Daniyeli 8
Cilengaano ca Daniyeli camugutu asijembwe
1 Mumwaka watatu wakulela kwamwami Belisyaza, mebo nde Daniyeli, ndakabona cilengaano, kuleka ceciya ncindakabwene. 2 Mucilengaano cangu eeci ndakalijana kuti ndakali mulukwakwa lwa Susa mucibeela cacisi ca Elamu. Mucilengaano eeci ndakali kumbali aamulonga wa Ulayi. 3 Ndakalanga, eelyo ndakabona mugutu wakajisi meja obilo, wakaliimvwi kumbali aakankolola, meja aakwe akali malamfu. Lumwi lwija lwakali lulamfu kwiinda lumwi, pele alwalo oolu lumwi lwakalampa kwiinde ciindi. 4 Ndakalangilila mugutu ooyo naakali kudinkaula kaya buya kumbo, kunyika, akumusanza. Taakwe munyama wakali kukonzya kumwiimina, taakwe wakali kukonzya kuvuna pe. Wakacita kufumbwa oobo mbwaakali kuyanda, aboobo wakaba aampuwo mpati.
5 Lino nindakali kuyeeya akaambo kaceeci, ndakabona sijembwe wakajisi lwija lugambya akati kameso aakwe, wakazwida kumbo, wakakosola nyika yoonse katagumi ansi. 6 Wakasika ooko kwakali mugutu wakajisi meja obilo, mugutu ooyo ngundakabona wakaimvwi kumbali akankolola. Sijembwe wakamuzuzaanina cabukali. 7 Ndakamubona kalwana mugutu akumutyolela meja aakwe obilo. Mugutu taakakonzya kumuyumina pe, sijembwe ooyo wakabbunta mugutu akumulyatauka, taakwe wakali kukonzya kufutula mugutu kuzwa kuli sijembwe ooyo. 8 Sijembwe ooyu wakaba aampuwo mpati, pele naakacili aanguzu lwija lwakwe lupati lwakatyoka, eelyo mubusena bwalo kwakamena meja one aagambya aakalangide kumyuuwo yone yakujulu.
9 Lino kuzwa kulwija lumwi kwakamena lwija lumbi, lwakali lusyoonto pele lwakaba aanguzu kulubazu lwakumusanza, kujwe kalulanga kunyika mbotu. 10 Lwakakomena mane lwaakusika kumakamu-makamu aazyakujulu, nkabela lwakalosya makamu amwi anyenyezi akwaalyatauka. 11 Lwakalisumpula kapati akulicita mbuli muleli wamakamu-makamu aakujulu, lwakalesya cipaizyo camuleli cabuzuba abuzuba, busena bwakwe busalala bwakamwaigwa. 12 Lino akaambo kabuzangi lwakapegwa makamu-makamu aakujulu acipaizyo cabuzuba abuzuba. Lwakazwidilila muzintu zyoonse nzilwakacita, bwini bwakasowelwa ansi.
13 Mpoonya ndakamvwa umwi uusalala kakanana, aumwi uusalala wakati kulinguwe, “Ino cilatola ciindi cilamfu buti kuti cilengaano cizuzikizigwe, nkokuti cilengaano cacipaizyo cabuzuba abuzuba, cabuzangi oobo buleta lunyonyooko, cakusiya busena busalala acamakamu-makamu aayo ayoolyataukwa?”
14 Wakati kulindime, “Cilatola masiku amasikati aali zyuulu zyobilo amyaanda yotatwe, eelyo busalali buyoosalazigwa alimwi.”
Mungelo Gabuliyeli mbwaakapandulula cilengaano
15 Lino mebo nde Daniyeli nkecilangilila cilengaano eeci akusoleka kuti ndiyeeye ncocaamba, kwakaima umwi wakali kulangika kuti muntu wini. 16 Mpawo ndakamvwa jwi lyamuntu kuzwa kunkomwe ya Ulayi kaliti, “Gabuliyeli, ambila muntu ooyo ncocaamba cilengaano eeci.”
17 Lino naakaswena aafwiifwi abusena aawo mpindakaimvwi, ndakayoowa akuvuntama ansi. Wakati kulindime, “Yebo omuntu, cilengaano eeci caamba mamanino aaciindi.”
18 Kacaambaula kulindime, ŋonzi zyakanditola, ndakalivunteme. Mpoonya wakandijatilila akundiimika.
19 Wakati, “Ndiyanda kukwaambila ciyoocitika kumbele ooku muciindi cabukali bwa Leza, nkaambo cilengaano eeci caamba ciindi camamanino cibikkidwe. 20 Mugutu wameja obilo uulya ngoobona wiiminina bami baku Mediya aku Pesiya. 21 Sijembwe wamavwele mmwami waku Gilisi, lwija lupati luli akati kameso aakwe mmwami mutaanzi. 22 Meja one aalya aatola busena bwalwija lwatyoka aiminina malelo one ayooba, bwami bomwe mucisi eeci pele tabukoonoojisi nguzu mbuli zitaanzi pe.
23 “Lino kumamanino aakulela kwabo, bazangi nibayooindilila kubija, kuyooba mwami mukali, sitwaambyo. 24 Uyooba aanguzu, pele zitali nguzu zyakwe mwini pe. Uyoocita ziyoonyonyoona kapati, nkabela uyoozwidilila mulizyoonse nzyacita. Uyoonyonyoona basintanze abantu basalala. 25 Uyoocita kuti mubucenjezu bwakwe lucengo lukazwidilile, uyoolitondezya kuti ulicenjede kapati. Baakuliiba, uyoojaya bantu banji, uyooba muleli wabaleli. Nikuba boobo uyoonyonyoonwa, pele kutali aanguzu zyabantu pe.
26 “Cilengaano camasiku asikati ncoobona ncakasimpe, pele cileke cilengaano eeco, nkaambo caamba mazuba aaboola.”
27 Mebo nde Daniyeli ndakalikatede akuciswa kwamazuba manji. Mpoonya ndakabuka akutalika kubeleka mulimo wamwami. Cilengaano cakandiyoosya, tiindakacimvwa ncocaamba pe.