Ezekiyeli 38
Gogi uyooba cibelesyo ca Leza
1 Majwi aa Mwami Leza akandisikila akuti, 2 “Yebo omuntu, langa kuli Gogi wacisi ca Magogi, muleli mupati wa Misyeki a Tubali sinsima azyanguwe 3 uti, mboobu mbwaamba Mwami Leza ulati, ‘Nsikuyandi yebo Gogi, omuleli mupati wa Misyeki a Tubali.’ 4 Ndiyookunyona akuyookuca myeendo atulobyo akuyookugwisya ampi yako yoonse. Basimabbiza banoolibambilide azilwanyo antoomwe ankamu mpati yabantu bayoojisi ntobo mpati aziniini, boonse banooyoopilimuna mapanga. 5 Baku Pesiya, ku Kusyi aku Puti banooli aambabo, boonse kabayoojisi ntobo angowani, 6 abaku Goma bayooboola abasilumamba babo boonse, Betitogaama bazwa kucisi nkocili kunyika antoomwe abasilumamba babo boonse, kunooli bantu banji banooli aayebo.
7 “Libambile, ulibambe, yebo ankamu yabantu eeyo iikubunganide, basolwede. 8 Kwainda mazuba manji muyooitilwa nkondo. Kumyaka iiciza muyoosaala nyika eeyo yatilyookezye kuzwa kunkondo, iijisi bantu bakayobololwa kuzwa muzisi zinji kuzookulwana kuno kuzilundu zya Isilayeli, eezyo zyakasyeede buyo mbuboobu kwaciindi cilamfu. Bakayobololwa kuzwa muzisi zimwi, lino boonse balikkede cakuliiba. 9 Yebo abasilumamba bako abantu bazwa muzisi zinji uyooinka munkondo, uyoobaswenenena mbuli guwo, uyooba mbuli kkumbi livumba cisi.”
10 Mboobu mbwaamba Mwami Leza ulati, “Mubuzuba oobo uyootelaika, nkabela uyoojana nzila mbi.” 11 Uyooti “Ndiyanda kusaala nyika iitajisi minzi yankwakwa, ndiyoolwana bantu baluumuno batayeeyeli cili coonse, boonse bakkala muminzi iinyina nkwakwa, iinyina manjililo noziba zipingizyo. 12 Ndiyoosaala akubweza lubono, njoolwana bamumatongo aayakulwidwe abantu bakayobololwa kuzwa muzisi zimwi bajisi zivubwa zinji alubono lunji, bakkede akati kacisi.” 13 Baku Syeba abaku Dani abasimakwebo baku Taasyisyi abaminzi yawo boonse, bayooti kulinduwe, “Sena wakaboolela kusaala? Sena wayobolola makamu-makamu aabantu bako kuti bazootole lubono, kuti babweze nsiliva angolida, kutola zivubwa azintu akunyanga lubono lunji?”
14 Nkaako yebo omuntu, sinsima waambile Gogi kuti, mboobu mbwaamba Mwami Leza ulati, “Mubuzuba oobo, bantu bangu Baisilayeli nobayookkala muluumuno, sena tokaliboneni? 15 Uyooboola kuzwa kubusena buli kulaale kunyika, yebo abamisyobo minji, boonse kabayootantide amabbiza, inooli nkamu mpati yabantu, impi yanguzu. 16 Uyoosikila bantu bangu Baisilayeli mbuli kkumbi livumba cisi. Mumazuba aaboola, yebo O Gogi ndiyookuleta kuti uzoolwane nyika yangu kutegwa bamasi bazoondizibe ndaakulitondezya kuti ndasalala kwiindila mulinduwe kabalibwenene.”
17 Mboobu mbwaamba Mwami Leza ulati, “Sena toli nduwe ngundakali kwaamba mumazuba aakamana kwiindila mubabelesi bangu basinsimi bamu Isilayeli? Ciindi eeco bakali kusinsima kwamyaka minji kuti ndiyookuleta kuti uzoobalwane. 18 Nceeci ciyoocitika mubuzuba oobo. Gogi aakulwana nyika ya Isilayeli, bukali bwangu bupya buyoobuka, mbwaamba Mwami Leza. 19 Mubukali bwangu bupya, ndaamba kuti kuciindi eeco kuyooba kuzungaana kwanyika kupati munyika ya Isilayeli. 20 Inswi zyamulwizi, bayuni bamuluuwo, banyama bamusokwe, zilenge zyoonse zikalaba abantu boonse bamunyika bayookankama kumbele lyangu. Zilundu ziyoovuntamuka, majeleele ayookolomoka, bwaanda boonse buyoowa. 21 Ndiyooleta bantu bazoolwana Gogi muzilundu zyangu zyoonse, Mbwaamba Mwami Leza. Panga lyaumwi aumwi ndeliyoobelesegwa kujaya munyina. 22 Njoomubeteka mukumusubula acuumo akutila bulowa, njooleta mvula yamucobo-cobo iijisi civulamabwe amabwe aapisya aasalufa kulinguwe akuli basilumamba bakwe abantu banji bamisyobo iimbi iilaanguwe. 23 Mbombubo oobo mbwendiyooboonya bupati bwangu abusalali bwangu. Ndiyoolizibya lwangu kumisyobo minji. Ndendilyo nobayooziba kuti ndendime Mwami Leza.”