Ciibalusyo 6

Mulawo mupati kwiindilila

¹ Lino njeeyi milawo amalailile anjiisyo zyoonse nzyaakandilailila Mwami Leza, Leza wanu kuti ndimwiisye. Mukiitobele yoonse eeyi munyika njemuyootola. ² Mubuumi bwanu boonse, nywebo abana banu abalunyungu banu muleelede kuswiilila Mwami Leza, Leza wanu akubamba milawo amalailile aakwe oonse aaya ngendimupa kutegwa mukapone munyika eeyo. ³ Amwiiswiilile akwiibamba milawo eeyi, nywebo Nobaisilayeli. Ndendilyo zintu zyoonse niziyoomweendela kabotu. Muyooba musyobo mupati akuyookkala munyika mbotu yambolezi, mbubonya mbwaakamusyomezya Mwami Leza, Leza wabasikale banu.

⁴ “Nobaisilayeli amuswiilile Mwami Leza wesu ngumwi. ⁵ Amuyande Mwami Leza, Leza wanu amyoyo yanu yoonse, amyuuya yanu yoonse, alimwi anguzu zyanu zyoonse. ⁶ Mutakalubi milawo eeyi njendamupa buno buzuba. ⁷ Amukaiisye bana banu cabunkutwe. Kamwiibaluluka kufumbwa nkomubede mumaanda, nimuli mulweendo, nimulyookezya nikuba kubeleka. ⁸ Kamulyaanga kumaboko akwiisama kunkumo kuti cibe ciibalusyo. ⁹ Mwiilembe azikotamino, azicinda zyamaanda aanu alimwi aazitendele zyabwaanda.”

Cisubulo cabataswiilili

¹⁰ “Mwami Leza, Leza wanu wakabasyomezya basikale banu, ba Abulahamu, Izaka a Jakobo, kuti uyoomupa nyika iijisi minzi mibotu, yabuvubi, njimwatakayaka pe, ¹¹ maanda aayo anooyoozwide zintu zibotu nzimwatakabikka pe. Alimwi kunooyooli mikalo yamaanzi yakasigwa kale, amyuunda yansaansa amaoliva iisyangidwe kale. Lino Mwami Leza aakumunjizya munyika eeyo mbotu mwaakujana zyoonse nzyomuyanda kulya, ¹² amucenjele kuti mutamulubi Mwami Leza ooyo wakamugwisya mu Ijipiti momwakali bazike. ¹³ Amukalemeke Mwami Leza, Leza wanu alikke, mukakombe nguwe alikke, alimwi mukakonkezye muzina lyakwe. ¹⁴ Mutakakombi baleza bambi, nikuba kusola kukomba baleza babantu bamuzingulikide. ¹⁵ Nkaambo Mwami Leza, Leza wanu walo uuli akati kanu ngu Leza uutalekeleli bakomba baleza bambi. Naa mwacita oobo Leza uyoomunyemena kapati akumulobya do!

¹⁶ “Mutakataliki Mwami Leza, Leza wanu mbuli mbomwakacita ciindi nimwakali ku Masaa. ¹⁷ Mubone kuti mwabamba milawo yoonse, malailile, anjiisyo nzyamupede. ¹⁸ Kamucita ziluleme eezyo Mwami Leza nzyamulailila kuti mucite, ndendilyo zintu zyoonse niziyoomweendela kabotu. Aawo muyookonzya kutola nyika mbotu Mwami Leza njaakasyomezya kuli basikale banu. ¹⁹ Muyootanda basinkondonyoko kuzwa mulinjiyo, mbubonya mbuli bwakaamba Mwami Leza.

²⁰ “Lino kuti ciindi ciboola bana banu bakamubuzye kuti, ‘Ino caamba nzi kuti katubamba milawo, malailile anjiisyo eezi Mwami Leza, Leza wesu nzyaakatupa?’ ²¹ Nywebo mukaingule kuti, ‘Twakali bazike kumwami wa Ijipiti, nkabela Mwami Leza nguwakatugwisya anguzu zyakwe mpati.’ ²² Twakalibonena tobeni mbuli Mwami Leza mbwaakacita maleele aziyoosya zipati ku Baijipiti, akuli Falo abamukwasyi wakwe boonse. ²³ Wakatugwisya swebo kuzwa mu Ijipiti akutuleta kuno kuzootupa nyika eeyi, mbuli mbwaakasyomezya kuli basikale besu. ²⁴ Nkankakaako Mwami Leza ncaakatulailila kuti katuswiilila akubamba milawo eeyi yoonse, alimwi katumulemeka. Kuti katucita oobo, unoolanga kabotu musyobo wesu akuucita kuti ube musyobo uuzwidilide. ²⁵ Kuti naa twaswiilila cakusyomeka zintu zyoonse nzyatulailila, Mwami Leza, Leza wesu uyootucitila ziluleme.”