Ciyubunuzyo 3

Lugwalo lwakalembelwa mbungano yaku Saadisi

¹ “Mutumwa waku Saadisi mulembele boobu:

“Ngaaya makani aaamba ooyo uujisi myuuya ya Leza iili ciloba anyenyezi zili ciloba. Ulati, ndizi milimo yako ambolyaamba kuti uli muumi kakuli ulifwide! ² Aboobo buka, uyumye ceeco ncojisi nocitanamaninina kufwa. Nkaambo ndibwene kuti milimo yako tiiluleme kuli Leza wangu. ³ Koyeeya eeco ncookaiya akumvwa, ucijatisye weempe. Kuti utabuki, njooboola mbuli mubbi, alimwi tokooyooziba ciindi ncenjooboola kulinduwe pe. ⁴ Pele nkobali bace mu Saadisi batanabisya zisani zyabo. Bayooenda andime kabasamide zituba buu nkaambo mbobeelede. ⁵ Mbubonya oobo kufumbwa uuzunda uyoosamikwa zisani zituba, alimwi zina lyakwe nsikalimwayi kuzwa mubbuku lyabuumi. Njooambilizya zina lyakwe kuli Taata abangelo bakwe.

⁶ “Ooyo uujisi matwi, aswiilile eezyo Muuya nzyaambila mbungano!

Lugwalo lwakalembelwa mbungano yaku Filadelufiya

⁷ “Mutumwa waku Filadelufiya mulembele boobu:

“Ngaaya makani aaamba ooyo Uusalala wa Leza, uusyomeka, ooyo uujisi kkii wa Devedi. Ngonguwe uunga naa wajula taakwe uukonzya kujala, naa wajala taakwe uukonzya kujula pe. ⁸ Ulati, ndizi milimo yako mbwiibede. Ndajula citendele kumbele lyako, eeco muntu naba omwe ncatakonzyi kujala pe. Ndizi kuti tojisi nguzu mpati, nikuba boobo wakabamba majwi aangu, tookanditama pe. ⁹ Lino bona, nkobali bantu bankamu ya Saatani, aabo balyaamba kuti Mbajuda anikuti pe. Ndiyoobacita kuti bakaboole bazoolibombye kumaulu aako. Eelyo bayooziba kuti ndilakuyanda ncobeni. ¹⁰ Nkaambo kakuti wakabamba majwi aangu aakuti ukakatile, ambebo ndiyookubamba muciindi camasunko aayooboolela bantu boonse bamunyika eeyi kuti basunkwe. ¹¹ Ndafwambaana kuboola, jatisya eeco ncojisi kutegwa kutabi uukunyanga musini wako. ¹² Ooyo uuzunda ndiyoomucita kuti akabe cicinda caŋanda ya Leza wangu, taakwe nayoozwa mulinjiyo pe. Alinguwe ndiyoolemba zina lya Leza wangu, alyamunzi wa Leza wangu, nkokuti Jelusalemu mupya, walo ooyo uyoozwa kujulu kuli Leza wangu. Alimwi ndiyoolemba alinguwe zina lyangu lipya.

¹³ “Ooyo uujisi matwi, aswiilile eezyo Muuya nzyaambila mbungano!

Lugwalo lwakalembelwa mbungano yaku Lawodisiya

¹⁴ “Mutumwa waku Lawodisiya mulembele boobu:

“Ngaaya makani aaamba yooyo uuli ngo Ameni, kamboni uusyomeka, wakasimpe. Ngomatalikilo aazintu Leza nzyaakalenga. ¹⁵ Ulati, ndilizi milimo yako mboibede, totontoli alimwi topyi. Nicabota kuti nooli kutontola naa kupya. ¹⁶ Aboobo mukuti ukasaala buyo, ndakuswiidila ansi. ¹⁷ Tee kayi waamba kuti, ‘Ndilivubide, ndijisi lubono lunji-lunji, taakwe cintu ncendibula.’ Pele tozi kuti ulipengede uleetezya, uli mucete, uli moofu, alimwi uli cintanda. ¹⁸ Lino ncekulailila ncakuti uule ngolida kulindime yakasalazigwa amulilo kutegwa ube muvubi mwini-mwini. Alimwi uule azisani zituba zyakuti usame kuti usise cintanda cako, ujazya bweeme. Uule amusamu wameso kuti ukonzye kubona kabotu. ¹⁹ Aabo mbenjanda ndabakalalila akubasubula. Aboobo sungwaala kapati kuti weempe. ²⁰ Bona, ndiliimvwi amulyango ndakonkomona, kuti naa muntu wamvwa jwi lyangu akundijulila, ndanjila muŋanda yakwe, walo andime tulalida antoomwe. ²¹ Ooyo uuzunda njoomuzumizya kukkala andime acuuno cangu, mbubonya mbuli mbundakazunda mebo akukkala a Taata acuuno cakwe cabwami.

²² “Ooyo uujisi matwi, aswiilile eezyo Muuya nzyaambila mbungano!”