Ciyubunuzyo 16
Zyamitiba yabukali bwa Leza
1 Mpawo ndakamvwa jwi pati lyakazwa muŋanda ya Leza kalyaambila bangelo bali ciloba kuti, “Kamuya mukatile bukali bwa Leza buli mumitiba iili ciloba ansi!”
2 Mungelo mutaanzi wakainka waakutila zyakali mumutiba wakwe ansi. Eelyo bantu bakajisi cisimbo camunyama akukomba mutuni wakwe bakaba aazilonda zisesemya zicisa kapati.
3 Mpoonya mungelo wabili wakatila zyakali mumutiba wakwe mulwizi. Eelyo maanzi akaba mbuli bulowa bwamuntu uufwide, nkabela zilenge zyoonse zyamulwizi zyakafwa.
4 Mungelo watatu wakatila zyakali mumutiba wakwe mumilonga amutusensa twamaanzi, nkabela maanzi akasanduka bwaba bulowa. 5 Mpawo ndakamvwa mungelo, uuli ngomulangi mupati wamaanzi kaamba kuti, “Wacita ciluleme O Mwami Uusalala, yebo Uuliko, Wakaliko! 6 Nkaambo bantu aaba bakatila bulowa bwabasalali abwabasinsimi, aboobo lino wabapa bulowa kuti banywe. Mbombubo, bajana ceeco cibeelede!” 7 Alimwi ndakamvwa ijwi lyakazwa kucipaililo, lyakati, “Mbombubo O Mwami Leza Singuzyoonse, mbeta zyako zilisinizizye nzyabululami!”
8 Lino mungelo wane wakatila zyakali mumutiba wakwe azuba, eelyo zuba lyakazumizigwa kutenta bantu amulilo walyo. 9 Mpoonya bakatentwa alumwi lupisya aabo bakali kusampaula zina lya Leza uujisi nguzu zyakuleta mapenzi aali boobu. Nikuba boobo taakwe nibakeempa akulumbaizya Leza.
10 Mungelo wasanu wakatila zyakali mumutiba wakwe acuuno cabwami bwamunyama, eelyo kwakaba mudima mucisi camunyama coonse, nkabela bantu bakatalika kuluma milaka yabo akaambo kakucisa nkubakamvwide. 11 Mpawo bakasampaula zina lya Leza wakujulu akaambo kazilonda zyali kucisa nzibakajisi. Nikuba boobo taakwe nibakeempa akuleka milimo yabo mibi pe.
12 Mungelo wacisambomwe wakatila zyakali mumutiba wakwe mumulonga wa Yufuletisi, mpawo maanzi aamumo akayuminina, kutegwa bami bakujwe bajane aakwiinda. 13 Eelyo ndakabona myuuya iisofweede yotatwe yakali kulangika mbuli bacula. Myuuya eeyi yakali kuzwa mumulomo watosi, mumulomo wamunyama, amumulomo wamusinsimi mubeji. 14 Eeyi njemyuuya mibi iicita zitondezyo zigambya. Myuuya yotatwe eeyi ilainka kubami boonse baansi kuti bayooboloke antoomwe kuti bakalwane mubuzuba bupati bwa Leza Singuzyoonse.
15 “Amuswiilile! Ndilaboola mbuli mubbi. Ulilelekedwe ooyo uunookkede kalangila akubamba zisani zyakwe kuti atakabonwi cintanda akufwa nsoni pe.”
16 Mpoonya myuuya eeyi yakabunganya bami mubusena bwiitwa kuti mu Cihibulu Amagedoni.
17 Mungelo waciloba wakatila zyakali mumutiba wakwe muluuwo. Nkabela kwakazwa jwi pati muŋanda ya Leza, kuzwa kucuuno cabwami lyakati, “Kwamana!” 18 Eelyo kwakaba ndabo, mabbalu-bbalu, mizumo, akuzungaana kwanyika. Kunyina nikwakabede kuzungaana kwanyika kuyoosya kuli boobu kuzwa bantu nibakatalika kukkala ansi! 19 Munzi mupati wakaanduka muzipaanzi zyotatwe, alimwi minzi yazisi zyoonse yakanyonyooka. Mubuzuba oobo Leza wakayeeya Babuloni mupati, alimwi wakacita kuti unywe waini munkomeki yabukali bwakwe. 20 Lino nsumbu zyoonse zyakanyonyooka, amalundu oonse akazimaana. 21 Bantu bakawidwa civulamabwe cipati, bbwe lyomwe-lyomwe lyakali kulema mbuli cisela casaka. Eelyo bantu bakasampaula Leza akaambo kapenzi lyacivulamabwe eeco, nkaambo penzi eelyo lyakaindilila kubija.