Daniyeli 7
Cilengaano cabanyama bone ca Daniyeli
1 Mumwaka mutaanzi wakulela kwa Belisyaza mwami wa Babuloni, Daniyeli wakalota, eelyo wakabona zilengaano naakali kulota kalede abulo. Mpawo wakalemba makani aaciloto cakwe.
2 Daniyeli wakati, “Mucilengaano cangu ncindakabona masiku, ndakalanga, ndakabona myuuwo yone yakujulu kaikopenganya lwizi lupati. 3 Mpoonya kwakazwa banyama bone, mulwizi oolo, banyama aaba bakali bamisyobo-misyobo.”
4 Munyama wakusaanguna wakali mbuli syuumbwa, wakajisi mababa aali mbuli aasikwaze. Ndakalangilila mane kusikila mababa aakwe naakamonsoolwa, eelyo wakanyamunwa kuzwa ansi cakuti wakaima amaulu obilo mbuli muntu kumane wakapegwa moyo wabuntu.
5 Kumbele lyangu kwakali munyama wabili, wakali kulangika mbuli munyama wabutambo. Kulubazu lumwi lwakwe wakalinyamwidwe, wakalumide tubambo totatwe mukanwa lyakwe. Wakaambilwa kuti, “Buka ulye nyama yako!”
6 Kunze lyaceeci, ndakalanga, ndakabona munyama uumbi kumbele lyangu, munyama ooyo wakali kulangika mbuli siluwe. Amusana wakajisi mababa one aali mbuli aamuyuni. Munyama ooyu wakajisi mitwe yone, alimwi wakapegwa nguzu zyakulela.
7 Kumane ceeci, mucilengaano cangu masiku ndakalanga, eelyo ndakabona munyama wane kumbele lyangu, wakali kuyoosya akutilimuna, kali wanguzu kapati. Wakajisi meno mayumu aalubulo, nkaako wakali kulya akutyoloola nzyaakalwana alimwi wakalyatauka amaulu kufumbwa eeco cakasyaala. Wakalaandeene abanyamanyina boonse baya bakusaanguna, wakajisi meja aali kkumi.
8 Lino kandiyeeya zyameja aayo, ndakabona lwija lumwi kumbele lyangu, lwakali lusyoonto, lwakamenede akati kameja amwi, lino otatwe aakanyukulwa kumbele lwalyo. Lwija oolu lwakajisi meso aali mbuli meso aamuntu, kalujisi amulomo, lwakali kukanana cakulisumpula.
9 Lino nindakalangide, ndakabona kwakabikkwa zyuuno zyabwami mubusena bwazyo, nkabela ooyo Walyoonse wakakkala acuuno cakwe. Zisani zyakwe zyakali kutuba buu mbuli caanda, masusu aakwe akali kutuba mbuli boya bwambelele. Cuuno cakwe cabwami cakali kuvwilima mulilo, mavwili aaco oonse akali kuyaka. 10 Mulonga wamulilo wakali kukunka, mulonga ooyu wakali kuzwida kulinguwe. Zyuulu-zyuulu zyababelesi zyakali kumukutaukila, bantu bali zyuulu zili makumi-makumi bakali kumubelekela, bakakkala mulubuwa, eelyo mabbuku akajalulwa.
11 Ndakacili kulangilizya akaambo kamajwi aakulisumpula aakali kwaamba lwija luya. Ndakali kulangilizizye mane kusikila munyama naakajaigwa, mutunta wakwe wakanyonyoonwa akusowelwa mumulilo uuvwilima. 12 Banyama bamwi bakanyangwa nguzu zyabo, pele bakalekelwa kuti kabacipona kwaciindi cili mbocibede.
13 Mucilengaano cangu masiku ndakalanga, lino kumbele lyangu ndakabona muntu uuli mbuli muntu uulya maila, kaboola amakumbi aakujulu. Wakaswena aafwiifwi aliyooyo walyoonse alyoonse, eelyo wakaletwa kumbele lyakwe. 14 Wakapegwa nguzu, bulemu abwami, bantu boonse mumasi, amisyobo yoonse bakamukomba. Bweendelezi bwakwe mbweendelezi butakamani alili pe, bwami bwakwe mbwami butakoolwi pe.
Zilengaano mbuzyakapandululwa
15 Mebo nde Daniyeli ndakapenzegwa kapati mumoyo, zilengaano zyamoyo wangu zyakandikatazya kapati. 16 Aboobo ndakainka kuli umwi wababaya baimvwi waalya akumubuzya kuti andaambile kasimpe caamba makani aaya. Aboobo wakandaambila akundipandulwida zintu zyoonse eezi. 17 Wakati, “Banyama bone bapati malelo one aayo aayooba munyika. 18 Pele basalali ba Mutalabala bayootambula bwami, buyooba bwabo kwalyoonse alyoonse, iiyi, kwalyoonse alyoonse.”
19 Aawo ndakayandisisya kuti ndizibe zyamunyama wane, ooyo wakaandeene kuzwa kubanyamanyina boonse, wakali kuyoosya kapati, wakajisi meno mbuli lubulo amala aamukuba, munyama ooyo wakapwayaula akutyoloola aabo mbaakalwana akulyatauka eezyo zyakasyaala. 20 Alimwi ndakayanda kuti ndizibe azyameja aakali mumutwe wakwe, aali kkumi alwija luya lwakamena akukulumbula yaalya otatwe, lwija luya lwakali kuyoosya kapati kwiinda amwi, lwakajisi meso amulomo wakali kwaambaula cakulisumpula. 21 Nkendilangilila, lwija oolu lwakali kulwana basalali lwakabazunda, 22 mane kusikila Walyoonse alyoonse naakasika akulupa mulandu kuti avune basalali ba Mutalabala, ciindi caakusika cakutola bwami.
23 Wakandipandulwida boobu. Munyama wane mbwami bwane buyoobonwa munyika. Bunooandeene amalelo oonse, nkabela buyoonyonyoona nyika yoonse, buyooilyatauka akwiiola. 24 Meja aali kkumi mbami bali kkumi bayoozwa mubwami oobu. Baakumana aaba kuyooboola mwami uuli kunooandeene ababaya bakasaanguna, uyoozunda bami botatwe. 25 Uyoosampaula, Mutalabala akudyaminina basalali bakwe, uyoosoleka kusandula ziindi amilawo. Basalali bayooabwa kulinguwe kwa myaka yotatwe acisela.
26 Pele uyoobetekwa, nkabela uyoonyangwa nguzu zyakwe uyoonyonyweedwa limwi kukabe kutamani. 27 Lino bwami, nguzu abupati bwamalelo munyika yoonse ziyoopegwa kubasalali, bantu ba Mutalabala. Walo bwami bwakwe mbwami butakamani, baleli boonse bayoomukomba akumuswiilila.
28 Mpaamanina makani aaya. Mebo nde Daniyeli ndakapenzegwa kapati mumizeezo yangu, ciwa cangu cakasanduka, pele makani aaya ndakaabamba mumoyo wangu.