Ciibalusyo 9

Kutasyomeka kwabantu

¹ “Lino amuswiilile, nywebo Nobaisilayeli. Mulaafwi kuzubuka mulonga wa Jolodani kuti mukatole nyika yamisyobo mipati iilaanguzu kwiinda ndinywe. Minzi yabo mmipati alimwi ilikwabilidwe abwaanda bulamfu busika kujulu. ² Bantu mbalamfu alimwi mbaasinguzu, mbalunyungu lwa Baanaki. Mwakalimvwida zyambabo kuti, ‘Ino nguni uukonzya kuzunda Baanaki?’ ³ Sunu amuzibe kuti Mwami Leza wanu uumusolweda uli mbuli mulilo uusyukutya. Uyoobazunda kumbele lyanu. Ndendilyo nomuyoobatanda akubanyonyweeda limwi cakufwambaana, mbubonya mbuli mbwaakasyomezya Mwami Leza.

⁴ “Lino Mwami Leza aakumana kumutandila bantu aaba, kutakabi muntu uyooti, ‘Mwami Leza wakandipa nyika iino akaambo kakuti ndimululami.’ Peepe, Mwami Leza nguwabatanda bantu aaba akaambo kakuti mbaasizibi. ⁵ Takuli kululama naa kulondoka kwanu kuyoomutozya nyika pe. Pele nkaambo kabubi bwamisyobo eeyi Mwami Leza ncabatanda acimwi ncaabatandila ncakuti abambe cisyomezyo ncaakakonkezya kuli basikale banu ba Abulahamu, Izaka a Jakobo. ⁶ Aboobo amuzibe kuti Mwami Leza taamupa nyika mbotu eeyi akaambo kabululami bwanu, nywebo lwanu kumugama muli basicinguni.

⁷ “Kamuyeeya, mutalubi mbuli mbumwakanyemya Mwami Leza wanu munkanda. Mbumwakazwida buyo mu Ijipiti kusikila sunu, mwali kuzangila Mwami Leza. ⁸ Kucilundu ca Sinai mwakanyemya Mwami Leza cakuti wakatimunyonyoone. ⁹ Nindakatanta atala aacilundu kuti ndikatambule zilembelo zyamabwe, zilembelo zyacizuminano eeco Mwami Leza ncaakapangana andinywe, ndakakkala acilundu kwamazuba aali makumi one amasiku aawo kakunyina kulya nikuba kunywa maanzi pe. ¹⁰ Mwami Leza wakandipa zilembelo zyamabwe zyobilo zyakalembedwe amunwe wakwe mwini. Ali nzizyo mpaakalembedwe milawo yoonse Mwami Leza njaakapa ciindi naakali kukanana kulindinywe kuzwa mumulilo kamubungene. ¹¹ Naakamana mazuba aayo, Mwami Leza wakandipa zilembelo zyobilo zyacizuminano.

¹² “Mpawo Mwami Leza wakandaambila kuti, ‘Fwambaana seluka, nkaambo bantu bako mbookagwisya mu Ijipiti babisya. Basiya nzindakabalailila, babumba mutuni.’ ¹³ Mwami Leza wakaindilizya akuti, ‘Ndilizi kuti bantu aaba mbaasicinguni ncobeni. ¹⁴ Nkoo leka ndibanyonyoonene limwi boonse mbobabede. Lino njoocita kuti yebo ube musyobo mupati uulaanguzu kwiinda mbabo.’

¹⁵ “Aawo ndakapiluka ndaseluka kuzwa acilundu cakali kuyaka mulilo. Ndakalijisi azilembelo zyobilo zyamabwe. ¹⁶ Nindakalanga ndakabona kuti ncobeni mwabisizya Mwami Leza wanu, mwakabumba moombe alimwi akusiya eezyo Mwami Leza nzyaakamulailila. ¹⁷ Aboobo kamulangilide ndakapwaya zilembelo eezyo. ¹⁸ Mpoonya ndakavuntama kumbele lya Mwami Leza kwamazuba aali makumi one amasiku aawo. Tiindakali kulya nikuba kunywa maanzi akaambo kazibi nzimwakacita zyakamunyemya. ¹⁹ Ndakayoowa kapati akaambo kabukali bwa Mwami Leza. Wakalinyemede cakuti wakali kuyanda kumunyonyoona. Pele Mwami Leza wakandiswiilila ciindi eeco calo. ²⁰ Awalo Aloni wakanyemya Mwami Leza kapati cakuti Mwami Leza wakali kuyanda kumujaya, ciindi eeco ndakamukombela. ²¹ Ndakabweza cintu ciya, coombe ncimwakabumbide ndacitenta. Mmane ndakacipwaya ndaciziya, busu bwaco ndakabusowela mukalonga kakali kukunka kuzwa mucilundu.

²² “Ciindi nimwakali ku Tabela, Masaa, aku Kibulonihataava, mwakanyemya Mwami Leza mbubonya buyo. ²³ Mwami Leza naakamutuma ku Kadesyibaaneya wakati, ‘Kamuya mukatole nyika eeyo njindakamupa.’ Pele nywebo mwakakaka, taakwe nimwakamusyoma nikuba kumuswiilila pe. ²⁴ Kuzwa ciindi nindakamuziba lyoonse muzangila Mwami Leza.

²⁵ “Kwamazuba aayo aali makumi one amasiku aawo ndakavuntama kumbele lya Mwami Leza nkaambo wakakanzide kumunyonyoona. ²⁶ Ndakakomba ku Mwami Leza ndakati, ‘O Mwami Leza Simalelo wangu, utanyonyooni bantu bako, balo aaba mbookavuna akubagwisya mu Ijipiti anguzu zyako mpati. ²⁷ Yeeya babelesi bako ba Abulahamu, Izaka a Jakobo. Akaambo kabo lekelela basicinguni aaba bubi bwabo, alimwi acinyonyoono cabo, ²⁸ kuti ambweni Baijipiti bayooti wakacilwa kubatola munyika eeyo njaakabasyomezya. Alimwi inga bayooti wakabagwisya kuti akabajaile munkanda nkaambo ulibasulide. ²⁹ Aaba mbantu bako mbookagwisya mu Ijipiti anguzu zyako kuti babe bako.’