Ciyubunuzyo 2
Lugwalo lwakalembelwa mbungano yaku Efesusi
1 “Mutumwa waku Efesusi mulembele boobu:
“Ngaaya makani aaamba ooyo uujisi nyenyezi zili ciloba mujanza lyakwe lyalulyo akweenda aakati kazikkalilo zyamalambe zyangolida zili ciloba. 2 Ulati, ndizi milimo yako, akubeleka kwako alimwi ndizi mbuli mbokakatide. Kwamana ndizi mbotakonzyi kubaumunina buyo bantu babisya. Aabo balyaamba kuti mbatumwa, wabasola akubajana kuti mbabeji. 3 Ndizi kuti ulazumanana, ulikakatide, akupenga akaambo kangu, nikuba boobo taakwe nolengaana. 4 Pele ulijisi kaambo kulindime, nkakuti, tocindiyandi mbuli mbookali kundiyanda kusaanguna pe. 5 Lino koyeeya buwe bwako! Uleelede kweempa akucita milimo eeyo njookali kucita kusaanguna. Kuti naa toempi, ndilaboola ndizoogwisye cikkalilo calambe lyako mubusena bwaco, ccita weempe. 6 Pele cibotu cili mulinduwe nceeci: ulasulaika milimo ya Banikolayi, njesulaikide ambebo.
7 “Ooyo uujisi matwi, aswiilile eezyo Muuya nzyaambila mbungano!
“Ooyo uuzunda njoomuzumizya kulya micelo yamusamu uupa buumi uuli mukati kabusena bwakubotelwa bwa Leza.
Lugwalo lwakalembelwa mbungano yaku Similina
8 “Mutumwa waku Similina mulembele boobu:
“Ngaaya makani aaamba ooyo uuli ngo matalikilo amamanino, ooyo wakafwide pele lino mmuumi. 9 Ulati, ndizi mapenzi aako mbwaabede, abucete bwako, nikuba boobo ulivubide. Alimwi ndizi mbobakubejelezya aabo balyaamba kuti Mbajuda kabali mbankamu ya Saatani. 10 Utayoowi mapenzi aayookusikila. Swiilila! Siluuni uyoowaala bamwi banu muntolongo kuti amusunke nkabela kwamazuba aali kkumi munooli mumapenzi mapati. Kosyomeka mane kusikila kulufu, ndendilyo neyookupa musini wakuzunda, uuli mbuumi.
11 “Ooyo uujisi matwi, aswiilile Muuya nzyaambila mbungano!
“Ooyo uuzunda, lufu lwabili talukamugumi pe.
Lugwalo lwakalembelwa mbungano yaku Pelegamumu
12 “Mutumwa waku Pelegamumu mulembele boobu:
“Ngaaya makani aaamba ooyo uujisi panga likwengedwe koonse-koonse. 13 Ulati, ndizi nkokkala, ukkala kooko kuli cuuno ca Saatani. Ulasyomeka kulindime alimwi taakwe nookatama lusyomo oolo ndojisi mulindime nikuba ciindi ciya Antipasi kamboni wangu uusyomeka naakajaigwa, wakajailwa ooko kukkala Saatani. 14 Pele kuli twaambo tumwi ntwetikutongooke. Mpobali bamwi banu baccilila njiisyo zya Balaamu, ooyo wakaunina Balaki kusololela bantu ba Isilayeli muzinyonyoono ciindi naakaboongelezya kuti balye zilyo zyakapaizigwa kumizimo akucita bumambe. 15 Mbubonya ayebo ulijisi bantu aabo batobela njiisyo zya Banikolayi. 16 Lino empa, kuti naa utaciti boobo, njooboola kulinduwe cakufwambaana kuti ndizoobalwane aabo apanga lizwa mumulomo wangu.
17 “Ooyo uujisi matwi, aswiilile eezyo Muuya nzyaambila mbungano!
“Ooyo uuzunda njoomupa mana aasisidwe kuti alye, alimwi njoomupa bbwe lituba, nkabela aabbwe eelyo kunoolembedwe zina pya liyoozibwa buyo ayooyo walitambula, kutali bamwi pe.
Lugwalo lwakalembelwa mbungano yaku Tiyatila
18 “Mutumwa waku Tiyatila mulembele boobu:
“Ngaaya makani aaamba Mwanaa Leza uulaameso aavwilima mbuli mulilo, zituta zyakwe zili mbuli mukuba wasyobwa. 19 Ulati, ndizi milimo yako yoonse mboibede. Ndizi luyando lwako, lusyomo lwako, kubeleka kwako, alukakatilo lwako. Ndizi kuti milimo yako yasunu iinda yakusaanguna. 20 Pele kaambo nkondibisizizye nkaaka: Ulekelela Jezebele mukaintu uulyaamba kuti mmusinsimi wa Leza. Ucenga babelesi bangu kuti bacite bumambe akulya zilyo zipaizigwa kumizimo. 21 Ndakamupa ciindi cakuti eempe, pele ulakaka kweempa akusiya bwaamu bwakwe. 22 Lino njoocita kuti aciswe alimwi abaabo bakacita bumambe anguwe njoobanjizya mumapenzi mapati, ccita kuti beempe kuzwa kuzibi nzyobakacita anguwe. 23 Alimwi njoojaya bana bakwe. Ndendilyo mbungano zyoonse noziyooziba kuti ndime eezi zili mumyoyo amizeezo yabantu. Nkabela omwe-omwe wanu njoomupa bweelede milimo yakwe.
24 “Pele nywebo nobamwi nomuli mu Tiyatila, nomwatakaccilila njiisyo zibi eezi, nimwatakaiya nzyobaamba bamwi kuti, ‘Maseseke eeni-eni aa Saatani,’ nsikoomulemezya acintu cimbi pe. 25 Pele amujatisye eeco ncomujisi kale, mane kusikila nkaboole. 26 Ooyo uuzunda akubamba milimo yangu mane kusikila kumamanino, ndiyoomupa nguzu zyakulela masi oonse abantu. 27 Nkabela uyooalela amusako walubulo. Uyoopwaya bamasi mbuli bupwaigwa cibiya. Njoomupa bulelo mbuli mbundakapegwa kuli Taata. 28 Alimwi njoomupa ntanda.
29 “Ooyo uujisi matwi, aswiilile eezyo Muuya nzyaambila mbungano!