Ezekiyeli 2
Leza mbwaakaita Ezekiyeli kuba musinsimi
1 Lino wakati kulindime, “Yebo omuntu uulya maila nyamuka, nkanane kulinduwe.” 2 Naakali kukanana, Muuya wa Leza wakaboola kulindime, eelyo ndakanyamuka kati kulindime, 3 “Yebo omuntu ndiyanda kukutuma ku Baisilayeli, kumusyobo muzangi, ooyo wakandizangila, balo abasikale babo balindizangilide mane kusikila sunu. 4 Bantu aabo nkwendikutuma tabamvwi mbaasicinguni. Ukabaambile kuti, ‘Mwami Leza waamba boobu aboobu.’ 5 Nkabela nokuba kuti bakaswiilile nokuba kutaswiilila, mukati mbazangi, bayooziba kuti kuli musinsimi akati kabo. 6 Nkaako yebo, omuntu, utayoowi naaba majwi aabo pe. Utayoowi nokuba kuti masonso amamvwa zyoonse zili kuzingulukide ukkede akati katubanze. Utayoowi anzyobaamba, nokuba kukongwa ambabo nokuba kuti mbantu bazangi. 7 Weelede kubaambila majwi aangu, nkobayooswiilila ankobatakooyooswiilila, mukati mbazangi. 8 Pele yebo omuntu, swiilila eeco ncendikwaambila. Utazangi mbuli buzangide musyobo ooyu, asama ulye ncetikupe.”
9 Mpawo ndakalanga, ndakabona janza litandabede kulindime. Mujanza oomo mwakali bbuku, 10 ndyaakavungununa kumbele lyangu. Kumabazu aalyo oonse kwakalembedwe majwi aakulila, kweema aakuusa.