Ciyubunuzyo 18
Zyakuwa kwa Babuloni
1 Musule lyazeezi ndakabona mungelo umwi kaboola ansi kuzwa kujulu. Wakalijisi bulelo bupati, aboobo nyika yoonse yakamweka akaambo kakubala kwakwe. 2 Wakapozomoka ajwi pati wati, “Wawa, wawa Babuloni munzi mupati! Waba busena bukkala myuuya mibi! Waba ciyobwedo camyuuya yoonse iisofweede, aciyobwedo cabayuni basofweede boonse, basesemya. 3 Nkaambo masi oonse akanywa waini wabukali bwabumambe bwawo. Bami boonse bamunyika bakacita bumambe anguwo, abalo basambazi bakavuba kwiindilila akaambo kazisusi zyakwe zinji.”
4 Mpawo ndakamvwa jwi limbi lyakazwa kujulu lyakati,
“Amuzwe! Tamweelede kubisya anguwo,
tamweelede kusubulwa anguwo!
5 Nkaambo zinyonyoono zyakwe zili lundene
ziyanda kusika kujulu kwini.
Leza waiyeeya milandu yamukaintu ooyu.
6 Amumucite mbubonya mbwaakamucita anywebo,
mumubweedezezye cakwiindilizya kuli zeezyo nzyaakacita.
Munkomeki njaakanywisizya bamwi amumunywisye
kwiinda mbuli mbwaakabanywisya.
7 Amumupenzye akumuusya nsoni kapati,
nkaambo ulipa bulemu akulikkalila,
kayi mumoyo wakwe waamba kuti,
‘Ndendime mwami, nsili mukamufu pe,
taakwe buzuba mbwenjoolila!’
8 Nkaambo kaako buzuba bumwi uyoosikilwa mapenzi aaya:
bulwazi, buumba, anzala, alimwi uyootentwa
amulilo nkaambo Mwami Leza uumubeteka ulijisi nguzu.”
9 Bami baansi bakacita bumambe azisusi zimwi anguwo bayoolila akuusa kapati baakubona busi kabuuntumuka munzi ooyo nuupya. 10 Bayooima aalaale akaambo kakuyoowa kuti ambweni inga abalo banjila mucisubulo cawo. Bayooamba kuti “Maawe, maawe omunzi mupati wanguzu Babuloni! Ncobeni mukaindi kaniini buyo aaka wasubulwa!”
11 Basimakwebo baansi abalo bayooulila akweema, nkaambo tabacuuli limbi lubono lwawo. 12 Taacikwe uucuula ngolida zyabo, nsiliva, tubwe tweebesi, ngale, masani aandeketela aacisombo, aatuba, aasalala pyu, misamu yamisyobo-misyobo zintu ziindene-indene zipangwa ameja aabazovu, zyamisamu iidula, azintu zyakapangwa amukuba, lubulo, zyamabwe mayandisi, 13 zyatununkilizyo tunanwa atununkilizyo tumwi tulibedelede, waini, mafuta, busu bwamaila, ŋombe, mbelele, mabbiza ankalaki, abazike nkokuti bantu beni. 14 Basimakwebo baambila munzi ooyu kuti, “Lino zintu zibotu zyoonse nzyookali kusukamina zyayaaya, lubono loonse azimwi zibotu zyamana, tokazijani limbi pe!” 15 Basimakwebo aabo bakavubide akaambo kakusambalila mumunzi uulya, abalo bayooima aalaale, nkaambo kakuti bayoowa kuti inga ambweni basubulwa anguwo. Bayoolila akweema 16 akwaamba kuti, “Maawe, maawe, omunzi mupati! Wakali kusama zisani zyandeketela zyacisombo, azisani zisalala pyu. Wakali kulibotya angolida, tubwe, angale! 17 Ncobeni, mukaindi kaniini buyo aaka wanyonyookelwa lubono loonse oolu!”
Lino bapati bamato boonse, abasinyendo boonse, antoomwe abeenzya mato, alimwi abaabo boonse babelesya mato mumakwebo aabo bakaima alaale. 18 Nibakabona busi kabuuntumuka munzi ooyo nuupya bakalila bati, “Munzi nzi wali kukozya munzi mupati ooyu?” 19 Eelyo bantu aaba bakalivwikila vu amitwe, bakalila akweema bakati, “Maawe, maawe omunzi mupati! Ngomunzi bantu boonse bajisi mato wakabavubya nkaambo kalubono lwawo. Pele muciindi ciniini buyo eeci wanyonyookelwa zintu zyoonse!”
20 Kosekelela ojulu akaambo kakunyonyoonwa kwanguwo! Amusekelele nobasalali abatumwa, abasinsimi boonse! Nkaambo Leza lino wausubula munzi ooyu akaambo kazeezyo nzyuwakacita kulindime!
21 Mpoonya mungelo umwi wanguzu wakabweza bbwe pati mbuli ziyo, wakaliwaala mulwizi wakati, “Mbombubo oobu munzi mupati wa Babuloni mbuyoowaalwa ansi, nkabela tuukabonwi limbi pe. 22 Majwi aabasitulumbu, basinyeele, abasimyeembo taaciyoomvwigwi limbi mulinduwe pe! Basyaabupampu bacita milimo iindene-indene tabayoojanwi limbi mulinduwe. Kuvuta kwaziyo takuyoomvwigwi limbi mulinduwe pe! 23 Alimwi takukabonwi limbi mumuni walambe pe, aalo majwi aasibwiinga anabwiinga taakamvwigwi limbi mulinduwe pe. Basimakwebo bako bakali bantu banguzu kwiindilila munyika yoonse. Lino kwaamba zyamabibo aako aakubeja, wakacenga bantu bamisyobo yoonse!”
24 Babuloni wakasubulwa nkaambo bulowa bwabasinsimi abasalali bwakajanika mulinguwo, iiyi, abulowa bwabantu boonse bakajaigwa aansi.