Ciibalusyo 7

Bantu ba Mwami Leza

¹ Lino Mwami Leza, Leza wanu uyoomunjizya munyika eeyo njimuyookkala, alimwi uyoomutandila misyobo iili munyika eeyo. Uyootanda misyobo iili ciloba yanguzu kwiinda ndinywe, iili Bahiti, Bagegasyi, Baamoli, Bakenani, Bapelezi, Bahivi, alimwi a Bajebusi. ² Mwami Leza, Leza wanu aakwaaba bantu aaba kulindinywe, muleelede kuti mukabajaye boonse buyo mbobabede. Mutakapangi cizuminano ambabo, nikuba kubabeda aalubomba pe. ³ Mutakakwatani ambabo, alimwi mutakalekeli bana banu kuti bakakwatane ambabo pe, ⁴ nkaambo inga bayooiisya bana banu nzila zyakukomba baleza bambi akubalesya kukomba Mwami Leza, Leza wanu. Aawo Mwami Leza inga wamunyemena akumunyonyoona cakufwambaana. ⁵ Mboobu mbomweelede kucita kubantu aabo. Mukazimwaye zipaililo zyabo, mukapwayaule misemo yamabwe nkobapailila, mukamwayaule twaanda ntobakombela alimwi mukatente mituni yabo. ⁶ Nkaambo nywebo muli bantu ba Mwami Leza wanu, mulasalala. Mwami Leza wanu wakamusala kuzwa akati kamisyobo yoonse yaansi kuti mube bakwe bamugeme.

⁷ Mwami Leza taakamuyanda akumusala akaambo kakuti mwakali banji kwiinda misyobo imwi, nywebo lwanu mwakali basyoonto kwiindilila. ⁸ Pele Mwami Leza wakamuyanda, eelyo wakamuyandisya akubamba cikonke eeco ncaakakonkezya kuli basikale banu. Nkankakaako ncaakamugwisya akumunununa mubuzike anguzu zyakwe mpati kuzwa mu Ijipiti. ⁹ Aboobo amuzibe kuti Mwami Leza wanu ngu Leza uusyomeka. Ulabamba cizuminano cakwe akutondezya luyando lwakwe kumazyalani aali cuulu aabaabo bamuyanda akubamba milawo yakwe. ¹⁰ Kwamana boonse bamusulaika uyoobasubula kwiindila mukubanyonyoona, taakwe nayoobaleka buyo pe. ¹¹ Nkaako amutobele milawo, njiisyo amalailile ngindamupa sunu.

Zileleko zyakuswiilila

¹² Kuti naa kamubamba milawo eeyi akwiitobela cakusyomeka, Mwami Leza wanu uyoobamba cizuminano cakwe, mbuli mbwaakakonkezya kuli basikale banu. ¹³ Uyoomuyanda akumuleleka cakuti muyoovula kapati akuba aabana banji. Uyooleleka myuunda yanu cakuti iyoomupa maila, waini amafuta aaoliva. Uyooindilizya kumuleleka mukumupa ŋombe ambelele zinji. Uyoomupa zileleko eezi zyoonse munyika eeyo njaakasyomezya basikale banu kuti uzoomupa. ¹⁴ Taakwe bantu bambi bayoolelekwa mbuli ndinywe pe. Taakwe mwaalumi naa mukaintu utakoonooyoozyala akati kanu, naba akati kazivubwa zyanu. ¹⁵ Mwami Leza uyoomukwabilila kuzwa kucuuno niciba buti. Takaleki malwazi ayoosya alindinywe mbuli ngomwakabona mu Ijipiti, pele uyooayumbila kuli basinkondonyoko boonse. ¹⁶ Misyobo yoonse Mwami Leza wanu njayooaba kulindinywe mukiinyonyoone. Mutakabeengeleli, alimwi mutakakombi mituni yabo, nkaambo kucita boobo nkulijazya.

¹⁷ Ambweni inga mulati, “Misyobo eeyi ilaanguzu kwiinda ndiswe, ino tulaitanda buti? ¹⁸ Mutabayoowi, amuyeeye Mwami Leza wanu ncaakacita kuli Falo akubantu bakwe boonse. ¹⁹ Nywebo mwakalibonena cuumo, maleele, azigambya zyanguzu eezyo Mwami Leza nzyaakabelesya naakamugwisya. Mwami Leza uyoocita mbubonya kumisyobo yoonse eeyi njomuyoowa ono. ²⁰ Mwami Leza wanu uyootuma cuumo ciyoonyonyoona boonse aabo bayoosyaala kabayubide. ²¹ Batamuyoosyi pe nkaambo Mwami Leza wanu ulaandinywe, ngu Leza mupati uyoosya. ²² Mwami Leza wanu uyootanda misyobo eeyi aasyoonto-syoonto. Takooyoomulekela kuti mubanyonyoonene limwi ciindi comwe, nkaambo inga banyama bamusokwe baakumukatazya. ²³ Pele Mwami Leza wanu uyooaba basinkondonyoko kulindinywe, uyoobakonga mane bakanyonyoonwe. ²⁴ Uyooaba bami babo kulindinywe. Muyoobajaya boonse, nkaako bayoozimaana munyika. Taakwe naba omwe uutikamuyumine, muyoobanyonyoona boonse. ²⁵ Mituni yabo mukiitente. Mutakanyomeneni nsiliva naa ngolida zyakabumbya mituni eeyi, mutakazitoli. Naa mwacita boobo nkulijazya, nkaambo Mwami Leza wanu ulabasesemwa bakomba baleza bambi. ²⁶ Mutakanjizyi mutuni mumaanda aanu. Naa mwacita boobo nywebo muyoosinganyizigwa mbuli mbabo. Mweelede kusulaika akukaka mituni eeyi nkaambo Mwami Leza wakiisinganya.