Ezekiyeli 1
Cilengaano ca Ezekiyeli cakusaanguna ncaakabona bulemu bwa Leza
1 Mumwaka wamakumi otatwe, mumwezi wane, mubuzuba bwasanu, kandikkede abaange kumbali aamulonga wa Kebaa, julu lyakajaluka, eelyo ndakabona zilengaano zya Leza. 2 Ciindi eeci cakali mwaka wasanu mwami Jehoiakini kali mubwaange. 3 Lino majwi aa Mwami Leza akasika kuli Ezekiyeli mupaizi mwanaa Buzi ooko kumbali amulonga wa Kebaa munyika ya Bakalodiya. Nkaako Mwami Leza wakandipa nguzu.
4 Ndakalanga eelyo ndakabona guwo lyuungisya lizwida kulubazu lwakunyika, akkumbi pati lyakali kumwetauka ndabo lyakazingulukidwe amumuni uumwekesya. Mulilo mpuuli akati wakali kulangika mbuli cibulo cibeka-beka. 5 Lino mumulilo ooyo kwakali zyakali kulangika mbuli zilenge zyone zipona bube bwazyo bwakali kulangika mbuli muntu, 6 pele comwe-comwe cazyo cakajisi masyu one amababa one. 7 Maulu aazyo akaliluzi, maulu aazyo akali mbuli aamoombe, akali kubeka-beka mbuli mukuba uusyobedwe. 8 Kunze aakuba aamasya one amababa one zyakajisi maanza aali mbuli aamuntu, zyoonse zyone zyakajisi masyu amababa. 9 Mababa aazyo akaligumene. Cimwi acimwi cakeenda kaciluzi tiizyakali kuleyauka pe.
10 Mboobu mbwaakali kulangika masyu aazyo. Comwe-comwe cazilenge zyone cakali jisi busyu bwamuntu, kulubazu lwakululyo, cimwi acimwi cakajisi busyu buli mbuli bwamusune, alimwi cimwi acimwi cakajisi busyu bwasikwaze. 11 Mbombuboobu masyu aazyo mbwaakabede. Mababa aazyo akali babamukide mujulu, cimwi acimwi cakajisi mababa obilo, limwi alimwi lyakaligumene abbaba lyacilenge cimwi mumabazu oonse mababa obilo akavumbilide mubili waco. 12 Cimwi acimwi cakeenda kaciluzi. Kufumbwa ooko nkozyayanda kuti ziinke zyakali kuunka, tiizyakali kuleyauka.
13 Zilenge zipona eezi zyakali kulibonya mbuli makala aayaka, naa mbuli minzenge. Mulilo wakali kuputauka akati kazilenge wakali kutuba buu eelyo kwakamweka ndabo kuzwa mulinguwo. 14 Zilenge eezi zyakali kuzuzaana mbuli kumweka kwalulabo.
15 Lino nindakali kulangilila zilenge zipona eezi, ndakabona zikwiliba zyone ansi kumbali aazilenge zyoonse, munsi acomwe-comwe kwakali cikwiliba comwe. 16 Mboobu zikwiliba mbuzyakali kulibonya ambuzyakabede. Zyakali kubeka-beka mbuli mabwe aabalangalisya, nkabela zyoonse zyone zyakali mbubonya oobo. Comwe-comwe cazikwiliba eezyo cakali mbuli mubalo wavwili. 17 Lino nizyakali kweenda zyakali kukonzya kuunka kufumbwa kumabazu one ooko kwakalangide zilenge eezi. Zilenge nizyakali kweenda tiizyakali kuleyauka pe. 18 Zikwiliba zyoonse zyone zyakajisi mibalo amasipoko, nkabela mibalo yazyo yakazwide meso koonse-koonse. 19 Lino zilenge zipona nozyakeenda, zikwiliba azyalo zyakali kumbali lyazyo zyakeenda, ciindi zilenge eezyo nizyakali kunyamuka ansi azyalo zikwiliba zyakanyamuka. 20 Kufumbwa ooko zilenge nkuzyakayanda kuunka, azyalo zikwiliba zyakali kuunka, nkaambo muuya wazilenge zipona wakali muzikwiliba eezyo.
21 Ciindi zilenge nizyakali kweenda, azyalo zikwiliba zyakali kweenda, zilenge nizyakaima azyalo zyakaima, zilenge nizyakanyamuka azyalo zikwiliba zakanyamuka anzizyo nkaambo muuya wazilenge zipona wakali muzikwiliba eezyo.
22 Kwakali cintu cakakwakwabukide atala aamitwe yazilenge zipona eezi, cakali kulibonya mbuli mweenya uuvungumene, cakali kubeka-beka mbuli bbwe libalangala akuyoosya. 23 Lino kunsi lyamweenya uuvungumene ooyo, mababa aazilenge akali babamukide cakuyanda kugumana, comwe-comwe cakajisi mababa obilo aakucivumbilila. 24 Zilenge nizyakeenda, ndakamvwa muzunzumina wamababa aazyo, akali kulimvwisya mbuli maanzi aavuuma, mbuli jwi lya Singuzuzyoonse, mbuli kuyobeka kwabasilumamba. Nizyakaima zyakavunga mababa aazyo. 25 Mpawo kwakamvwigwa jwi kuzwa kujulu atala lyamweenya uuvungumene atala aamitwe yazyo ciindi nizyakali kuvunga mababa.
26 Atala amweenya uuvungumene wakali atala lyamitwe yazyo kwakali kulibonya mbuli cuuno cabwami camabwe aacijulu-julu, lino atala acuuno cabwami eeco kwakali cakali mbuli ciimo camuntu. 27 Ndakabona kuti eeco cakali mbuli kuti ncibuno cakwe ooyo wakali kubeka-beka mbuli cibulo civukutwa mumulilo munji, nkaako awalo wakali kulangika mbuli mulilo, mumuni uumwekesya wakali muzingulukide. 28 Mbubonya mbuli buba fulicoongo mumakumbi buzuba liwa mvula, mbubonya oobo bulemu bwakamuzingulukide mbubwakabede.
Mbombuboobu mbubwakabede abulemu bwa Mwami Leza. Nindakabubona ndakavuntama ansi, mpawo ndakamvwa jwi lyayooyo wakali kukanana.