Ciibalusyo 8

Nyika mbotu njobayootola

¹ “Lino amucenjele mubone kuti mwatobela malailile oonse ngendimupa sunu, kutegwa mupone, muvule, akutola nyika eeyo Mwami Leza njaakakonkezya kuli basikale banu. ² Amuyeeye Mwami Leza wanu mbuli mbwaakamusolweda munkanda kwamyaka iili makumi one, kuti amubombye akumusunka kuti abone naa mwaali kukonzya kubamba milawo yakwe naa pe. ³ Wakamulekelela anzala, mane wakamupa mana, cilyo nywebo nibaba basikale banu ncibatakalide pe. Wakacita eeci kuti amuzibye kuti muntu taponi acinkwa cilikke pe, pele ulapona amajwi oonse aazwa ku Mwami Leza. ⁴ Kwamyaka eeyi iili makumi one zisani zyanu tiizyakamana alimwi tiimwakali kuzimba maulu pe. ⁵ Amuyeeye kuti mbubonya mbuli mwaalumi mbwalaya mwanaakwe, mbubonya oobo awalo Mwami Leza ulamulaya. ⁶ Nkaako amutobele milawo ya Mwami Leza wanu, mweende, munzila zyakwe akulemeka. ⁷ Nkaambo Mwami Leza wanu uyoomunjizya munyika mbotu, nyika iijisi milonga atusensa, iijisi bapoompo basoomoka mumakkuti amutulundu. ⁸ Ninyika yabulotwe amaila, nsaansa ankuyu, mapomegileneti, mafuta aaoliva abuci. ⁹ Ninyika nkomukonzya kulya cakulilekela, kutabulwa cintu. Mabwe aamumo ndubulo, nkaako mulakonzya kusya mukuba mutulundu twayo. ¹⁰ Mwaakulya cakulilekela, mukatembaule Mwami Leza wanu akaambo kanyika mbotu njaamupa.

Mbwaakabacenjezya kuti batalubi Mwami Leza

¹¹ “Lino amucenjele kuti mutalubi Mwami Leza wanu. Mutaleki kubamba milawo yakwe, amalailile aakwe alimwi ambeta zyakwe nzemupa sunu. ¹² Ambweni mwaakulya cakulilekela akuyaka maanda mabotu akulikkalila, ¹³ ŋombe ambelele zyanu zyaakuvula, ngolida ansiliva alubono lwanu luli loonse lwaakuvula, ¹⁴ inga mwaakulisumpula akuluba Mwami Leza wanu wakamugwisya mu Ijipiti mumwakali bazike. ¹⁵ Wakamusolweda munkanda mpati iiyoosya, muciyuma-yuma mutakwe maanzi, muli buyo nzoka nkali atubanze. Nikuba boobo wakamupa maanzi kuzwa mumwaala ¹⁶ amana, cilyo basikale banu ncibatakalide, kuti amubombye akumusunka kutegwa zintu zyoonse zimweendele kabotu. ¹⁷ Amucenjele kuti kutabi uuti, ‘Nguzu zyangu amaanza aangu nzizyandiletela lubono loonse oolu.’ ¹⁸ Pele amuzibe kuti Mwami Leza wanu nguumupa nguzu zyakujana lubono oolu, mbubwaamba cizuminano cakwe eeco ncaakakonkezya kuli basikale banu, mbokubede asunu. ¹⁹ Mutakalubi Mwami Leza wanu nikuba kukomba baleza bambi naa kubamanina milimo. Kuti naa mukacite oobo, sunu ndamwaambilila limwi kuti muyoonyonyoonwa masimpe. ²⁰ Kuti naa tamuswiilili Mwami Leza wanu, anywebo muyoonyonyoonwa mbubonya mbuli misyobo iilya njaakanyonyoona kamulibwenene.