Esita 9
Bajuda mbubakanyonyoona basinkondonyina
1 Lino buzuba bwakkumi aatatu bwamwezi wakkumi aibili wa Adaa bwakasika. Eelyo kwaambilizya kuya kwakusaanguna kwamuleli nikwakeelede kucitwa, buzuba basinkondonyina Bajuda mbubakali kuti babanyonyoone, pele zintu zyakasanduka. Bajuda mbibakazunda basinkondonyina mubuzuba oobo. 2 Bajuda bakabungana kufumbwa ooko nkubakali kukkala muminzi yabulelo. Bakalibambila kulwana kufumbwa ooyo wakali kuyanda kubacisa. Kwakanyina naba omwe wakali kukonzya kubayumina. Nkaambo misyobo yoonse yakali kubayoowa. 3 Kwaambisya boonse balupati-pati mubulelo nkokuti beendelezi, baleli, abaiminizi babulelo, bakagwasya Bajuda, nkaambo bakali kuyoowa Modekayi. 4 Ono cakalizizilwe mubulelo boonse kuti Modekayi wakali muntu uulemekwa kuŋanda yabwami, alimwi mpuwo yakwe yakali kuya buduma. 5 Aboobo Bajuda bakali kukonzya kucita coonse ncobayanda kuli basinkondonyina. Bakabalwana amapanga, akubajaya.
6 Mu Susa, mumunzi mupati, Bajuda bakajaya bantu bali myaanda yosanwe. 7 Akati kabakajaigwa kwakali baaba: Paasyandata, Dalifoni, Asipata. 8 Polata, Adaliya, Alidata, 9 Paamasyita, Alisayi, Alidayi a Vayizata, 10 aabo bakali bana balombe ba Hamani, mwanaa Hamedata ooyo sinkondonyina Bajuda. Pele tiibakasaala zintu zyabo pe.
11 Mubuzuba oobo mbubonya, mweelwe wabantu bakajaigwa mumunzi wa Susa wakaakwaambilizigwa kumuleli. 12 Mpoonya walo wakati kumwami mukaintu Esita, “Mumunzi wa Susa mulikke Bajuda bajaya bantu bali myaanda yosanwe, kubikkilizya abana balombe ba Hamani bali kkumi. Ino mbuti muzisi zimwi. Ino ono ncinzi acimbi ncociyanda? Ndaambila naa kuti kucili acimbi ncoyanda, inga ndakupa.”
13 Eelyo Esita wakaingula kuti, “Naa kuti kacikubotela, zumizya Bajuda mu Susa kuti bazoocite mbubonya mbuli mbubacita sunu. Alimwi mitumba yabana balombe bali kkumi ba Hamani, yaangililwe aazisamu ziya.” 14 Mpawo muleli wakalailila kuti kucitwe oobo, makani aaya akaambilizigwa mu Susa. Aawo mitumba iili kkumi yakaangililwa azisamu. 15 Lino mubuzuba bwakkumi aane bwamwezi wa Adaa, Bajuda bakkala mu Susa bakalibunga-bunga, bakajaya abambi bantu mumunzi bali myaanda yotatwe. Pele tiibakasaala zintu zyabo pe.
16 Bajuda bamwi bakali kukkala muzisi zyabulelo abalo bakalibunga-bunga kuti balikwabilile. Bakajaya basinkondonyina bali zyuulu zili makumi aali ciloba azisanu. Pele tiibakasaala zintu zyabo pe. 17 Oomu mwakali mubuzuba bwakkumi aatatu bwamwezi wa Adaa. Lino mubuzuba bwakkumi aane bakalyookezya. Bakabamba mapobwe aakutangala. 18 Pele Bajuda bamu Susa bakabungana kujaya basinkondonyina, mubuzuba bwakkumi aatatu abwakkumi aane, nkaako bakalyookezya mubuzuba bwakkumi aasanu, bwakaba buzuba bwapobwe lyakusekelela. 19 Nkenkakaako Bajuda bamu minzi ncibakacita buzuba bwakkumi aane bwamwezi wa Adaa kuti bube bwapobwe, kutangala akulyookezya, kabatabeleki pe. Mubuzuba oobu balapana zipego.
Pobwe lyacisolo
20 Modekayi wakalemba zintu eezi akutumina magwalo ku Bajuda boonse bali mubulelo babe balikule abaafwiifwi, 21 kuti babambe buzuba bwakkumi aane abwakkumi aasanu bwamwezi wa Adaa kuti abe mazuba aakulyookezya mwaka amwaka. 22 Aaya ngamazuba Bajuda nibakamuzunda sinkondonyina. Ooyu wakali mwezi wakasanduka zintu zyabuumba kuti zibe zitangazya akubotezya. Bakaambilwa kuti mazuba aaya kabaabamba mukulya mapobwe, kabapana zyakulya alimwi akupa bacete. 23 Aboobo Bajuda bakatobela malailile aa Modekayi, eelyo cakaba ciyanza cakusekelela mwaka amwaka.
24 Hamani, mwanaa Hamedata, sinkondonyina Bajuda walunyungu lwa Agagi, wakauma cisolo cakali kutegwa puu, kuti azibe buzuba bweelede kunyonyoona Bajuda. Wakali kuyanda kuti balobe. 25 Pele Esita wakainka kumuleli, aawo muleli wakaakupa malailile aakalembedwe alo aakapa kuti Hamani aangililwe mbubonya mbuli mbwaakali kuyeeyela Bajuda. Kumane bana balombe bakaangililwa abalo. 26 Nkakaako mazuba aakulyookezya aaya ncaategwa puu nkokuti, “Cisolo.” Lino akaambo kalugwalo lwa Modekayi, alimwi akaambo kazintu zyakacitika kulimbabo, 27 Bajuda bakalibikkila mulawo balo, balunyungu lwabo abaabo bayooba a Bajuda, kuti muciindi ceelede mumwaka amwaka aaya mazuba obilo aleelede kuyoobambwa loko kwiindila mukulailila kwa Modekayi. 28 Cakazuminanwa kuti mukwasyi omwe-omwe wa Bajuda mumazyalani aaza kumbele mubulelo amuminzi yoonse batakalubi kubamba buzuba bwa puu.
29 Aawo mwami mukaintu Esita, mwana wa Abihaili, antoomwe a Modekayi Mujuda, bakalemba lugwalo lumwi lutondezya nguzu zyalugwalo lwakali kwaamba zya puu. 30 Lugwalo oolo lwakalembeledwe Bajuda boonse, akutuminwa muzisi zyoonse zili mwaanda amakumi obilo aciloba zyamubulelo bwa Zekisesi. Lugwalo oolo lwakali kuyandila Bajuda luumuno akuliiba, 31 akubalailila kuti balo alunyungu lwabo kababamba mazuba aa puu muziindi zyawo zyeelede, mbubonya mbuli mbobakali kutobela milawo yaziyanza zyakuliimya kulya azyadilwe. Ooku kulailila kwakapegwa a Modekayi alimwi amwami mukaintu Esita. 32 Mulawo wa Esita wakukkazika puu, wakalembwa azilembelo zyamazuba aayo.