Esita 7
Hamani mbwaakaangililwa
1 Nkaako muleli a Hamani bakainka kuyoolya amwami mukaintu Esita. 2 Nibakali kunywa waini mubuzuba bwabili oobo, muleli wakabuzya kuti, “Omwami mukaintu Esita ncinzi ncoyanda kuti ndikucitile? Ndilakupa ncobeni. Ncinzi ncoyanda? Inga ndakupa niciba cisela cabulelo bwangu.”
3 Mwami mukaintu Esita wakaingula kuti, “Kuti naa koboteledwe andime akuyanda kundipa ceeco ncekukumbila ndalikuyanda kuti nkecipona, kutali buyo ndime pele abantu bangu mbubonya! 4 Nkaambo mebo abantu bokwesu twaambilizigwa kuti tunyonyoonwe, tujaigwe tulobe. Kuti nitwaulisigwa buyo kuti tube bazike nindaumuna buyo. Ani inga ndamupenzezya nzi muleli amakani aali boobu!”
5 Mpoonya muleli Zekisesi wakabuzya mwami mukaintu Esita kuti, “Nguni muntu ooyo uunga wacita cili boobo?”
6 Esita wakaingula kuti, “Sinkondoma, uutupenzya, nguyooyu muntu mubi Hamani!”
Aawo Hamani kabwembwa wakalanga amuleli amwami mukaintu. 7 Muleli wakanyamuka cakunyema, wazwa muŋanda waya anze mumyuunda yaŋanda yabulelo. Hamani wakabona kuti kucinyina zibotu. Wakasyaala mukati kalikombelezezya buumi kuli Esita. 8 Lino muleli naakapilukila kuzwa mumyuunda, Hamani wakaliwaala acikkalilo ca Esita. Mpawo muleli wakapozomoka akuti, “Ooyu muntu uyanda kujata mwami mukaintu nkelibwenene muŋanda yangu?”
Mbwaakaambila buyo oobo muleli, bazibe bakavumba busyu bwa Hamani. 9 Aawo Haabona umwi wabazibe bakali kubelekela muleli wakati, “Kuli zisamu zilampa tukokola tuli makumi osanwe zisimpidwe munsi aaŋanda ya Hamani. Wakazisimpilide Modekayi wakafutula buumi bwamuleli.”
Muleli wakalailila kuti, “Amukamwaangilile ali nzizyo.”
10 Mbombuboobu Hamani mbwaakaangililwa azisamu nzyaakasimpilide Modekayi. Aawo muleli wakaleka kunyema.