Ciyubunuzyo 9

¹ Mungelo wasanu wakasiba mweembo wakwe. Eelyo ndakabona nyenyezi iilya yakawida ansi kiipegwa kkii wamulindi uutagoli. ² Nyenyezi yakajula mulindi uutagoli ooyu, nkabela kwakasunta busi. Busi oobu bwakali mbuli kuti buzwa mubbibi lyamulilo. Lino mumuni wazuba aluuwo zyakasizigwa abusi bwakali kuzwa mumulindi uutagoli. ³ Lino kuzwa mubusi oobo kwakazwa cikwikwi cakaza ansi. Calo cakapegwa nguzu zyeelene azyatubanze. ⁴ Cakaambilwa kuti citanyonyooni bwizu noziba zisamu nikaba kasyango kali buti, pele kuti cipenzye buyo bantu aabo batagantidwe acidinto ca Leza ankumo zyabo. ⁵ Tiicakazumizigwa kubajaya pe, pele cakazumizigwa buyo kubapenzya kwamyezi yosanwe. Kucisa kwakupenzya kwaco kwakali mbuli kwamuntu naalumwa kabanze. ⁶ Lino mumyezi yosanwe eeyo bantu bayooyandaula lufu, pele tabakooyoolujana. Bayooyanda kufwa, pele lufu luyoobatija.

⁷ Cikwikwi eeco cakali mbuli mabbiza aalibambililide nkondo. Aamitwe yaco kwakali zintu zilangika mbuli misini yangolida, alimwi cakali abusyu mbuli bwabantu. ⁸ Masusu aaco akali malamfu mbuli aabakaintu. Meno aaco akali mbuli meno aabasyuumbwa. ⁹ Zyamba zyaco zyakali kwabilidwe antobo zyakali kulangika mbuli zikwabilizyo zyakapangwa kuzwa kulubulo. Muzumo wamababa aaco wakali mbuli muzumo wankalaki zinji zikwelwa mabbiza aazuzila kunkondo. ¹⁰ Cikwikwi eeco cakalijisi micila iiluma mbuli kabanze. Mumicila eeyo mumwakali nguzu zyaco zyakupenzya bantu kwamyezi yosanwe. ¹¹ Cilijisi mwami uucilela, walo ooyu uuli ngomungelo uulanga mulindi uutagoli. Zina lyakwe mu Cihibulu ngu Abbadoni, mu Cigiliki ngu Apoliyoni, (nkokwaamba kuti, “Sikunyonyoona”).

¹² Penzi lyakusaanguna lyamana, kwasyaala aabili.

¹³ Mpoonya mungelo wacisambomwe wakasiba mweembo, mpawo ndakamvwa jwi lizwa kuziswi zyone zyacipaililo cangolida cili kumbele lya Leza. ¹⁴ Jwi eeli lyakaambila mungelo wacisambomwe wakajisi mweembo kuti, “Angununa bangelo bone baangilidwe kumulonga mupati wa Yufuletisi!” ¹⁵ Eelyo wakaangununa bangelo bone bakalibambilide, ciindi, buzuba, mwezi, alimwi amwaka kuti bajaye cipaanzi catatu cabantu. ¹⁶ Nkabela ndakaambilwa kuti mweelwe wabasilumamba uli zyuulu-zyuulu. ¹⁷ Mucilengaano eeci ndakabona mabbiza abaabo bakatantide ali ngawo. Bakalijisi ntobo zyakali kusalala pyu mbuli mulilo, alimwi kazilangika mbuli bbwe lyacijulu-julu, ambuli mabwe aasalufa. Mitwe yamabbiza aaya yakali kuboneka mbuli yabasyuumbwa, nkabela kumilomo yawo kwakali kuzwa mulilo, busi, amabwe aasalufa. ¹⁸ Cipaanzi catatu cabantu aaba cakajaigwa amapenzi aaya otatwe, mulilo, busi, alimwi amabwe aasalufa aakali kuzwa mumilomo yamabbiza. ¹⁹ Nguzu zyamabbiza aaya zili mumilomo amumicila yawo. Micila yawo iboneka mbuli nzoka, ilijisi mitwe, aboobo alabelesya micila kucisa bantu.

²⁰ Lino kwakasyaala bantu bamwi aabo batakajaigwa amapenzi aaya, nikuba boobo taakwe nibakeempa kuti basiye zeezyo nzibakalipangila. Tiibakaleka kukomba myuuya mibi, zibumbwa zyangolida, zyansiliva, zyamukuba, zyamabwe, zyazisamu, zitaboni, aziteendi naa kumvwa. ²¹ Alimwi taakwe nibakaleka bujayi, bulozi, bumambe, abubbi bwabo.