Ciyubunuzyo 8
Ciga caciloba
1 Lino Mwanaa mbelele naakanamatula ciga caciloba, kujulu kwakaumuna zi kwakaindi kali mbokabede. 2 Eelyo ndakabona bangelo bali ciloba aabo baima kumbele lya Leza, kabapegwa myeembo iili ciloba.
3 Lino mungelo uumbi, wakaza, waima kumbali aacipaililo kajisi acibikkilo catununkilizyo cangolida. Wakapegwa tununkilizyo tunji kuti atutuule antoomwe akukomba kwabasalali boonse acipaililo cangolida kumbele lyacuuno ca Leza. 4 Lino busi bwatununkilizyo twakatentwa bwakali kusunta kabuya mujulu antoomwe akukomba kwabasalali kuzwa mujanza lyamungelo wakaimvwi kumbele lya Leza. 5 Mpoonya mungelo ooyo wakabweza cibikkilo catununkilizyo, wakacizuzya makala aazwa aacipaililo, akwaawaala ansi. Ndilyonya kwakaba mizumo, mabbalu-bbalu, ndabo, alimwi akuzungaana kwanyika.
Zyamyeembo
6 Mpoonya aawo bangelo bali ciloba bakajisi myeembo iili ciloba bakalibambilila kuti baisibe.
7 Mungelo mutaanzi wakasiba mweembo wakwe, eelyo kwakaba civulamabwe amulilo uuvwelene abulowa, eezi zyakawida ansi. Nkabela cipaanzi catatu canyika cakapya acalo cipaanzi catatu cazisamu cakapya, abwizu butete boonse bwakapya.
8 Kumane mungelo wabili bakasiba mweembo wakwe. Mpawo cintu cimwi cipati cilangika mbuli mulilo uuli atala aacilundu cakawaalwa mulwizi. Cipaanzi catatu calwizi cakasanduka caba bulowa, 9 alimwi cipaanzi catatu cazilenge zyamumaanzi cakafwa, acalo cipaanzi catatu camato cakanyonyoonwa.
10 Lino mungelo watatu awalo wakasiba mweembo wakwe. Mpawo kwakaloka nyenyezi mpati kuzwa kujulu yakali kuyaka mbuli munzenge wamulilo, yakawida mucipaanzi catatu camulonga amutusensa. 11 Nyenyezi eeyo iitwa kuti “Kulula.” Cipaanzi catatu camaanzi akalula, aboobo bantu banji bakafwa akaambo kakunywa maanzi aaya, nkaambo akali kulula.
12 Mungelo wane wakasiba mweembo. Eelyo cipaanzi catatu cazuba, mwezi, anyenyezi zyakaumwa cakuti zipaanzi zyatatu zyanzizyo zyakabaya, nkabela catatu cazuba tiicakaboneka, aalo masiku mbubonya.
13 Mpoonya ndakalanga, ndakabona sikwaze wakali kuulukila akati-kati kajulu kalila kati, “Maawe! maawe! maawe! Kubantu baansi nkaambo kamajwi aamyeembo yabangelo basyaala botatwe balo balibambilide kwiisiba!”