Ciyubunuzyo 14
Zya Mwanaa mbelele abantu bakwe
1 Lino ndakalanga, ndakabona Mwanaa mbelele kaimvwi atala aacilundu ca Ziyoni, wakali abantu bali zyuulu zili mwaanda amakumi one azine aabo bakalembedwe zina lyakwe azina lya Taata ankumo zyabo. 2 Mpawo ndakamvwa jwi kuzwa kujulu lyakali kuvuuma mbuli kuvuuma kwamaanzi manji, ambuli kudima kwamuzumo. Eelyo jwi ndindakamvwa lyakali kulimvwisya mbuli bantu bauma tulumbu. 3 Bantu aabo bakaimba lwiimbo lupya kumbele lyacuuno cabwami, kumbele lyazilenge zyone, alyabapati. Taakwe wakali kukonzya kuziba lwiimbo oolo pe, ccita buyo aabo bali zyuulu zili mwaanda amakumi one azine bakanununwa kuzwa ansi aano. 4 Aaba mbabantu bakalijata batakalisofwaazya abakaintu, balasalala mumyoyo. Balatobela Mwanaa mbelele kufumbwa nkwaya. Aaba bakanununwa akati kabantu kuti babe mbabataanzi kupegwa kuli Leza a Mwanaa mbelele. 5 Aaba taakwe ciindi ncibakabejede. Aboobo tabajisi mulandu pe.
Zyabangelo botatwe
6 Mpawo ndakabona mungelo umwi kauluka mujulu. Wakalijisi mulumbe wa Makani Mabotu uutamani kuti awaambilizye kuli baabo bakkala ansi, kuzisi zyoonse, akumisyobo yoonse, kumilaka yoonse, akubantu boonse. 7 Wakapozomoka wati, “Amusyome Leza akumupa bulemu, nkaambo ciindi nceelede kubeteka bantu casika! Amumukombe ooyo wakalenga julu, nyika, lwizi, atusensa twamaanzi!”
8 Eelyo mungelo wabili wakatobela yooyo mutaanzi, kumwi kati, “Wawa, wawa Babuloni munzi mupati! Wakacita kuti bantu boonse banywe waini wawo wabumambe!”
9 Mungelo watatu wakatobela bangelonyina bobilo, kumwi kapozomoka kuti, “Kuti naa kuli muntu uukomba munyama amutuni wakwe, akulembwa cisimbo camunyama ankumo yakwe naa ajanza lyakwe, 10 ooyo uyoonywa waini wabukali bwa Leza, uuyootilwa kuzwa munkomeki yabukali bwa Leza kakunyina akutontozegwa. Boonse bacita ceeci bayoopenzegwa amulilo amabwe aasalufa kumbele lyabangelo basalala alya Mwanaa mbelele. 11 Lino kupya kwamapenzi aaya nkwalyoonse alyoonse. Aabo bakomba munyama amutuni wakwe kunyina nobayoolyookezya kuzwa kukupya ooku sikati amasiku, antoomwe abaabo boonse bajisi cisimbo cazina lyakwe.”
12 Aawa mpaaelede kuti basalali bakakatile, aabo babamba milawo ya Leza antoomwe alusyomo ndobajisi muli Jesu.
13 Lino ndakamvwa jwi lizwa kujulu, lyakati, “Lemba boobu: Balilelekedwe aabo batikafwide mumulimo wa Mwami kuzwa sunu!”
Muuya Uusalala wakaingula kuti, “Iiyi, balilelekedwe ncobeni! Bayoolyookezya kuzwa kumilimo yabo, nkaambo kakuti milimo njibakacita ilabatobela.”
Zyakutebulwa kwanyika
14 Mpoonya ndakalanga, ndakabona kkumbi lituba, nkabela alindilyo kwakakkede uuli mbuli Mwanaa Muntu. Kumutwe wakasamide musini wangolida, alimwi wakalijisi acigonsyo cibosya. 15 Mpawo kwakazwa mungelo umwi muŋanda ya Leza wakapozomoka ajwi pati kwaambila yooyo wakakkede akkumbi wakati, “Bweza cigonsyo cako, utalike kutebula, nkaambo ciindi cakutebula casika, nyika yeelela kutebulwa.” 16 Lino ooyo wakakkede akkumbi wakavuumuna cigonsyo cakwe anyika, aboobo nyika yoonse yakatebulwa.
17 Mpawo ndakabona aumwi mungelo wakazwa muŋanda ya Leza mujulu, awalo wakalijisi cigonsyo cibosya.
18 Mpoonya aumbi mungelo walo uuli ngomulangi mupati wamulilo, wakaza kuzwida kucipaililo. Wakapozomoka ajwi pati kwaambila mungelo wakajisi cigonsyo cibosya, wakati, “Bweza cigonsyo cako, gonka nsaansa mumuunda wamisaansa iili anyika, nkaambo nsaansa zyabizwa!” 19 Eelyo mungelo uulya wakavuumuna cigonsyo cakwe anyika, wakagonka nsaansa zyoonse kuzwa kumisaansa, akuziwaala mucikandilo cansaansa cabukali bwa Leza. 20 Lino nsaansa eezi zyakakandwa mucikandilo cazyo cili kunze lyamunzi, eelyo kuzwa mucikandilo eeci kwakazwa bulowa oobo bwakakunka mbuli mulonga uulampa sinzo lili mbolibede alimwi uubbilwa mpisi iili mboibede.