Daniyeli 11
1 Lino mumwaka mutaanzi wakulela kwa Daliyasi Mumedi, ndakaima kuti ndimugwasilizye akumukwabilila.
Zyamalelo aa Siliya a Ijipiti
2 Lino andikwaambile bwini. Bami bambi botatwe bayoolibonya mu Pesiya, kumamanino kuyoolibonya uumbi wane, unooyoovubide kwiinda aaba bamwi boonse. Lino aakuba aanguzu akaambo kabuvubi bwakwe, uyookopa boonse kuti babukile bwami bwacisi ca Gilisi. 3 Aawo mwami sintanze uyoolibonya, uyoolela canguzu akucita kufumbwa mbwayanda mwini. 4 Lino aakumana kulibonya, bulelo bwakwe buyoomwaisigwa akwaabanyizigwa mumabazu one. Tabukatolwi balunyungu lwakwe pe, nokuba aanguzu mbuli nzyaakajisi walo, nkaambo bulelo bwakwe buyooolwa akupegwa bambi, batali bana bakwe. 5 Mwami wakumusanza uyooba aanguzu, pele umwi wabapati babasilumamba bakwe uyooba aanguzu kwiinda nguwe, nkaako uyooba aabwami mbwayooendelezya mwini canguzu. 6 Kwaakwiinda myaka iili mboibede bayoomvwana. Mwana musimbi wakumusanza uyooinka kumwami wakunyika kuti bakapangane cizuminano calumvwano, pele takeendelezyi, nguzu zyamwami ooyo ziyoofwambaana kumana. Mumazuba aayo musimbi ooyo uyooabwa antoomwe abantu babwami bakwe awisi aboonse baali kumuyanda.
7 Umwi waciinga cakwe uyootola busena bwamusimbi ooyo. Uyoolwana basilumamba bamwami wakunyika akuyoonjila munkwakwa zyakwe, uyoobalwana nkabela uyoozunda. 8 Alimwi uyootola baleza babo, zikozyanyo zyalubulo, azingwali-ngwali zibotu zyansiliva angolida, uyoozitola ku Ijipiti. Kwamyaka iili mbwiibede unooyoolelede mwami wakunyika. 9 Mpawo mwami wakunyika uyoosaala bulelo bwamwami wakumusanza, pele uyoobundulukila kunyika yakwe. 10 Bana bakwe balombe bayoolibambilila zyankondo, bayoobunganya mpi mpati yalo iyookungulula mbuli zambangulwe litakwe butabilile, nkabela nkondo eeyo iyoozumanana mane kuyoosika kunkwakwa zyakwe.
11 Aawo mwami wakumusanza uyooinka kunkondo mubukali akuyoolwana mwami wakunyika, unooli aampi mpati, pele iyoozundwa. 12 Lino mpi eeyo yaakuzundwa buyo, mwami wakumusanza uyoolisumpula kapati, nkabela uyoojaya banji bali zyuulu zyuulu, nikuba boobo takazundi pe. 13 Mwami wakunyika uyooyobolola mpi iimbi, mpati kwiinda yakusaanguna, kwaakwiinda myaka minji, uyooboola ampi mpati iijisi zilwanyo zinji.
14 Mumazuba aayo banji bayoobukila mwami wakumusanza. Bantu bokwanu basimanyongwe bayoozanga kuti bazuzikizye cakaamba cilengaano, pele tabakazwidilili. 15 Mpawo mwami wakunyika uyooboola akuzooyaka zitantaala zyakusinkilizizya, eelyo uyoozunda munzi walukwakwa. Impi yabakumusanza tiikakonzyi kuyoobayumina, nobaba basilumamba bacibwene kulwana tabakabaimini pe. 16 Sikusaala uyoocita kufumbwa mbwayanda, taakwe muntu naba omwe uuyoomwiimina pe. Uyookkalila munyika mbotu, unooli aanguzu zyakwiinyonyoona. 17 Uyookanza kuboola ampi yamubwami bwakwe yoonse nkabela uyoopanga cizuminano calumvwano amwami wakumusanza. Lino uyookwasya mwanaakwe musimbi kutegwa akasaalile mpawo bwami, mizeezo yakwe tiikabeleki, tiikamugwasyi. 18 Aawo uyoonyonena kuzisi zili kunkomwe zyalwizi, zinji uyoozizunda, pele mupati wabasilumamba uyoomanya kulisumpula kwakwe, uyoocita kuti masampu aayo akamuboolele. 19 Musule azeezi, uyoopilukila kunkwakwa zyacisi cakwe mwini, pele uyoolebwa akuwa, takabonwi limbi pe.
20 Sikutola busena bwakwe uyootuma simutelo kuti akabambe zyaŋanda yabwami. Mumyaka mice buyo, uyoonyonyoonwa, nikuba boobo kutali mubukali nomuba munkondo pe.
21 Uyoomutolela busena unooli muntu uusampukide uutana buzuba wapegwa bulemu bwabwami. Uyoosaala bwami bantu banooyooliibide, uyootola bwami mubumpelenge. 22 Eelyo basilumamba banji mbayoonyonyoonwa, basilumamba antoomwe amuleli wabo bayoonyonyoonwa. 23 Baakumana kupangana cizuminano anguwe, uyoobaunina, abantu buyo bace uyoobabukila akuba muleli wabo. 24 Zibeela zimwi zyacisi zijisi lubono lunji zyanooyooliibide uyoozisaala, nkabela uyoojana eeco bamawisi ncobatajisi. Uyootalika kwaaba zisaalo nzyaakanyanga antoomwe alubono lumwi akati kabaccilili bakwe. Uyookanza kuzunda minzi yankwakwa, pele kwaciindi cisyoonto buyo.
25 Uyooboola kuzoolwana mwami wakumusanza ampi mpati. Mwami wakumusanza uzoolwana ampi mpati iilaanguzu, pele takakonzyi kwiiyumina akaambo kamakanze ngobamubambilide. 26 Aabo basaninwa amwami bayoosoleka kumunyonyoona, ampi yakwe iyoonyonyoonwa, nkabela mbanji bayoofwida munkondo. 27 Bami bobilo, bakanza zibi zyalo, bayookkala atebule ndilyonya, bakabejelane, pele taakwe acigwasya, nkaambo nokuba kuti kube buti mamanino ayoosika aciindi cibikkidwe. 28 Mwami wakunyika uyoopilukila kunyika yakwe alubono lunji, pele moyo wakwe unoosulaikide cizuminano cakwe cisalala. Uyoocibisyaanya, aakumana uyoopilukila kucisi cakwe.
29 Caakusika ciindi ceelede uyoosaala nyika yakumusanza alimwi, pele ono ciyoocitika tacinooli mbuli ceeco cakusaanguna pe. 30 Basimato bakunsumbu zyakumbo bayoomulwana, nkaako uyootyompwa. Nkabela uyoonyona akuyookalalila bacizuminano cisalala. Uyoopiluka kuzoofwida luzyalo aabo bayoosiya cizuminano cisalala.
31 Basilumamba bakwe bayoosofwaazya lukwakwa lwaŋanda ya Leza, alimwi uyoolesya zipaizyo zyabuzuba abuzuba. Kwaakumana bayoobikka cisesemyo calunyonyooko. 32 Calucengo uyoounina baabo bakatyola cizuminano, pele bantu aabo bazi Leza wabo bayoomukazya kapati.
33 Basongo bayoolailila bantu banji, nokuba kuti bayoojaigwa munkondo mukaindi kaniini, nokuba kutentwa, kujatwa naa kusaalwa. 34 Kujaya ooku kwanoocitika bantu ba Leza tabakagwasigwi kapati. Bantu banji basilucengo bayoobasangana. 35 Bamwi bantu basongo bayoolebwa kutegwa basalazigwe, balondoke kuti kabatakwe tumpenda mane kuyoosikila kumamanino aaciindi, nkaambo mamanino ayoosika aciindi ceelede.
36 Mwami uyoocita mbuli mbwayanda mwini. Uyoolisumpula akulipa bulemu kwiinda bwabaleza boonse, nkabela uyoosampaula Leza waba leza. Uyoozwidilila mane kuyoosika ciindi cabukali nociyoozuzikizigwa, eeco cakakanzwa cileelede kucitika. 37 Takalemeki baleza bamituni yabasikale bakwe, nociba eeco bamakaintu ncobayanda, takalemeki baleza bamituni nibaba buti, pele uyoolisumpula kwiinda mbabo boonse. 38 Mucilawo cambabo uyoolemeka leza wankwakwa, uyoolemeka leza basikale bakwe ngobatakazi wangolida ansiliva, watubwe tweebesi azipego zidula. 39 Uyoolwana nkwakwa ziyumu kwiindila mukugwasigwa aleza wakule, nkabela uyoolemeka baabo bamuyanda. Uyoocita kuti babe baleli babantu banji, uyooaba nyika kuli basimali.
40 Kumamanino aaciindi, mwami wakumusanza uyoomulwana. Mwami wakunyika uyooboola ankamu mpati yankalaki, basimabbiza amato manji. Uyoosaala masi manji akwaaola mbuli zambangulwe. 41 Alimwi uyoosaala nyika mbotu. Masi manji ayooolwa, pele Edomu, Mowabu abasololi baku Amoni bayoovunwa kuzwa kulinguwe. 42 Kulela kwakwe kuyootabukila kumasi manji kujatikizya acisi ca Ijipiti. 43 Uyootola ziyobwedo zyangolida, nsiliva alubono loonse lwamu Ijipiti, Balibiya a Banubi bayooendelezegwa anguwe. 44 Pele makani ngoyoomvwa aayoozwa kujwe akunyika ayoomuyoosya, aawo uyooinka mubukali kuti akajaye akunyonyoona bantu banji. 45 Uyoosimpa matente aabwami bwakwe kumbali alwizi kucilundu cibotu. Nikuba boobo buyoomweelela, taakwe muntu naba omwe uuyoomugwasya pe.