Esita 1
Pobwe lya mwami Zekisesi
1 Muciindi cakulela kwa Zekisesi waku Pesiya, ooyo wakali kulela zisi zili mwaanda amakumi obilo aciloba, kutalikila ku Indiya kusikila ku Kusyi. 2 Munzi wakwe mupati wakali Susa.
3 Mumwaka watatu wakulela kwakwe, Zekisesi wakabambila balupati-pati bakwe pobwe. Basololi babasilumamba baku Pesiya a Mediya, baziinga zyabwami, abalupati-pati bazisi bakaliko. 4 Kwamyezi iili cisambomwe wakali kutondezya lubono lwabulelo akukomena kwabulemu bwakwe.
5 Kumamanino mwami wakacitila bantu bamunzi wa Susa pobwe bavubide abacete. Lyakatola mvwiki yoonse. Pobwe lyakalidwa mubbuwa lyaŋanda yabwami. 6 Kwakali masani aalengelela aatuba aacijulu-julu aakaangidwe tutali twandeketela toosedwe kabotu twamusyobo twacisombo. Akacimbaulidwe atuninga twansiliva kuzicinda zyamabwe meebesi. Mubbuwa oomu mwakali zikkalilo zyangolida zyakali aamabwe aabeka-beka akusyuukila canyanzabili aayalidwe kabotu. 7 Waini wakali kupedwa munkomeki zyangolida ziindene-indene awalo waini wabwami wakali munji kapati mbuli bwakali kuyanda muleli. 8 Kweendelana akulailila kwamwami bantu bakali kulinywida, umwi wakali kunywa kufumbwa mbwaakali kuyanda.
9 Ciindi nciconya eeco, awalo mwami mukaintu Vasyiti wakabambila bamakaintunyina pobwe muŋanda yabwami.
10 Mubuzuba bwaciloba aawo muleli katangede, wakalailila bazibe bakali ciloba bakali kumukutaukila. Aaba bakali ba: Mehumani, Bizita, Haabona, Bigita, Abagita, Zetaa a Kaakasi. 11 Wakabaambila kuti bakaite mwami mukaintu Vasyiti kasamine musini wabwami, kuti azootondezye bweebesi bwakwe kubantu abalupati-pati, nkaambo wakali mubotu. 12 Pele bantu aaba nibakaakumwaambila zyakalailila muleli, Vasyiti wakakaka kuunka. Eeci cakapa kuti muleli anyeme kapati.
13 Cakali ciyanza kuti muleli abuzye-buzye basongo bakazi zyamulawo, wakaita basongo 14 bakali kusyomeka kapati. Aaba mbaa: Kaasyena, Syetaa, Adimata, Taasyisyi, Melesi, Maasena a Memukani. Antoomwe bakali ciloba, mbabalupati-pati bakali kusyomeka mubulelo bwa Pesiya a Mediya. 15 Eelyo wakati kulimbabo, “Kweendelana amulawo, ncinzi ceelede kucitwa kumwami mukaintu Vasyiti?” Bakaingula kuti, “Taaswiilila kulailila kwamuleli nibamwaambila bazibe.”
16 Mpoonya aawo Memukani wakaambila muleli abalupati-pati bakwe kuti, “Mwami mukaintu Vasyiti taabisizya buyo muleli, pele wabisizya balupati-pati abantu boonse bakkala muzisi zyamuleli Zekisesi!
17 “Cacita mwami mukaintu ooyu ciyoomvwigwa abamakaintu boonse, nkaako banoovoolozya baalumi babo kabati, ‘Kayi mwami mukaintu wakaliitidwe amuleli pele taakaatobela malailile aayo.’ 18 Nikuba sunu ndilyonya, bamakaintu babalupati-pati baku Pesiya a Mediya aabo bamvwa bayoocitila baalumi babo mbubonya, ciyooleta nzwanga akupampana. 19 Aboobo naa kaciluleme kulinduwe omuleli ooyu mukaintu atakalibonyi limbi kulinduwe pe, alimwi kuzwa sunu kulailila ooku kulembwe mubbuku lyamilawo ya Pesiya a Mediya kuti kutakalekwi. Ono mubusena bwakwe kunjizigwe uumbi uuli kabotu. 20 Kwamana mulawo ooyu ngotipange omuleli waakwaambilizigwa mucisi cako coonse eeci, bamakaintu banoolemeka baalumi babo babe balupati-pati naa bantu buyo.”
21 Muleli abalupati-pati bakwe bakabotelwa akulailila ooku, nkaako muleli wakacita mbubonya bwakayeeya Memukani. 22 Wakatumya magwalo kuzisi zyakwe zyoonse, cisi comwe-comwe lugwalo lwaco alimwi kumusyobo amusyobo mumulaka wawo, kwaambilizya kuti mwaalumi ngomupati mumukwasyi wakwe.