Esita 3
Hamani mbwaakakanza kuti Bajuda bajaigwe
1 Lino musule aakooku, muleli Zekisesi wakasumpula mwaalumi umwi wakali kwiitwa kuti Hamani akumupa cuuno cipati kwiinda balupati-pati bakwe bamwi boonse. Hamani wakali mwanaa Hamedata, walunyungu lwa Agagi. 2 Balupati-pati boonse bakumulyango wamuleli bakali kufugama mukulemeka Hamani, nkaambo mbombuboobu muleli mbwaakalaililide. Nikubaboobo Modekayi taakwe naakali kufugama mukulemeka Hamani. 3 Balupati-pati baamulyango wamuleli bakabuzya Modekayi kuti, “Nkaambo nzi ncotatobeli malailile aamuleli?” 4 Buzuba abuzuba bakali kumwaambila pele taakwe naakaswiilila. Kumamanino wakaingula kuti, “Mebo ndi Mujuda, aboobo nsikonzyi kufugamina Hamani pe.” Aawo bakamwaambila Hamani makani aaya, kuti babone naa inga Hamani ulamucita buti Modekayi. 5 Hamani wakanyema kapati naakabona kuti ncobeni Modekayi taakali kumufugamina, 6 alimwi naakaziba kuti Modekayi wakali Mujuda wakayeeya kuti teelede kuti asubule buyo nguwe alikke, pele kuti Bajuda boonse bali mubulelo bwa Pesiya basubulwe.
7 Lino mumwaka wakkumi aibili wakulela kwa Zekisesi mumwezi wakusaanguna wa Nisani, Hamani wakalailila kuti kuumwe cisolo ncibakali kuti puu, mukuti azibe buzuba amwezi ngwanga wacita nzyaakali kuyeeya. Nkabela buzuba bwakkumi aatatu bwamwezi wakkumi aibili, mwezi wa Adaa mbubwakasalwa.
8 Hamani wakaambila mwami Zekisesi kuti, “Kuli bantu bamwi bamwaikide koonse-koonse mubulelo bwakwe, bantu bamwi aabo balalizandula. Ziyanza zyabo ziliindene azyabantu bamwi. Kwamana tabatobeli milawo yamuleli, tacigwasyi pe kuti balekwe buyo. 9 Kuti kacikubotela, omuleli, lailila kuti bantu aabo banyonyoonwe. Naa kwacitwa oobu ndakonzya kupa matalenta aansiliva aali zyuulu zili kkumi kuciyobwedo cabulelo aakonzya kugwasya mukweendelezya milimo yabulelo.”
10 Lino muleli wakagwisya nweenwe yakwe eeyo yakali kubelesegwa mukudinta makani aakwaambilizya kubantu, wakiipa Hamani mwanaa Hamedata walunyungu lwa Agagi, sinkondonyina Bajuda. 11 Muleli wakamwaambila kuti, “Mali ngaako, ulakonzya kucita kufumbwa cikubotela abantu aaba.”
12 Aboobo, mubuzuba bwakkumi aatatu bwamwezi wakusaanguna Hamani wakaita balembi bamuleli akubaambila kuti balembe magwalo mumisyobo iikananwa mubulelo boonse, akuti atuminwe kubaleli abeendelezi, abalupati-pati boonse. Makani aaya akalembwa muzina lyamuleli Zekisesi akudintwa anweenwe yakwe. 13 Basimposo bakatola kwaambilizya ooku kuzisi zyoonse zyabulelo. Makani akali aakuti mubuzuba bomwe, bwakkumi aatatu bwamwezi wa Adaa, Bajuda boonse, baniini bapati, bakaintu abana, bakajaigwe. Bakanyonyoonwe cakutabeengelela alimwi alubono lwabo lutolwe. 14 Zyakali mumagwalo aayo zyakeelede kubalwa muzisi zyoonse kuti boonse balibambilile zyabuzuba oobo.
15 Kwiindila mukulailila kwamuleli, bantu bakaambilizya mulawo ooyo mumunzi wa Susa, aawo basimposo bakainka cakufwambaana, kuyooambilizya mulawo ooyo muzisi zyoonse zyabulelo. Kuzwa waawo muleli a Hamani bakatalika kunywa. Aawo bantu baku Susa bakalinyongene.