Ciyubunuzyo 10

Zyamungelo akabbuku kaniini

¹ Lino ndakabona mungelo uumbi wanguzu kaseluka kuzwa kujulu. Wakalinjide mukkumbi, amutwe wakwe kwakali fulicoongo. Busyu bwakwe bwakali kubala mbuli zuba, maulu aakwe akali mbuli misumpuululu yamulilo. ² Wakajisi kabbuku kajulidwe mujanza. Lino kuulu kwakwe kwalulyo kwakalyata mulwizi, kwalumwensi kwakalyata anyika njumu. ³ Eelyo wakapozomoka ajwi pati lili mbuli kuvuluma kwasyuumbwa. Naakamana kupozomoka boobo, mizumo iili ciloba yakandindima. ⁴ Lino mizumo niyakamana kundindima, ndakatilembe. Pele ndakamvwa jwi lyakazwa kujulu lyakati, “Utaziyubununi eezyo myuuya iili ciloba nciyaamba. Utazilembi pe!”

⁵ Mpoonya mungelo ngundakabona kaimvwi mulwizi aanyika wakatambika janza lyalulyo kujulu ⁶ akukonka muzina lya Leza uupona mane kukabe kutamani, ooyo wakalenga julu anyika alwizi, azyoonse zili muli nzizyo. Mungelo ooyo wakati, “Ciindi ono camana! ⁷ Mungelo waciloba asiba mweembo wakwe, Leza nacite mbuli bwaamba maseseke ngaakaamba kwiindila mubabelesi bakwe basinsimi.”

⁸ Lino jwi ndilyonya ndindakamvwa lyakazwa kujulu lyakandaambila alimwi kuti, “Koya ukabweze kabbuku kajulidwe mujanza lyamungelo wiimvwi alwizi aanyika.”

⁹ Nkaako ndakaswena munsi lyamungelo ooyo, ndakamwaambila kuti andipe kabbuku. Walo wakati, “Bweza, kalye, mwida kayoolula, pele mukanwa kanoolweela mbuli buci.”

¹⁰ Lino ndakabweza kabbuku kakali mujanza lyamungelo. Nindakakalya, mukanwa kakali kulweela mbuli buci, pele nindakakamena mwida mwakalula lu. ¹¹ Mpoonya ndakaambilwa kuti, “Alimwi uleelede kuti waambilizye mulumbe wa Leza kumisyobo minji, kuzisi zinji, kumilaka minji, akubami banji.”