Daniyeli 12
Ciindi cakumamanino
1 Kuciindi eeco, Mikayeli mungelo mupati uukwabilila bantu bako, uyoobuka. Kuyooba ciindi camapenzi aayoosya aatanabwenwe kuzwa kuciindi kakutanaba masi pe. Pele ciindi eeco bantu bako, boonse bali aamazina aalembedwe mubbuku bayoofutulwa. 2 Nkabela bantu banji balede mubulongo ansi, bayoobuka, bamwi bayoobukila buumi butamani, bamwi bayoobukila nsoni amasampu aatakamani pe. 3 Aabo basongo bayoobala mbuli bubekema julu, aabo baleta bantu kubululami, bayoobala mbuli nyenyezi kwalyoonse alyoonse. 4 Pele yebo O Daniyeli, jala bbuku amajwi aandilyo mane kusika kumamanino aaciindi. Bantu banji bayootuntulika ooku akooku kuti bayungizye luzibo.
5 Mpoonya mebo nde Daniyeli ndakalanga, lino kumbele kwakaimvwi bantu bambi bobilo, umwi wakaimvwi mutala lino lyankomwe yalwizi, umwi mutala liya. 6 Umwi wabo wakabuzya yooyo wakasamide zisani zyandeketela, wakali atala lyamaanzi aamulonga wakati, “Ino zintu eezi zigambya ziyoocitika lili?”
7 Muntu ooyo wakasamide zisani zyandeketela wakaimvwi atala amaanzi aamulonga, wakatambika maanza aakwe kujulu, ndakamumvwa kakonka muzina lyayooyo Uuliwo lyoonse kati, “Kuyooba myaka yotatwe acisela. Lino bantu basalala baakumwaisigwa, zintu zyoonse eezi niziyoocitika.”
8 Ndakamvwa, pele tiindakaziba pe. Aboobo ndakabuzya kuti, “Simalelo wangu, ino mamanino aazyoonse ayooba buti?”
9 Wakandiingula kuti, “Koya buyo, Daniyeli, kayi majwi aali mubbuku eeli ajalwa, mane kusikila kumamanino aaciindi. 10 Bantu banji bayoosalazigwa, tabanoojisi tumpenda, banoosalala, pele sizibi unooli sizibi lyoonse. Taakwe sizibi naba omwe uuyoomvwisya, pele aabo basongo bayooziba.
11 “Lino kuzwa ciindi eeco zipaizyo zyabuzuba abuzuba noziyoobelesegwa, kwaakubikkwa cisesemyo ca lunyonyooko kuyooba mazuba aali cuulu amyaanda yobilo amakumi aali fuka. 12 Ulilelekedwe ooyo uulindilila kusika kumamanino aamazuba aali cuulu amyaanda yotatwe amakumi otatwe aasanu.
13 “Pele yebo, koya buyo mane kusikila kumamanino. Uyoolyookezya, lino kumamanino aamazuba uyoobuka kuti ukatambule caabilo calukono lwako.”