Ezekiyeli 39

Kuzundwa kwa Gogi

¹ Yebo omuntu, sinsima azya Gogi, waambe kuti, “Mboobu mbwaamba Mwami Leza ulati, ‘Nsikuyandi yebo Gogi omuleli mupati wa Misyeki a Tubali.’ ² Ndilakuzuumusya akukukwelaanya. Njookuleta kuzwa kulaale cisi nkocili kunyika ndiyookutola mane ukasike kuzilundu zya Isilayeli. ³ Nzookuumina kubbazu lyalumwensi kuli buta bwako cakuti mivwi iili mujanza lyalulyo ikakuloke. ⁴ Uyoofwida muzilundu zya Isilayeli, yebo abasilumamba bako boonse antoomwe amisyobo eeyo njonooli aayo. Ndiyoocita kuti ukabe cilyo cabanyama bamisyobo-misyobo abanyama bamusokwe. ⁵ Uyoofwida musokwe, ndime ndaamba, mbwaamba Mwami Leza. ⁶ Ndiyootuma mulilo uyootenta Magogi abaabo bakkede cakuliiba munsi aankomwe zyalwizi, eelyo bayooziba kuti ndendime Mwami Leza.

⁷ “Ndiyoocita kuti zina lyangu lisalala likazibwe akati kabantu bangu Baisilayeli. Nsikalekeleli limbi kuti zina lyangu lisalala likasofwaazigwe, eelyo bamasi bayooziba kuti mebo nde Mwami Leza ndendime Uusalala wa Isilayeli. ⁸ Buzuba oobu bulasika! Kasimpe ncendaamba ciyoocitika, mbwaamba Mwami Leza. Oobu mbobuzuba mbundakali kwaamba.

⁹ “Nkabela aabo bakkala muminzi ya Isilayeli bayoobweza zilwanyo akuyoozicita nkuni, ziyoopya, nkokuti ntobo nsyoonto ampati, mata amivwi, nkoli amasumo. Kwamyaka iili ciloba banooyoozikutuzya mulilo. ¹⁰ Tabakatebbi nkuni musokwe nikuba kuyotema nkuni muzisaka, nkaambo bayoobelesya nsako zyazilwanyo kukutuzya mulilo. Bayoobasaala aabo bakasyeede akubatolela lubono aabo bakabatolelede, mbwaamba Mwami Leza.”

Kuzikkwa kwa Gogi

¹¹ Mwami Leza wakati, “Mubuzuba oobo njoopa Gogi busena bwakuzikkilwa mu Isilayeli, mukkuti lyabasinyenda kujwe kugama kulwizi lwamunyo. Busena oobu buyoosinkila nzila yabasinyendo, nkaambo Gogi amakamu-makamu akwe bayoozikkilwa kooko. Aboobo buyootegwa ndikkuti lyamakamu aa Gogi. ¹² Kwamyezi iili ciloba musyobo wa Isilayeli ucinoocizikka kutegwa basalazye nyika. ¹³ Bantu bamucisi boonse bayoobazikka, nkabela mubuzuba mbwenjoolemekwa, buyooba buzuba bwaciibalusyo kulimbabo, mbwaamba Mwami Leza.

¹⁴ “Kuyooba bantu banoobbadelwa kutegwa bakasalazye nyika. Kuyooba bamwi banooyooendeenda munyika. Kunze lyabaaba, bamwi mbabayoozikka baabo basyeede anyika. Kumamanino aamyezi iili ciloba bayootalika mulimo wakulangaula. ¹⁵ Baakweendeenda munyika, kuti umwi akabone cifuwa camuntu, uyoobikka mbaakani mane kusikila basikuzikka bakacizikke mukkuti lya makamu aa Gogi. ¹⁶ Kuyooba munzi uutegwa Hamona. Mbombuboobu mbobayoosalazya nyika.”

¹⁷ Yebo omuntu, mboobu mbwaamba Mwami Leza ulati, “Ita bayuni bali buti boonse abanyama bamusokwe uti, ‘Amuyoboloke muboole kuzwa mumasena oonse muzoolye cipaizyo eeci ncindamubambila, cipaizyo cipati muzilundu zya Isilayeli. Ooko muyoolya nyama akunywa bulowa. ¹⁸ Muyoolya mibili yabaalumi basintanze akunywa bulowa bwabaleli banyika mbuli kuti nzyabagutu atubelele, mpongo abapoho boonse kabali mbuli banyama baneneede bavubwa baku Basyani. ¹⁹ Cipaizyo eeci ncendimubambila, muyoolya mafuta mane kusikila mukasunkwidwe, muyoonywa bulowa mane kusikila mukakolwe. ²⁰ Atebule lyangu, muyoolya mabbiza abasikwaatanta, baalumi basintanze abasilumamba bali boonse, mukakkute, mbwaamba Mwami Leza.’”

Kukubulusigwa kwa Isilayeli

²¹ Njoobonya bulemu akati kabamasi, misyobo yoonse iiyoobona cisubulo ncendiyoopa, ambwendibapenzya. ²² Kuzwa mubuzuba oobo bamusyobo wa Isilayeli bayooziba kuti mebo ndendime Mwami Leza wabo. ²³ Abalo bamasi bayooziba kuti bantu ba Isilayeli bakatolwa mubwaange akaambo kacinyonyoono cabo, nkaambo tiibakali kusyomeka kulindime. Nkaako ndakabafutatila akubaaba kuli basinkondonyina, nkabela boonse bakajaigwa munkondo. ²⁴ Ndakabacita kweendelana abusofwaazi amilandu yabo, ndakabafutatila ncobeni.

²⁵ Nkaako mboobu mbwaamba Mwami Leza ulati, “Lino Jakobo ndiyoomuleta kuzwa mubwaange, nkabela ndiyoobabeda aankumbu bantu bangu Baisilayeli boonse, zina lyangu lisalala njoolikwabilila. ²⁶ Bayooluba zyamause aabo akutasyomeka nkubakali kutondezya kulindime nibakakkede muluumuno munyika yabo, kakunyina aubayoosya. ²⁷ Ndaakubaboozya kuzwa mumasi akubayobolola kuzwa muzisi zyabasinkondonyina, njoolitondezya kuti ndasalala kwiindila mulimbabo, bamasi manji kabayoolibwenene. ²⁸ Ndendilyo nibayooziba kuti mebo ndendime Mwami Leza wabo. Nokuba kuti ndime ndakacita kuti baye mubwaange mumasi aambi, ndiyoobayobolola baboole munyika yabo beni, taakwe ngwendiyoosiya pe. ²⁹ Nsikabafutatili alimwi pe, nkaambo ndiyootila Muuya wangu kumusyobo wa Isilayeli, mbwaamba Mwami Leza.”