Daniyeli 9
Daniyeli mbwaakakombela bantu bokwabo
1 Mumwaka mutaanzi wakulela kwa Daliyasi mwanaa wa Ahazuweliyasi Mumedi, ciindi naakali kweendelezya bwami bwa Bakalodiya, 2 iiyi, mumwaka mutaanzi wakulela kwakwe, mebo nde Daniyeli ndakamvwa mumalembo, kwiindila mumajwi aa Mwami Leza ngaakaambila Jelemiya musinsimi, kuti kunyonyoonwa kwamunzi wa Jelusalemu kuyootola myaka iili makumi aali ciloba. 3 Aboobo ndakalanga ku Mwami Leza akumukombelezya kwiindila mukukomba, kulibombya, kuliimya kulya, kusama masaka akulibikka twe.
4 Ndakakomba ku Mwami Leza wangu akulyaamba zinyonyoono. Ndakati, “O Mwami, uli Leza mupati, alimwi ulayoosya, ulabamba cizuminano cako caluyando kuli baabo boonse bakuyanda akuswiilila malailile aako. 5 Twakakubisizya, twakalubizya. Twakali bantu babi, twakali kuzangilide, twakasiya malailile amilawo yako. 6 Tiitwakaswiilila babelesi bako basinsimi, aabo bakakanana kubami besu, baleli besu abamatata akubantu boonse munyika muzina lyako.
7 “O Mwami, uliluleme, pesi swebo mubuzuba buno tuluuside, nkokuti bantu bamucisi ca Juda abantu bamu Jelusalemu a Baisilayeli boonse, baafwiifwi abakulaale, muzisi zyoonse oomo mookabamwaisizya akaambo kakutasyomeka kwesu. 8 O Mwami Leza, swebo abami besu, baleli abamatata, tuluuside nkaambo twakakubisizya. 9 Mwami Leza wesu ngusilweengelelo, ulalekelela, nokuba kuti twakamuzangila. 10 Tiitwakaswiilila Mwami Leza wesu nokuba kubamba milawo yakwe eeyo njaakatupa kwiindila mubabelesi bakwe basinsimi. 11 Baisilayeli boonse bakasotoka mulawo wako akuufutatila, bakakaka kukuswiilila. Nkaako nsinganyo zyoonse zilembedwe mumulawo wa Mozesi, mubelesi wa leza, zyatusikila nkaambo twakakubisizya. 12 Ono wazuzikizya majwi aakaambwa azyandiswe azyabaleli besu mukutuletela mapenzi mapati. Ansi aano mbukwakali kuba taakwe cakacitikide mbuli cakacitika kumunzi wa Jelusalemu. 13 Mbubonya mbuli mbokulembedwe mumulawo wa Mozesi, mapenzi oonse aaya atuboolela, nikuba boobo taakwe nitwakulilila, O Mwami Leza wesu, kuti utufwide luzyalo mukuti twaleka zinyonyoono zyesu akuswiilila kasimpe kako. 14 Mwami Leza taakasyasyaala kutuletela mapenzi, nkaako Mwami Leza wesu uliluleme muli zyoonse nzyacita, pele tiitwakamuswiilila.
15 “Lino O Mwami Leza wesu, yebo ookagwisya bantu bako mu Ijipiti anguzu zyajanza lyako, ookaba aazina eelyo liliko lyoonse asunu, twakabisya, twakalubizya. 16 O Mwami, kweendelana amilimo yako iiluleme, leka kunyemena munzi wa Jelusalemu cabukali, munzi wako, cilundu cako cisalala. Zinyonyoono zyesu abubi bwabasikale besu nzizyakacita kuti munzi wa Jelusalemu abantu bako babe cisampuzyo kuli baabo boonse batuzingulukide.
17 “Lino O Leza wesu, swiilila kukomba a kulibombya kwamubelesi wako. Akaambo kanduwe, O Mwami, etelela busena bwako busalala bumwaidwe. 18 Teya matwi aako O Leza, utumvwe, langa ubone lunyonyooko lwamunzi wiitwa zina lyako. Tatukukumbili zeezi akaambo kakuti tuliluleme, pele akaambo kalweengelelo lwako lupati. 19 O Mwami swiilila! O Mwami tulekelele! O Mwami tumvwe utugwasye! Akaambo kanduwe, O Leza wangu, utamuki kutugwasya, akaambo kamunzi wako abantu bako babandwa zina lyako.”
Gabuliyeli mbwaakapandulula businsimi oobu
20 Lino indakacili kukanana akukukomba, kandilyaamba cinyonyoono cangu acinyonyoono cabantu ba Isilayeli, akukumbila Mwami Leza wangu akaambo kacilundu cakwe cisalala, 21 kandicikomba, Gabuliyeli muntu uulya ngundakabwene mucilengaano kusaanguna, wakaboola kulindime kazabuuluka cakufwambaana aciindi cipaizigwa cipaizyo cakumangolezya. 22 Wakandilailila wakati, “Daniyeli, lino ndaboola kuti ndizookupe maanu abusongo. 23 Mbootalikila buyo kukomba, waingulwa ncencico ncindaboolela kuti ndizookwaambile, ulayandwa kapati. Nkaako mboobu mbwaabede makani, umvwisye cilengaano.
24 “Kwabikkwa mvwiki, myaka, amazuba aali makumi aali ciloba avuzigwe aciloba kubantu bokwanu amunzi uusalala kuti nsotoko zimane, muleke kucita zinyonyoono, mukombelezezye babi, mutalike kucita ziluleme zyalo, zilengaano abusinsimi zimane, busena busalala busalazigwe.
25 “Weelede kuziba eeci ucimvwisye. Kuzwa ciindi nikwaambwa kuti munzi wa Jelusalemu ubukulusigwe akuyakululwa kusika kuciindi cakusika kwa Munanike kuyooba mvwiki zili ciloba zivuzigwe aciloba, amvwiki zili makumi aali cisambomwe azibili. Uyooyakululwa akuba aamigwagwa akankolola, pele cinooli ciindi camapenzi. 26 Kwaakwiinda mvwiki zili makumi aali cisambomwe azibili, Munanike uyoogwisigwa, taakwe ncanoojisi. Bantu bamuleli aabo bayooboola bazoonyonyoona munzi abusena busalala. Mamanino ayooboola mbuli zambangulwe. Nkondo inooliko mane kusikila kumamanino, nkaambo kwakalaililwa kuti zinyonyoonwe. 27 Uyoobamba cizuminano abantu banji mumvwiki yomwe, pele akati kamvwiki eeyo, uyoolesya zipaizyo azituuzyo. Lino sikusaala ooyo uyooboola azisesemyo kumagolelo aaŋanda ya Leza, mane kusikila awalo bukamweelele.”