Esita 6
Modekayi mbwaakasumpulwa
1 Masiku aaya ngoonya, muleli wakaba aacilabila, wakalailila kuti kuletwe mabbuku oomo mulembedwe zyabulelo bwakwe abalilwe. 2 Kwakajanika kuti kwakalembedwe zyambuli Modekayi mbwaakayubununa zya Bigitana a Telesyi, balupati-pati bobilo bakali balindizi bamulyango alimwi bakali kuyanda kujaya muleli Zekisesi. 3 Muleli wakabuzya kuti, “Ino Modekayi wakalemekwa akupegwa bulumbu buli buti akaambo kaceeci ncaakacita?” Babelesi ba mwami bakaingula kuti, “Taaku pe.” 4 Muleli wakabuzya kuti, “Sena taakwe balupati-pati bangu bali momuno muŋanda?”
Nceciindi eeco Hamani ncaakazwa akunjila mubbuwa lyaŋanda yabwami, kuti azooambe zyakwaangilila Modekayi azisamu nzyaakasimpa. 5 Balupati-pati bakaambila muleli kuti, “Hamani uliimvwi mubbuwa.” Aawo wakalailila kuti bamunjizye.
6 Hamani naakanjila, muleli wakamubuzya kuti, “Ino muntu ooyo muleli ngwakondeledwe weelede kulemekwa buti?”
Aawo Hamani wakayeeya kuti, “Ani nguni uumbi muleli ngwanga walemeka kunze aandime?” 7 Wakaingula kuti, “Ooyo muntu muleli ngwayanda kulemeka, 8 aletelwe jansi lyabwami mbuli lisama muleli, bbiza mbuli ndyatanta, ampande yabwami ibikkwe amutwe walyo. 9 Eelyo umwi wabalupati-pati bako omuleli uuzizilwe asamike muntu ooyo jansi, asolwede walemekwa uulya uutantide abbiza mumigwagwa yamunzi, kayabwaambilizya kuti, ‘Amubone muleli mbwalumbula yooyo ngwayanda kulemeka!’”
10 Aawo muleli wakalailila Hamani kuti, “Fwambaana, bweza jansi abbiza ucitile Modekayi Mujuda ooyo uukkala amulyango wamwami nzyooamba. Zyoonse uzicite, taakwe ncotisiye pe.”
11 Aboobo Hamani wakabweza jansi abbiza. Wakasamika Modekayi, mpoonya Modekayi wakatanta abbiza, Hamani kasolwedela abbiza mumigwagwa yamunzi, kaya bwaambilizya kuti, “Amubone muleli mbwalumbula yooyo ngwayanda kulemeka!”
12 Kuzwa waawo Modekayi wakapilukila kumulyango wamwami, pele Hamani wakapilukila kuŋanda yakwe kalijisi kumutwe mukuusa. 13 Wakaambila beenzinyina amukaintu wakwe zyoonse zyakacitika kulinguwe. Balailili bakwe antoomwe amukaintu wake bakati, “Mbuli Modekayi ooyo uuyanda kukuwisya mbwali Mujuda totimuyumine pe ulanyonyooka.” 14 Kabacaamba boobo bazike bamuleli bakasika kuzootola Hamani kupobwe lyakacitide Esita.