Daniyeli 1
Bakubusi mbubakatolwa kuŋanda ya Nebukadineza
1 Mumwaka watatu wakulela kwa Jehoiyakimu mwami wacisi ca Juda, Nebukadineza mwami wa Babuloni wakasika ku Jelusalemu akuzoousinkilizya. 2 Nkaako Mwami Leza wakaaba Jehoiyakimu mwami wacisi ca Juda kuli Nebukadineza, wakabweza zintu zimwi kuzwa muŋanda ya Leza. Wakabweza zintu eezi akuzitola muŋanda iikombelwa leza wakwe mu Babuloni, wakaziyobola muŋanda yaleza wakwe.
3 Mpawo mwami wakalailila Asyipenazi, mupati wababelesi bakwe, kuti balete Baisilayeli bamwi bamukwasyi wabwami abalemenede, 4 bakubusi batalemene, baziwa zibotu, bajisi maanu akwiiya zintu, bajisi luzibo, bakonzya kumvwisya zintu cakufwambaana, bajisi zyeelelo zyakuti inga bakonzya kubeleka muŋanda yamwami. Asyipenazi wakaambilwa kuti abaiisye musyobo amwaambo wa Bakalodiya. 5 Mwami wakati kabapegwa zilyo zyabuzuba abuzuba awaini kuzwa kwakwe. Aaba bakali bakuti baiisigwe kwamyaka yotatwe, nkabela baakumanizya bakabelekele mwami.
6 Akati kabaaba bamwi bakazwa kucisi ca Juda kwakali, Daniyeli, Hananiya, Misyayeli a Azaliya. 7 Mupati wababelesi wakabaulika mazina aambi. Daniyeli wakamuulika zina lyakuti Belitesyaza, Hananiya wakamuulika kuti Syaduleki, Misyayeli wakamuulika kuti Misyeki, Azaliya wakamuulika kuti Abedinego.
8 Pele Daniyeli wakayeeya kuti walo atalisofwaazyi azilyo zyabwami awaini, eelyo wakakumbila mubelesi mupati kuti azumizigwe kutacita boobo. 9 Lino Leza wakacitide mupati ooyo kuti afwide luzyalo Daniyeli akumweetelela, 10 pele mupati ooyo wakaambila Daniyeli kuti, “Njoowa mwami simalelo wangu ooyo wasungula kale zilyo azyakunywa. Lino abona kuti wakotela, cakutaba mbuli basaanyoko, mwami uyoondikosola mutwe.”
11 Mpawo Daniyeli wakaambila mulindizi ooyo mupati wababelesi ngwaakabikka kuti kalanga Daniyeli, Hananiya, Misyayeli a Azaliya kuti, 12 “Twakukumbila, tusole kwamazuba aali kkumi. Utatupi cimbi ccita buyo zisyumani kuti katulya amaanzi aakunywa. 13 Kwaakumana ukatweezyanyike abakubusi aabo balya zilyo zyabwami wamana noyoocita mbuli mbooyoobona.” 14 Nkaako wakazumina kucita eeci, akubasoleka kuti bacite mbubakakumbila kwamazuba aali kkumi.
15 Lino mazuba aali kkumi naakamana balo bakalangika kuti bali kabotu akuneneya kabotu kwiinda bakubusi baya bakali kulya zilyo zyabwami. 16 Nkaako mulindizi ooyo wakagwisya zilyo zyabo zibotu awaini wakali wakuti kabanywa, mubusena bwazeezyo wakabapa zisyumani.
17 Bakubusi aaba bone Leza wakabapa luzibo akumvwisya zintu zyamwaambo oonse akwiiya. Daniyeli wakali kukonzya kumvwisya zilengaano aziloto ziindene-indene.
18 Lino ciindi eeco mwami ncaakabikkide kuti bakaletwe nicakasika, mupati wababelesi wakabaleta kuli Nebukadineza. 19 Mwami wakaambaula ambabo, nkabela wakajana kuti taakwe wakeelene a Daniyeli, Hananiya, Misyayeli a Azaliya, nkaako bakanjila mulimo wakubelekela mwami. 20 Mumakani oonse aazya busongo akumvwisya zintu mwami ngaakababuzya, wakajana kuti balainda ziindi zili kkumi kwiinda basimabibo boonse abasikulota babwami bwakwe boonse.
21 Nkabela Daniyeli wakakkala ooko mane kusikila mumwaka mutaanzi wakulela kwa mwami Sailasi.