo lyakalangene alubuwa lwaanze, zicinda zyawo zyakabotezegwa atukunka, kunjila mulindulo kwakali malyatilo aali lusele.
32 Mpawo wakandileta mulubuwa lwamukati kulubazu lwakujwe, wakeeleka mulyango, wakaleelene mbubonya mbuli imwi. 33 Twaanda twawo, bwaanda akkoce lyawo zyakaleelene mbubonya mbuli zimwi. Mulyango akkoce lyawo wakajisi tupulo moonse-moonse. Wakali kulampa tukokola tuli makumi osanwe, bwaasa bwakali tukokola tuli makumi obilo atusanu. 34 Kkoce lyawo lyakalangene alubuwa lwaanze, zicinda zyawo zyakabotezegwa atukunka mumabazu oonse, kunjila mulindulo kwakali malyatilo aali lusele.
35 Mpoonya wakandileta kumulyango wakunyika akuueleka. Wakaleelene aimwi, 36 mbubonya mbuli bwakali twaanda twawo, bwaanda akkoce lyawo, wakajisi tupulo moonse-moonse. Wakali kulampa tukokola tuli makumi osanwe, bwaasa bwakali kulampa tukokola tuli makumi obilo atusanu. 37 Kkoce lyawo lyakalangene alubuwa lwaanze, zicinda zyawo zyakabotezegwa atukunka mumabazu oonse, kunjila mulindulo kwakali malyatilo aali lusele.
Mayake aakali munsi-munsi amulyango wakunyika
38 Lino kwakali kaanda kajisi mulyango munsi aakkoce mukati kamilyango yoonse yamukati, ooko kwakali kusanzilwa zipaizyo zyakutenta. 39 Mukkoce lyamulyango kwakali matebule obilo kumabazu oonse, ooko zipaizyo zyakutenta, zyakukombelezezya zinyonyoono, azyakumanya milandu nkuzyakali kujailwa. 40 Kumbali abwaanda bwaanze mukkoce lyamulyango, munsi amalyatilo aamanjililo amulyango wakunyika kwakali matebule obilo, kulubazu lumwi lwamalyatilo kwakali matebule obilo. 41 Nkaako kwakali matebule one kulubazu lomwe lwamulyango, alimwi one akali kulubazu lumwi, antoomwe kwakali matebule aali lusele aakali kujailwa zyazipaizyo. 42 Kwakali matebule aambi one aamabwe aabezedwe aazipaizyo zyakutenta, lyomwe-lyomwe lyakali kulampa kakokola komwe acisela, bwaasa lyakali kakokola komwe acisela, alimwi lyakalikulampa kakokola komwe. Alingawo kwakabikkwa zibelesyo zyakubelesya mukujaya zipaizyo zyakutenta azipaizyo zimwi. 43 Mukati kwakali zyaanzikilo, comwe-comwe kacilampa bwaasa bwajanza, zyakakankamidwe kubwaanda moonse-moonse. Matebule akali aakubikkila nyama yakupaizya.
44 Lino kunze lyamulyango wamukati, amukati kamulyango, wamukati, kwakali twaanda tobilo, komwe kakali kulubazu lwamulyango wakunyika, kakalangide kumusanza, kamwi kakali kulubazu lwakumusanza, kakalangide kunyika. 45 Wakati kulindime, “Kaanda kalangide kumusanza nkabapaizi, aabo babamba ŋanda ya Leza, 46 kaanda kalangide kunyika nkabapaizi babamba cipaililo. Aaba mbana balombe ba Zadoki bali mbabaciinga ca Balevi aabo baswena afwiifwi a Mwami Leza kuti bamukutaukile.”
47 Mpoonya aawo wakeeleka lubuwa lwaanze, lwakaleelene, lwakali tukokola tuli mwaanda, mubwaasa lwakali tukokola tuli mwaanda. Cipaililo cakali kumbele lyaŋanda ya Leza.
Lubuwa lwamukati aŋanda ya Leza
48 Wakandileta kukkoce lyaŋanda ya Leza, wakeeleka zicinda zyakkoce, bwaasa bwazyo bwakali tukokola tosanwe mumabazu oonse. Bwaasa bwaamanjililo bwakali tukokola tuli kkumi atune, bwaanda bwayo bwakali tukokola totatwe mubwaasa, mumabazu oonse. 49 Bwaasa bwakkoce bwakali tukokola tuli makumi obilo, alimwi bwakali tukokola tuli makumi obilo kuzwa kumbele kuyoosika kusule. Lwakajisi malyatilo manji, kwakali misemo kumabazu oonse aazicinda.