Ciyubunuzyo 4
Zyakukomba kwakujulu
1 Musule akooku ndakabona mulyango uujulidwe kujulu. Mpoonya ndakamvwa jwi ndindakamvwide kusaanguna lyakali kukanana kuli ndime mbuli kulila kwamweembo, lyakati, “Koboola kuno, tanta kuti ndikutondezye ciyoocitika musule aaceeci.” 2 Ciindi eeco nciconya, Muuya wakandinjila. Kujulu ndakaakubona cuuno cabwami, nkabela umwi wakalikkede acuuno eeco. 3 Muntu wakakkede acuuno busyu bwakwe bwakali kuboneka mbuli bbwe libalangala abbwe lisalala pyu, nkabela cuuno eeco cakazingulukidwe fulicoongo ulaamubala wakamweemvwe. 4 Cuuno cabwami cipati cakalizingulukidwe azimwi zyuuno zyabwami zili makumi obilo azine. Nkabela muzyuuno eezi ndakabona bapati bali makumi obilo abane, bakasamide zisani zituba alimwi kumitwe bakasamide misini yangolida. 5 Kuzwa kuzyuuno eezyo kwakali kuzwa ndabo, akuyobeka, amizumo. Kumbele lyacuuno cipati kwakali kuyaka minzenge iili ciloba, eeyi njemyuuya ya Leza iili ciloba. 6 Kumbele lyacuuno nciconya eeci kwakali cakali kuboneka mbuli lwizi luli mbuli bbwe libalangala.
Nkabela kwakali zilenge zyone zipona ziimvwi mumabazu oonse one aacuuno cabwami, zyakalijisi meso, kumbele akusule. 7 Cakusaanguna cakali kulangika mbuli syuumbwa, cabili cakali kulangika mbuli poho, catatu cakalijisi busyu buli mbuli bwamuntu, cane cakali kulangika mbuli sikwaze uuuluka. 8 Comwe-comwe cazilenge eezi cakalijisi mababa aali cisambomwe, oonse akalijisi meso, mukati aanze. Sikati amasiku zyakali kwiimba cakutalyookezya kaziti,
“Ulasalala, Ulasalala, Ulasalala,
Mwami Leza Singuzuzyoonse,
Wakaliko, Uuliko, alimwi Uunooliko.”
9 Lino zilenge eezi zyone, nizyakali kupa bulemu, kulemeka akulumba kuli yooyo uukkede acuuno cipati cabwami uuli muumi lyoonse alyoonse, 10 bapati aabo bali makumi obilo abane bakali kuvuntama kumbele lyakwe akumukomba. Ooyu ngonguwe uuli muumi lyoonse alyoonse. Eelyo bakali kubikka misini yabo kumbele lyacuuno eeco akuti,
11 “O Mwami Leza wesu!
Uleelede kupegwa bulemu boonse,
kulemekwa koonse, anguzu zyoonse,
nkaambo nduwe wakalenga zintu zyoonse.
Mukuyanda kwako zyoonse zyakalengwa alimwi mpozili.”